ງານວາງສະແດງຍານຍົນນານາຊາດວຽງຈັນ 2016 ຈະຈັດຂຶ້ນທ້າຍເດືອນກັນຍານີ້

          ກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ ຮ່ວມກັບ ບໍລິສັດພີພີ ໄຊໂຍ ຈຳກັດ, ບໍລິສັດ ກູຣູ ແລະ ບໍລິສັດລາວເວີນ, ກຽມຈັດງານວາງສະແດງຍານຍົນນານາຊາດວຽງ ຈັນ 2016, ໃນລະຫວ່າງວັນທີ 30 ກັນຍາ ຫາ 6 ຕຸລາ 2016 ຢູ່ສູນການຄ້າລາວ-ໄອເຕັກ ນະ ຄອນຫລວງວຽງຈັນ, ຊຶ່ງໃນວັນທີ 20 ກໍລະກົດຜ່ານມານີ້, ໄດ້ມີການຖະແຫລງຂ່າວກ່ຽວກັບຄວາມພ້ອມໃນການຈັດງານດັ່ງ ກ່າວ, ໂດຍມີທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ ແລະ ມີຜູ້ຕາງໜ້າຈາກບໍລິສັດ ແລະ ຫ້າງຮ້ານທີ່ໃຫ້ການສະໜັບສະ ໜູນເຂົ້າຮ່ວມເປັນຈຳນວນຫລາຍ.

          ງານດັ່ງກ່າວຈັດຂຶ້ນພາຍໃນແນວຄິດ “ນະວັດຕະກຳພະລັງບໍ່ສິ້ນສຸດ ສູ່ລະດັບໂລກ”  ເຊິ່ງຈະໄດ້ນຳເອົາລົດໃຫຍ່ (ປະເພດ ລົດເກັງ, ລົດສະປອດ) ແລະ ລົດຈັກຂະໜາດໃຫຍ່ ທີມີຄວາມທັນສະໄໝ ແລະ ອຸປະກອນຕ່າງໆ ມາວາງສະແດງ ເພື່ອໃຫ້ມວນຊົນທັງພາຍໃນ ແລະ ຕ່າງປະເທດ ເຂົ້າມາເບິ່ງ, ຊົມ ແລະ ເລືອກຊື້ ໄດ້ຢ່າງສະດວກສະບາຍ ເຊິ່ງຈະມີຜູ້ປະກອບການ ທັງພາກລັດ-ເອກະຊົນ, ຫ້າງຮ້ານ, ບໍລິສັດ ແລະ ຄ້າຍລົດ ຕ່າງໆ ທີ່ມີຊື່ສຽງໃນ ສປປ ລາວ ນຳເອົາລົດ ແລະ ອຸປະກອນຕ່າງໆເຂົ້າມາວາງສະແດງ. ນອກນັ້ນ, ພາຍໃນງານ ຍັງຈະມີຫລາກຫລາຍກິດຈະກຳ ທີ່ໜ້າຕື່ນຕາຕື່ນໃຈ ເປັນຕົ້ນ ຈະມີການໂຊລົດ (Driftshow) ແລະ ຈິດຈະກຳອື່ນໆ ທີ່ໜ້າສົນໃຈ. ພ້ອມນັ້ນ ຍັງຈະມີ ນັກຮ້ອງ, ນັກສະແດງທີ່ມີຊື່ສຽງ ໃນ ສປປ ລາວ ມາເຂົ້າຮ່ວມສະແດງ, ສ້າງຄວາມມ່ວນຊື່ນ ໃນແຕ່ລະວັນອີກດ້ວຍ.

          ການຈັດງານດັ່ງກ່າວ, ເປັນບາດກ້າວໜຶ່ງຂອງວົງການລົດ ໃນ ສປປ ລາວ ທີ່ຈະກ້າວເຂົ້າສູ່ສາກົນ ທັງເປັນການຕ້ອນຮັບທີ່ ສປປ ລາວ ກ້າວເຂົ້າສູ່ປະຊາຄົມເສດຖະກິດອາຊຽນ, ພ້ອມນັ້ນກໍເພື່ອເປັນການກະຕຸ້ນເສດຖະກິດຂອງລາວ ກໍຄືເສດຖະກິດຂອງຊາດ ໃຫ້ໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ ແນໃສ່ເຮັດໃຫ້ປະເທດຊາດຫລຸດພົ້ນອອກຈາກປະເທດດ້ອຍພັດທະ ນາໃນປີ 2020 ຕາມຄາດໝາຍວາງໄວ້.