ສໍານັກຂ່າວສານປະເທດລາວ ແລະ ຊິນຮວາ ເພີ່ມທະວີການຮ່ວມມືສອງຝ່າຍ

           ໃນໂອກາດພົບປະລະຫວ່າງທ່ານ ສູນທອນ ຄັນທະວົງ ອໍານວຍການສໍານັກຂ່າວສານປະເທດລາວ ແລະ ທ່ານ ຈາງ ຈ້ຽນ ຫົວ ທີ່ມາຮັບໜ້າທີ່ໃໝ່ເປັນຫົວໜ້າສໍານັກຂ່າວສານຊີນຮວາ ແຫ່ງ ສປຈີນ ປະຈໍາລາວ ໃນວັນທີ 17 ສິງຫານີ້, ທີ່ສໍານັກຂ່າວສານປະເທດລາວ, ນະຄອນຫລວງວຽງຈັນ, ທັງສອງຝ່າຍໄດ້ຕີລາຄາສູງຕໍ່ໝາກຜົນຂອງການພົວພັນຮ່ວມມືທີ່ດີນໍາກັນຫລາຍດ້ານໃນໄລຍະຜ່ານມາ, ເຊິ່ງໄດ້ປະກອບສ່ວນເຂົ້າໃນການເພີ່ມທະວີສາຍພົວພັນມິດຕະພາບ ແລະ ການຮ່ວມມືທີ່ມີມາແຕ່ດົນນານລະຫວ່າງປະຊາຊົນສອງຊາດລາວ-ຈີນ ໃຫ້ນັບມື້ແໜ້ນແຟ້ນຍິ່ງໆຂຶ້ນ, ພ້ອມທັງຢືນຢັນສືບຕໍ່ເພີ່ມທະວີການຮ່ວມມືເຊິ່ງກັນ ແລະ ກັນໃນການແລກປ່ຽນດ້ານຂໍ້ມູນຂ່າວສານ ແລະ ຍົກລະດັບວິຊາການໃຫ້ແກ່

ພະນັກງານມີການພັດທະນາດີຂຶ້ນ, ເພື່ອໃຫ້ສາມາດນໍາເອົາແນວທາງນະໂຍບາຍອັນຖືກ ຕ້ອງຂອງພັກ ແລະ ລັດຖະບານສອງປະເທດ ກໍຄືການນໍາເອົາຂໍ້ມູນຂ່າວສານກ່ຽວກັບສະພາບການພັດທະນາເສດຖະກິດ, ວັດທະນາທໍາ ແລະ ສັງຄົມຕ່າງໆ ໄປໂຄສະນາເຜີຍແຜ່ໃຫ້ປະຊາຊົນສອງປະ ເທດໄດ້ຮັບຮູ້ຢ່າງວ່ອງໄວ ແລະ ມີຄວາມເຂົ້າໃຈຫລາຍຂຶ້ນ, ທັງປະກອບສ່ວນເຂົ້າໃນການຊຸກຍູ້ສົ່ງເສີມວຽກງານທາງດ້ານການຄ້າ, ການລົງທຶນ, ການທ່ອງທ່ຽວ ແລະ ການໄປມາຫາສູ່ເຊິ່ງກັນ ແລະ ກັນລະຫວ່າງປະຊາຊົນສອງປະເທດໃຫ້ນັບມື້ຫລາຍຂຶ້ນ.