#
ວິເສດ ສະແຫວງສຶກສາ
ເຫລົ່າທັບນັກຫລິ້ນເກມທາງອອນລາຍຄົງມີໂອກາດໄດ້ຕິດຕາມເກມຫລິ້ນໃໝ່ໄຟແຮງທີ່ມີຊື່ວ່າ Pokemon-Go (ປອກເກມອນ-ໂກ) ເຊິ່ງເລີ່ມລະບາດໄປໄວກວ່າໄຟໄໝ້ປ່າ. ຜູ້ຂຽນເອງກັບເລື່ອງເກມນີ້ຢູ່ກັນຄົນລະໂລກ ເພາະບໍ່ມີພອນສະຫວັນດ້ານນີ້ ແລະ ບໍ່ມີເວລາໃຫ້ມັນ ແຕ່ກໍຮັບຮູ້ວ່າເກມຫລິ້ນຫລາຍປະເພດກໍຊ່ວຍຜ່ອນຄາຍອາລົມໃຫ້ຄວາມເພີດເພີນຈະເລີນໃຈ,
ເກມບາງປະເພດມີເປົ້າໝາຍເພີ່ມຄວາມສະຫລາດ, ຊ່ວຍໃຫ້ມີສະມາທິ. ແຕ່ກໍມີຫລາຍເກມຫລິ້ນມີເປົ້າໝາຍເຮັດໃຫ້ຄົນເສບຕິດ, ສ້າງຄວາມປັ່ນປ່ວນທາງອາລົມ ແລະ ອື່ນໆ. ນອກນັ້ນກໍຍັງມີເກມລາມົກ (Adult game). ສຳລັບ
Pokemon-Go ນີ້ ວ່າກັນວ່າເປັນເກມລ້ຳຍຸກ, ເປັນເກມທີ່ຍ່າງກັບຍ່າງເພື່ອໄລ່ຈັບໂຕກະຕູນເປັນຮູບສັດຮູບຄົນທີ່ຜູ້ຜະລິດສ້າງຂຶ້ນ ແລະ ປ່ອຍໄວ້ຕາມສະຖານທີ່ຕ່າງໆ. ຫາງສຽງຕອບຮັບເກມນີ້ມີຫລາຍ ແລະ ຫາງສຽງກັງວົນກໍມີພໍໆກັນ ເຊັ່ນກັງວົນເລື່ອງບັນຫາອຸປະຕິເຫດ ເພາະເກມນີ້ຜູ້ຫລິ້ນທັງຍ່າງທັງກົ້ມເບິ່ງໜ້າຈໍມືຖື
ເພື່ອໃຫ້ທັນໄລ່ຈັບໂຕ Pokemon ຄວາມເປັນຫ່ວງອີກອັນໜຶ່ງ ກໍຄືເລື່ອງການລະເມີດ
ສະຖານທີ່ສະຫງວນ ຫລື
ຕ້ອງຫ້າມ, ການລະເມີດຄວາມເປັນສ່ວນຕົວຂອງຄົນອື່ນ. ເກມນີ້ຈະຄືບໜ້າໄປແນວໃດນັ້ນ ຂໍໃຫ້ທ່ານຜູ້ອ່ານຕິດຕາມເອົາເອງ ເພາະຍັງເປັນບາດກ້າວຫົວທີຂອງການຫລິ້ນເກມຊະນິດນີ້. ເລື່ອງທີ່ຢາກແລກປ່ຽນກັບທ່ານຜູ້ອ່ານກ່ຽວກັບບັນຫາມືຖືອະເນກປະສົງ ຫລື
Smart Phone (ບາງຄົນອອກສຽງວ່າ ສາມາດໂຟນ ເພາະມັນມີຄວາມສາມາດຫລາຍດ້ານ) ປະຈຳວັນນີ້ ກໍຄືການໃຊ້ໂທລະສັບມືຖືຖ່າຍຮູບເອົາໂຕເອງທີ່ເອີ້ນເປັນພາສາອັງກິດວ່າ “ເຊວຟີ” (Selfie). ຖ່າຍເຊວຟີນີ້ງ່າຍດາຍ, ບໍ່ຈຳເປັນໃຫ້ຜູ້ອື່ນຖ່າຍໃຫ້, ເຮົາພຽງແຕ່ວາງທ່າຕາມທີ່ມັກ, ເຍີງໂທລະສັບອອກ, ປິ່ນດ້ານໜ້າຂອງມັນມາຫາໂຕແລ້ວກົດກໍເປັນອັນເສັດສັບ. ການຖ່າຍຮູບແບບນີ້ຕ້ອງໄດ້ກະດືບໜ້າ ຫລື ຖອຍຫລັງ
