ກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ໄດ້ຖືກຮັບຮອງຈາກສະມາຊິກສະພາແຫ່ງຊາດ ດ້ວຍສຽງສ່ວນຫລາຍ ໃນຕອນແລງຂອງວັນທີ
14 ທັນວາຜ່ານມານີ້, ເຊິ່ງເປັນມື້ທີ
6 ຂອງການດຳເນີນກອງປະຊຸມສະໄໝສາມັນເທື່ອທີ
10 ຂອງສະພາແຫ່ງຊາດຊຸດທີ VII. ຮ່າງກົດໝາຍສະບັບນີ້ ໂດຍລວມແມ່ນໄດ້ປັບປຸງທາງດ້ານຫລັກການພື້ນຖານກ່ຽວກັບການຈັດຕັ້ງ, ການເຄື່ອນໄຫວ ແລະ ລະບອບແບບແຜນວິທີເຮັດວຽກຂອງອົງການປົກຄອງທ້ອງຖິ່ນ ເພື່ອເປັນບ່ອນອີງໃຫ້ແກ່ການຄົ້ນຄວ້າ, ການປັບປຸງ ແລະ ສ້າງອົງການປົກຄອງທ້ອງຖິ່ນ ໃຫ້ສອດຄ່ອງກັບສະພາບເງື່ອນໄຂຄວາມເປັນຈິງຂອງປະເທດເຮົາ ກໍຄືຄວາມມຸ້ງມາດປາຖະໜາຂອງປະຊາຊົນ, ການພັດທະນາໃນໄລຍະໃໝ່, ການເຊື່ອມໂຍງກັບພາກພື້ນ ແລະ ສາກົນ
ແນໃສ່ເຮັດໃຫ້ອົງການປົກຄອງທ້ອງຖິ່ນມີຄວາມໜັກແໜ້ນເຂັ້ມແຂງ, ເປັນລະບົບເອກກະພາບໃນທົ່ວປະເທດ ແລະ ສາມາດຮັບປະກັນການຈັດຕັ້ງປະຕິບັດລັດຖະທຳມະນູນ, ກົດໝາຍ, ແຜນພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດໃຫ້ປະກົດຜົນເປັນຈິງ ແລະ ມີປະສິດທິພາບສູງ.
ໃນນັ້ນ ກົດໝາຍວ່າດ້ວຍການປົກຄອງທ້ອງຖິ່ນສະບັບປີ 2003 ໄດ້ຖືກນຳໃຊ້ມາແລ້ວ 10 ກວ່າປີ
ເຖິງຈະມີຈຸດດີເປັນສ່ວນຫລາຍ, ແຕ່ກໍຍັງມີຈຸດອ່ອນບາງດ້ານເຊັ່ນ: ເນື້ອໃນຂອງບາງໝວດ, ບາງມາດຕາ ຍັງບໍ່ທັນຈະແຈ້ງ, ຮັດກຸມ ແລະ ບໍ່ທັນຄົບຖ້ວນ ເມື່ອທຽບໃສ່ຄວາມຮຽກຮ້ອງຕ້ອງການຂອງການພັດທະນາ ແລະ ດ້ວຍເຫດຜົນດັ່ງກ່າວຈຶ່ງມີຄວາມຈຳເປັນຕ້ອງໄດ້ມີການປັບປຸງກົດໝາຍສະບັບດັ່ງກ່າວ ເພື່ອໃຫ້ສອດຄ່ອງກັບສະພາບຄວາມເປັນຈິງຂອງປະເທດ, ຄວາມຕ້ອງການພັດທະນາໃນໄລຍະໃໝ່ ແລະ
ການເຊື່ອມໂຍງກັບສາກົນໄດ້.
ທ່ານລັດຖະມົນຕີວ່າການກະຊວງພາຍໃນ ໄດ້ກ່າວວ່າ: ເມື່ອກົດໝາຍສະບັບ ນີ້ ໄດ້ຖືກຮັບຮອງ ແລະ
ປະກາດໃຊ້ຈະເຮັດໃຫ້ລັດຖະບານ ແລະ ທ້ອງຖິ່ນ
ມີນິຕິກຳເປັນ ບ່ອນອີງໃນການຄົ້ນຄວ້າເພື່ອສ້າງຕັ້ງ, ປັບປຸງບູລະນະການຈັດຕັ້ງ, ການເຄື່ອນໄຫວ ແລະ ວິທີເຮັດວຽກຂອງອົງການປົກຄອງທ້ອງຖິ່ນ ໃຫ້ມີຄວາມໜັກແໜ້ນ,
ເຂັ້ມແຂງ ແລະ
ໂປ່ງ ໃສຂຶ້ນຕື່ມ,
ພ້ອມນີ້ ຍັງເຮັດໃຫ້ອົງການປົກຄອງທ້ອງຖິ່ນ ມີກຳລັງແຮງຫລາຍຂຶ້ນ ໃນການ
ຂຸດຄົ້ນກຳລັງແຮງບົ່ມຊ້ອນຂອງທ້ອງຖິ່ນເຂົ້າໃສ່ການຈັດຕັ້ງປະຕິບັດແນວທາງນະໂຍບາຍ, ລັດຖະທຳມະນູນ, ກົດໝາຍ,
ລະບຽບການ, ແຜນພັດທະນາເສດຖະກິດ-ສັງຄົມ ແລະ
ການບໍລິການປະຊາຊົນໃຫ້ມີປະສິດທິຜົນຫລາຍຂຶ້ນ. ນອກຈາກນີ້ ຍັງຮັບປະກັນການຈັດຕັ້ງປະຕິບັດລັດຖະທຳມະນູນ, ກົດໝາຍ, ແຜນພັດທະນາເສດຖະກິດ-ສັງຄົມ, ແຜນງົບປະມານ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານການຕ່າງປະເທດໃຫ້ມີປະສິດທິຜົນ ແລະ ສາມາດປົກປ້ອງຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທຳຂອງປະຊາຊົນ, ແນໃສ່ປະເທດຊາດມີຄວາມເຂັ້ມ ແຂງ, ປະຊາຊົນເຂົ້າເຖິງການບໍລິການ ແລະ ການມີສ່ວນຮ່ວມໃນການຄຸ້ມຄອງການບໍລິ ການຂອງລັດ
ເຮັດໃຫ້ສັງຄົມມີຄວາມສາມັກຄີປອງດອງ, ຍຸຕິທຳ ແລະ
ສີວິໄລ. ກົດໝາຍດັ່ງກ່າວ ປະກອບມີ:
9 ພາກ, 5 ໝວດ, 96 ມາດຕາ.
ໃນວັນດຽວກັນສະພາແຫ່ງຊາດ ຍັງໄດ້ຮັບຮອງເອົາກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງສະບັບປັບປຸງຢ່າງເປັນເອກກະສັນກັນດ້ວຍຄະແນນສຽງຫລາຍກວ່າ 90% ຂອງສະມາຊິກສະພາແຫ່ງຊາດ, ເຊິ່ງກົດ ໝາຍສະບັບດັ່ງກ່າວປະກອບມີ: XI ໝວດ, 51 ມາດຕາ.
No comments:
Post a Comment