ທ່ານ ສົງການ ຫລວງມຸນິນທອນ ຫົວໜ້າກົມເສດຖະກິດ ທັງເປັນຫົວໜ້າເຈົ້າໜ້າທີ່ອາວຸໂສອາເຊັມ ສປປ
ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມປຶກສາຫາລືສື່ມວນຊົນອາເຊັມ ວ່າດ້ວຍການເຊື່ອມຈອດ (ASEM Media
Dialogue on Connectivity) ເຊິ່ງໄດ້ຈັດຂຶ້ນໃນວັນທີ 9-10 ພຶດສະພາ 2016 ທີ່ກວາງໂຈ ສປ ຈີນ
ໂດຍກະຊວງການຕ່າງປະເທດ, ສະພາແຫ່ງລັດວ່າດ້ວຍຂ່າວສານ ແລະ ນະຄອນກວາງໂຈ
ເພື່ອປຶກສາຫາລື, ລະດົມ ແລະ ແລກປ່ຽນຄຳຄິດຄຳເຫັນຂອງບັນດານັກຂ່າວ, ນັກຄົ້ນຄວ້າ, ໜ່ວຍງານຄັງສະໜອງ ແລະ ວິຊາການດ້ານສື່ມວນຊົນຈາກທະ ວີບອາຊີ-ເອີຣົບ
ເພື່ອຊຸກຍູ້ ແລະ ຜັນຂະຫຍາຍບົດບາດຂອງສື່ມວນຊົນດ້ານການເຊື່ອມຈອດອາເຊັມໃນຍຸກນະວັດຕະກຳເຕັກໂນໂລຊີ
ແລະ ການໂຄສະນາເຜີຍແຜ່ຄວາມເຂົ້າໃຈກ່ຽວກັບການເປັນຄູ່ຮ່ວມມືຮອບດ້ານຂອງອາເຊັມ.
ໃນກອງປະຊຸມດັ່ງກ່າວ, ຫົວໜ້າເຈົ້າໜ້າທີ່ອາວຸໂສອາເຊັມລາວ ໄດ້ປະກອບຄຳເຫັນໃນວາລະຄົບຄະນະ (Plenary session: ASEM Connectivity Today and
Tomorrow) ກ່ຽວກັບບົດບາດຄວາມສຳຄັນຂອງການເຊື່ອມຈອດໃນການສົ່ງເສີມການຮ່ວມມືເສດຖະກິດ ແລະ ການພັດທະນາແບບຍືນຍົງ, ບົດບາດຂອງສື່ມວນຊົນໃນການຮ່ວມມືລະຫວ່າງສອງທະວີບດ້ານການເຊື່ອມຈອດ ແລະ ການສົ່ງເສີມຄວາມເຂັ້ມແຂງການຮ່ວມມືຂອງອາເຊັມທີ່ມີໝາກຜົນຕົວຈິງໃນອະນາ ຄົດ ໂດຍຜ່ານບັນດາແຜນງານ ແລະ ຂໍ້ລິເລີ່ມດ້ານການເຊື່ອມຈອດທີ່ມີປະສິດທິພາບຂອງສອງພາກພື້ນອາຊີ-ເອີຣົບ.
ພ້ອມດຽວກັນນັ້ນ ຕາງໜ້າຈາກຂະແໜງການສື່ມວນຊົນຂອງລາວກໍໄດ້ປະກອບຄຳເຫັນປຶກສາຫາລືໃນວາລະທີ 1 ກ່ຽວກັບບົດບາດ ແລະ ຄວາມສຳຄັນຂອງສື່ມວນຊົນຕໍ່ພາກເອກະຊົນ.
ນອກຈາກນີ້, ທ່ານຫົວໜ້າເຈົ້າໜ້າທີ່ອາວຸໂສອາເຊັມ ສປປ
ລາວ ໄດ້ພົບປະສອງຝ່າຍກັບເຈົ້າໜ້າທີ່ອາວຸໂສອາເຊັມ ສປ
ຈີນ ແລະ ປາກິດສະຖານ ເພື່ອປຶກສາຫາລືບັນຫາຕ່າງໆທີ່ກ່ຽວຂ້ອງກັບການກະກຽມເນື້ອໃນສຳລັບກອງປະຊຸມສຸດຍອດອາເຊັມຄັ້ງທີ 11 ເຊິ່ງຈະຈັດຂຶ້ນໃນເດືອນກໍລະກົດ 2016 ນີ້.
ຜົນສຳເລັດຂອງກອງປະຊຸມປຶກສາຫາລືສື່ມວນຊົນດັ່ງກ່າວແມ່ນຂໍ້ລິເລີ່ມໃນການກຳນົດວິໄສທັດ ແລະ ທິດທາງດ້ານການຮ່ວມມືສື່ມວນຊົນອາເຊັມ ວ່າດ້ວຍການເຊື່ອມຈອດ ເພື່ອປະກອບສ່ວນໃຫ້ການສະເຫລີມສະຫລອງການສ້າງຕັ້ງອາເຊັມຄົບຮອບ 20 ປີ
ແລະ ນຳໄປລາຍງານຮັບຮອງເອົາໃນກອງປະຊຸມເຈົ້າໜ້າທີ່ອາວຸໂສອາເຊັມ ທີ່ມົງໂກລີ.
No comments:
Post a Comment