ແຕ່ວັນທີ
9-11 ພຶດສະພານີ້, ທີ່ຫໍວັດທະນະທໍາແຫ່ງຊາດ, ພະນັກງານຫລັກແຫລ່ງທົ່ວກະ
ຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ)
ໄດ້ເຂົ້າຮ່ວມຮັບຟັງເຊື່ອມຊຶມມະຕິກອງປະຊຸມໃຫຍ່ຄັ້ງທີ X ຂອງພັກເປັນຕົ້ນ: ເອກະສານຜົນສໍາເລັດການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ
IX ຂອງພັກ, ບັນດາຄາດໝາຍກອງປະຊຸມໃຫຍ່ຄັ້ງທີ X ຂອງພັກວາງອອກແຕ່ລະໄລຍະຮອດປີ 2030, 2025, 2020 ແລະ
ເຜີຍແຜ່ເອກະສານວຽກງານຈຸດສຸມໃນແຕ່ລະຂົງເຂດເພື່ອຈັດຕັ້ງປະຕິະບັດໃນ
5 ປີຕໍ່ໜ້າແຕ່ 2016-2020.
ເປັນກຽດເຜີຍແຜ່ໂດຍສະຫາຍ ບໍ່ແສງຄໍາ ວົງດາລາ
ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ເຊິ່ງສະຫາຍຕີລາຄາຄືນ ແລະ
ໄດ້ຍົກໃຫ້ເຫັນຜົນສໍາເລັດແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກຕະຫລອດໄລຍະ 5 ປີຜ່ານມາໃນແຕ່ລະທຸກຂົງເຂດວຽກງານ
ເຊິ່ງໄດ້ສອດຫ້ອຍເຂົ້າກັບທຸກວຽກງານຕິດພັນກັບວຽກງານກໍ່ສ້າງຮາກຖານການເມືອງ ແລະ
ພັດທະນາຊົນນະບົດຮອບດ້ານ,
ສ້າງລະບົບການເມືອງປະຊາທິປະໄຕປະຊາຊົນລາວ ໃຫ້ມີຄວາມເຂັ້ມແຂງແຕ່ຮາກຖານຂຶ້ນມາ, ເສດຖະກິດແຫ່ງຊາດໄດ້ຮັບການຂະຫຍາຍຕົວດ້ວຍຈັງຫວະໄວ, ຕໍ່ເນື່ອງ ແລະ
ດໍາເນີນໄປຢ່າງຖືກທິດໂດຍສະເລ່ຍ 5 ປີ ບັນລຸໃນລະດັບ 7,9%, ລາຍໄດ້ສະເລ່ຍຕໍ່ຫົວຄົນ 15 ລ້ານກວ່າກີບ. ໃນນີ້ສິ່ງສໍາຄັນພວກເຮົາສາມາດບຸກທະລຸການແກ້ໄຂຄວາມທຸກຍາກຂອງປະຊາຊົນ ດ້ວຍການລົບລ້າງຄອບຄົວທຸກຍາກໃຫ້ຍັງເຫລືອພຽງ
6,7% ແລະ ໄວກວ່າເປົ້າໝາຍວາງໄວ້, ການຜະລິດກະສິກໍາ ແລະ ອຸດສາຫະກໍາຂະຫຍາຍຕົວຂຶ້ນຕາມລໍາດັບ ແລະ ອື່ນໆ;
ຄຽງຄູ່ກັນນີ້ ຂົງເຂດວັດ ທະນະທໍາ-ສັງຄົມ
ແລະ ສາທາລະນະສຸກ
ໄດ້ຮັບການຂະຫຍາຍຕົວທັງດ້ານປະລິ ມານ ແລະ ຄຸນນະພາບ ອັນພົ້ນເດັ່ນແມ່ນ ມີການຫັນປ່ຽນຢ່າງຈະແຈ້ງໃນການປະຕິບັດເປົ້າໝາຍສະຫັດສະວັດດ້ານການພັດທະນາ.
ສະຫາຍ ບໍ່ແສງຄໍາ ວົງດາລາ ກ່າວຕື່ມວ່າ: ບັນດາຜົນງານອັນພົ້ນເດັ່ນທີ່ຍາດມາໄດ້ໃນທຸກຂົງເຂດວຽກງານໄດ້ສ້າງພື້ນຖານ ແລະ ທ່ວງທ່າໃໝ່ໃຫ້ແກ່ການສືບຕໍ່ຂະຫຍາຍຕົວຂອງປະເທດຊາດຕາມທິດທາງ ແລະ ຈຸດໝາຍທີ່ວາງໄວ້. ໃນນັ້ນມະຕິກອງປະຊຸມໃຫຍ່ຄັ້ງທີ X ກໍໄດ້ວາງທິດທາງກ່ຽວກັບວິໄສທັດຮອດປີ
2030, ຍຸດທະສາດການພັດທະນາເສດຖະກິດ-ສັງ ຄົມໃນໄລຍະ 10 ປີ
(2016-2025) ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII
(2016-2020) ເຊິ່ງຄຳຂວັນວິໄສທັດ ແລະ ຍຸດທະສາດຂອງການພັດທະນາແມ່ນ: ສູ້ຊົນພັດທະນາປະເທດເຮົາໃຫ້ຫລຸດພົ້ນອອກຈາກສະຖານະພາບດ້ອຍພັດທະນາໃນປີ
2020, ກ້າວໄປສູ່ປະເທດກຳລັງພັດທະນາມີລາຍຮັບປານກາງສູງຕາມທິດການພັດທະນາສີຂຽວ ແລະ ຍືນຍົງເມື່ອເຖິງປີ 2030.
No comments:
Post a Comment