ເພື່ອໃຫ້ໄດ້ວິວງາມ, ຈຸດນີ້ລະມັນອັນຕະລາຍ ເພາະສາຍຕາຜູ້ຖ່າຍນັ້ນຈັບຈ້ອງຢູ່ໜ້າຈໍ,
ບໍ່ມີໂອກາດເບິ່ງບາດຕີນ. ມີຂ່າວໃຫ້ຍິນເລື້ອຍໆວ່າ ກ່ຽວກັບອຸປະຕິເຫດທີ່ເກີດຂຶ້ນກັບຜູ້ຖ່າຍເຊວຟີ ເຊັ່ນສະດຸດລົ້ມ, ຕົກເຫວ ຫລື ຕຳຄົນອື່ນ. ໃນຕົ້ນເດືອນກໍລະກົດຜ່ານມາ
ໄດ້ມີເລື່ອງເສົ້າເກີດຂຶ້ນກັບຜູ້ຖ່າຍເຊວຟີຢູ່ອິນໂດເນເຊຍ. ຜູ້ເຄາະຮ້າຍສອງຄົນທີ່ຖືກຄື້ນທະເລພັດຫາຍສາບສູນໄປນັ້ນ ຊື່ທ້າວ ອາຣິດ
(Aris) ແລະ ທ້າວ
ອິມເມ (Imam) ທັງສອງທ່ຽວຕາກອາກາດຢູ່ແຄມທະເລ
ທີ່ເກາະຈາວາຕາເວັນອອກ. ໃນຂະນະທີ່ທັງສອງຖອຍຫລັງໄປເບື້ອງທະເລເພື່ອຖ່າຍເຊວຟີຢູ່ນັ້ນ ຄື້ນທະເລໄດ້ຍວກຍູ້ຂຶ້ນພັດເອົາທັງສອງຫາຍໄປກັບຟອງນ້ຳ. ໜັງສືພິມ ເດິເນເຊິນ (The
Nation) ທີ່ເຜີຍແຜ່ຂ່າວກ່ຽວກັບເຫດການນີ້ບອກວ່າ: ໜ່ວຍກູ້ໄພຍັງຊອກຫາສົບຂອງເຫຍື່ອເຊວຟີທັງສອງຢູ່. ຂ່າວນີ້ເປັນອຸທາຫອນບອກສອນໃຫ້ຜູ້ຖ່າຍເຊວຟີຕ້ອງມີສະຕິລະວັງໂຕສູງ. ກ່ອນຈະຖ່າຍຕ້ອງສັງເກດສະພາບແວດລ້ອມໂຕຄັກໆກ່ອນ. ມີຂ່າວເສົ້າຈຳນວນໜຶ່ງອີກທີ່ພົວພັນກັບການຖ່າຍເຊວຟີ ເຊິ່ງເກີດຂຶ້ນຢູ່ອິນເດຍດັ່ງຕໍ່ໄປນີ້: ໃນເດືອນກຸມພາປີນີ້, ເດັກໄວລຸ້ນຄົນໜຶ່ງຖືກລົດໄຟຢຽບຕາຍຕອນທີ່ເຂົາກຳລັງຖ່າຍເຊວຟີ, ກ່ອນໜ້ານັ້ນຄືໃນເດືອນມັງກອນປີນີ້, ຢູ່ແຄມຝັ່ງທະເລ
ເຂດນະຄອນຸມມບາຍ, ຊາຍຄົນໜຶ່ງຕາຍດຶກນ້ຳໃນຂະນະພະຍາຍາມຊ່ວຍເດັກຍິງຕົກນ້ຳຕອນຖ່າຍເຊວຟີ ແລະ ໃນເດືອນເມສາປີດຽວກັນນີ້, ຊາຍຄົນໜຶ່ງຖືກຊ້າງທຳຮ້າຍຮ່າງກາຍບາດເຈັບສາຫັດເວລາເຂົາພະຍາຍາມຖ່າຍເຊວຟີກັບຊ້າງໂຕນັ້ນ. ຕົວຢ່າງສໍ່ານີ້ຄິດວ່າພຽງພໍແລ້ວສຳລັບເດືອນສະຕິຜູ້ທີ່ຕິດຖ່າຍເຊວຟີປານຕິດຢາບ້າ.
No comments:
Post a Comment