laophatthananewspaper: ລາວກຽມພ້ອມເຝົ້າລະວັງພະຍາດຊິກ້າ

ເມື່ອຜ່ານມານີ້, ກະຊວງສາທາລະນະສຸກໄດ້ຮ່ວມກັບອົງການອະນາໄມໂລກ, ໄດ້ຈັດພິທີຖະແຫຼງຂ່າວຕໍ່ສື່ມວນຊົນກ່ຽວກັບສະພາບການລະບາດຂອງພະຍາດຊິກ້າ ( zika ) ຢູ່ພາກພື້ນອາເມລິກາ ແລະ ການກຽມຄວາມພ້ອມຂອງ ສປປ ລາວ ໃນການປ້ອງກັນພະຍາດດັ່ງກ່າວຂຶ້ນຢູ່ນະຄອນ ຫຼວງວຽງຈັນ, ໂດຍທ່ານ ສາດ ສະດາຈານ ດຣ ເອສະຫວ່າງ ວົງວິຈິດ ລັດຖະມົນຕີວ່າການກະຊວງສາທາລະນະສຸກຖະແຫຼງວ່າ: ບັດຈຸບັນໄດ້ເກີດມີການລະບາດຂອງເຊື້ອຈຸລະໂລກຊິກ້າ ໃນພາກພື້ນອາເມລິກາ, ຊຶ່ງກາຍເປັນສິ່ງທີ່ໜ້າເປັນຫ່ວງທີ່ສຸດຂອງບັນດາປະເທດຕ່າງໆໃນທົ່ວໂລກ, ກໍຄືປະເທດລາວຂອງພວກເຮົາ ແລະ ເຖິ່ງວ່າປັດຈຸບັນການລະບາດຂອງພະຍາດດັ່ງກ່າວຍັງບໍ່ມາເຖິງແຕ່ກະຊວງສາທາລະນະສຸກກໍຈະເພີ່ມຄວາມ

ເຂັ້ມແຂງໃນການເຝົ້າລະວັງພະຍາດນີ້ ແລະ ມາຮອດປັດຈຸບັນພາກສ່ວນກ່ຽວຂ້ອງທາງກະຊວງສາທາລະນະສຸກສາມາດຢືນຢັນທາງດ້ານວິເຄາະໄດ້ວ່າການປ້ອງກັນພະຍາດຊິກ້າ ແມ່ນຄ້າຍຄືກັບການປ້ອງກັນພະຍາດໄຂ້ຍຸງລາຍເນື່ຶອງຈາກການແພ່ເຊື້ອຂອງພະຍາດນີ້ ແມ່ນຄ້າຍຄືກັບພະຍາດໄຂ້ຍຸງລາຍທັງນັ້ນທາງກະຊວງສາທາລະນະສຸກ, ຈຶ່ງໄດ້ຮ່ວມມືກັບອຳນາດການປົກຄອງທຸກຂັ້ນ, ເພື່ອໃຫ້ຄວາມສຳຄັນໃນຂະບວນການທຳລາຍແຫຼ່ງເພາະພັນຂອງຍຸງລາຍ, ໂດຍການມີສ່ວນຮ່ວມຂອງຊຸມຊົນໃນການປະຕິບັດຫຼັກການ 5 ປ ໃຫ້ການເປັນຄວາມສິນເຄີຍປະຈຳວັນຄື: ປິດ, ປ່ຽນ, ປ່ອຍ, ປັບປຸງ, ປະຕິບັດ ແລະ ປັດໃຈຮ່ວມທີ່ພົວພັນກັບພະຍາດຊິກ້າ ຊຶ່ງລວມມີອາການສະໝອງນ້ອຍ ແລະ ອາການກ້າມຊີ້ນອ່ອນແຫຼວ, ພ້ອມນັ້ນທາງໂຄງການອະນາໄມໂລກຍັງໃຫ້ການສະນັບສະໜູນກະຊວງສາທາລະນະສຸກໃນການເພີ່ມຄວາມເຂັ້ມແຂງ ແລະ ການປ້ອງກັນພະຍາດດັ່ງກ່າວເຊັ່ນ: ການສ້າງຫ້ອງວິເຄາະເພື່ອກວດຫາເຊື້ອພະຍາດ, ເພີ່ມຄວາມເຂັ້ມແຂງວຽກງານການສື່ສານ ເພື່ອຫຼຸດຜ່ອນຄວາມສ່ຽງຈາກພະຍາດດັ່ງກ່າວຜູ້ຕາງໜ້າອົງການອະນາໄມໂລກປະຈຳລາວກ່າວວ່າ: ທຸກຄົນສາມາດປ້ອງກັນຕົວເອງຈາກພະຍາດຊິກ້າໄດ້ໂດຍບໍ່ໃຫ້ຍຸງກັດ, ຍ້ອນຍຸງເປັນພາຫະທີ່ກໍໃຫ້ເກີດພະຍາດນີ້, ຄົນສ່ວນໃຫຍ່ທີ່ຕິດພະຍາດຊິກ້າແມ່ນບໍ່ມີອາການສະແດງອອກ ຫຼື ຈະມີພຽງອາການໄຂ້ເບົາບາງ, ມີຜືນຕາມຜິວໜັງ ແລະ ເຫຍື້ອເມືອກຕາອັກເສບ ແລະ ອາການເຫຼົ່ານີ້ຈະຫາຍໄປໃນໄລຍະເວລາ 2 - 7 ວັນ, ການປິ່ນປົວຄົນເຈັບດັ່ງກ່າວແມ່ນໃຫ້ຢາແກ້ປວດ, ແກ້ໄຂ້ , ດື່ມນ້ຳຫຼາຍໆ ແລະ ຜັກຜ່ອນໃຫ້ພຽງພໍ, ຜູ້ຕ່າງໜ້າອົງການອະນາໄມໂລກໃຫ້ຮູ້ອີກວ່າ: ພະຍາດຊິກ້າເປັນເຊື້ອຈຸລະໂລກຊະນິດໜຶ່ງຊຶ່ງມັນເກີດໃນເຂດຮ້ອນຊຸ່ມ ແລະ ກວດພົບພະຍາດດັ່ງກ່າວຄັ້ງທຳອິດໃນປີ 1947 ທີ່ມີຊື່ວ່າ ຊິກ້າ ປະເທດອຸກັນດາ, ທະວີບອາຟຼິກກາ ແລະ ພະຍາດດັ່ງກ່າວໄດ້ເກີດລະ ບາດຂຶ້ນຢູ່ກະແຈກກະຈາຍຈົນເຖິງປີ 2013 ແລະ ປັດຈຸບັນມີການລາຍງານພົບຜູ້ຕິດເຊື້ອພະຍາດດັ່ງກ່າວໃນຂົງເຂດອາຊີເຊັ່ນ: ປະເທດໄທ, ອິນໂດເນເຊຍ ແລະ ກຳປູເຈຍເປັນຕົ້ນ.