ທ່ານ
ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ, ທັງເປັນປະທານຄະນະກຳມະການຈັດງານບຸນນະມັດສະການພະທາດຫຼວງໄດ້ຖະແຫຼງຕໍ່ສືມວນຊົນໃນວັນທີ 12 ພະຈິກນີ້ວ່າ: ງານບຸນນະມັດສະການພະທາດຫຼວງປີນີ້ຈະຄົບງັນ 5 ວັນ, ໂດຍຈະເລີ່ມແຕ່ວັນທີ
20 – 25 ພະຈິກນີ້ ແລະ ແບ່ງເປັນ 2 ຈຸດຄື: ເຂດເດີນທາດຫຼວງຈະເປັນບ່ອນຈັດງານສະເຫຼີມສະຫຼອງວັນຊາດທີ 2 ທັນວາຄອບ 40 ແລະ ສ່ວນຢູ່ເຂດພະທາດຫຼວງແມ່ນຈະຈັດກິດຈະກຳທາງສາສະໜາ, ການສະແດງສີລະປະດົນຕີ ແລະ ວາງຂາຍສິນຄ້າສະເພາະທີ່ເປັນເອກະລັກຂອງປະເທດເທົ່ານັ້ນ, ສ່ວນງານວາງສະແດງສິນຄ້າ ແລະ ຜະລິດຕະພັນຕ່າງໆແມ່ນຈະໄປຈັດຢູ່ສູນການຄ້າລາວໄອເຕັກ, ຊຶ່ງມີລາຍລະອຽດຄື: ມື້ 13 ຄ່ຳກົງກັບວັນທີ 23 ເປັນມື້ນະມັດສະການພະທດາຫຼວງ, ມື້ 14 ຄ່ຳກັງກັບວັນທີ 24 ແມ່ນຈະມີການແຫ່ພະສາດເຜີ້ງຈາກວັດສີເມືອງ ມາຫາພະທາດຫຼວງ ແລະ ມື້
15 ຄ່ຳກົງກັບວັນທີ
25 ຊຶ່ງ
ເປັນມື້ສຸດທ້າຍຂອງງານບຸນ,
ຕອນເຊົ້າຈະມີພິທີຕັກບາດຖວາຍສັງຄະທານ ແລະ ຕີຄີ, ຕອນແລງຈະມີການວຽນທຽນອ້ອມທາດຫຼວງຕາມຮີດຄອງປະເພນີທີ່ເຄີຍປະຕິບັດມາ.
ທ່ານຮອງເຈົ້າຄອງກ່າວວ່າ: ກໍເໝືອນດັ່ງທຸກໆປີການຈັກງານບຸນນະມັດສະການພະທາດຫຼວງແມ່ນບຸນປະເພນີອັນດີງານຂອງຊາດເຮົາທີ່ໄດ້ສືບທອດກັນມາ
ແລະ ເພື່ອໃຫ້ປະຊາຊົນລາວໄດ້ຮ່ວມກັນຄົບງັນດ້ວຍຄວາມເບີກບານມ່ວນຊື່ນ ແລະ ເຖິງວ່າງານບຸນປີນີ້ຈະມີການຈຳກັດທາງດ້ານສະຖານທີ່, ແຕ່ກິດຈະກຳຕ່າງໆທາງສາສະໜາ ແລະ ຄວາມມ່ວນຊື່ນນັ້ນແມ່ນຍັງຈັດໃຫ້ມີເປັນປົກກະຕິ, ດັ່ງນັ້ນຈຶ່ງຮຽກຮ້ອງໃຫ້ທຸກຄົນທີ່ຈະມາທ່ຽວງານບຸນໃຫຍ່ດັ່ງກ່າວຈົ່ງມີສະຕິ,
ຊ່ວຍກັນຮັກສາຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພ ແລະ ສິ່ງສຳຄັນອີກຢ່າງໜຶ່ງແມ່ນຈຶ່ງເອົາໃຈໃສ່ໃນການນຸ່ງຖືຂອງແມ່ຍິງໃຫ້ສຸພາບ ແລະ ຮຽບຮ້ອຍ ແລະ ຖືກຕ້ອງຕາມວັດທະນະທຳ ແລະ ເປັນການດຶງດູດນັກທ່ອງທ່ຽວເຂົ້າມາທ່ຽວໃນປະເທດເຮົາຫຼາຍຂຶ້ນ.
No comments:
Post a Comment