ສຳມະນາຄວາມຮູ້ດ້ານການນຳໃຊ້ລະບົບໃຫ້ຄຳປຶກສາທາງດ້ານທຸລະກິດຂອງອາຊຽນ (ASSIST)

          ໃນວັນທີ 27-28 ມີຖຸນານີ້, ກົມນະໂຍບາຍການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ, ຮ່ວມກັບພາກສ່ວນກ່ຽວຂ້ອງຈັດສຳມະນາການຮຽນຮູ້ວິທີນຳໃຊ້ລະບົບໃຫ້ຄຳປຶກສາດ້ານສິນຄ້າ, ດ້ານບໍລິການ ແລະ ການລົງທຶນອາຊຽນ (ASEAN Solutions for Investments, Services and Trade (ASSIST) ເພື່ອສົ່ງເສີມໃຫ້ພາກສ່ວນທຸລະກິດໄດ້ມີຄວາມເຂົ້າໃຈ ແລະ ສາມາດນຳໃຊ້ລະບົບ ASSIST, ໂດຍການຂຽນຄຳຮ້ອງຂໍຄຳປຶກສາເຂົ້າໄປໃນລະບົບດັ່ງກ່າວ ຫລັງຈາກນັ້ນ ກໍຈະມີຜູ້ຊ່ຽວຊານໃຫ້ຄຳຕອບ ແລະ ແກ້ໄຂບັນຫາທຸລະກິດຂອງທ່ານໄດ້ຢ່າງມີປະສິດທິຜົນ, ພ້ອມນີ້ ຍັງເປັນການຮຽນຮູ້ວິທີນຳໃຊ້ລະບົບດັ່ງກ່າວ ເພື່ອນຳໃຊ້ເປັນເຄື່ອງມືໃນການແກ້ໄຂບັນຫາ

ຕ່າງໆທີ່ເກີດຂຶ້ນທ່າມກາງການດຳເນີນທຸລະ ກິດລະຫວ່າງປະເທດສະມາຊິກອາຊຽນດ້ວຍກັນ, ຊຶ່ງກ່ຽວພັນກັບການຈັດຕັ້ງປະຕິບັດຂໍ້ຕົກ ລົງທາງເສດຖະກິດຂອງອາຊຽນ ແລະ ການສ້າງປະຊາຄົມເສດຖະກິດອາຊຽນ ທີ່ໄດ້ລິເລີ່ມ ໃນທ້າຍປີ 2015ຜ່ານມາ, ທັງຮຽນຮູ້ການເຂົ້າເຖິງຖານຂໍ້ມູນດ້ານການຄ້າອາຊຽນ ແລະ ແລກປ່ຽນບົດຮຽນຕົວຈິງກັບຊ່ຽວຊານຜູ້ສ້າງລະບົບເພື່ອນຳມາໝູນໃຊ້ເຂົ້າໃນວຽກງານ ຕົວຈິງຂອງຕົນໃຫ້ເກີດປະໂຫຍດສູງສຸດ, ຊຶ່ງລະບົບດັ່ງກ່າວ ແມ່ນມີແຜນຈະເປີດນຳໃຊ້ຢ່າງເປັນທາງການໃນກອງປະຊຸມລັດຖະມົນຕີຕ່າງປະເທດອາຊຽນ ທີ່ສປປ ລາວເປັນເຈົ້າພາບໃນຕົ້ນເດືອນສິງຫານີ້.