#
ວິເສດ
ສະແຫວງສຶກສາ
ບັນຫາການຫລົບຫລີກພາສີ ກໍຄືການໂກງກິນຊັບສົມບັດຂອງລັດຂອງເຫລົ່ານັກທຸລະກິດຫົວໃສໃຈຄົດປານແຂນສອກນັ້ນໄດ້ເຮັດໃຫ້ທາງການຂອງຫລາຍປະເທດເຈັບຫົວ ຕ່າງແຕ່ວ່າເຈັບໜ້ອຍ ຫລື
ເຈັບຫລາຍອີງຕາມຜົນເສຍຫາຍທາງເສດຖະກິດ. ປາກົດການຫຍໍ້ທໍ້ດັ່ງກ່າວໄດ້ກາຍເປັນບັນຫາຂ້າມຊາດໄປແລ້ວ. ດັ່ງນັ້ນ ຈຶ່ງບໍ່ເປັນເລື່ອງແປກທີ່ຫລາຍໆປະເທດ ກໍຄືສະຖາບັນການເງິນສາກົນ ແລະ ພາກພື້ນໄດ້ຮ່ວມກຳລັງກັນຕໍ່ສູ້ຕ້ານການຫລົບຫລີກພາສີ, ປ້ອງກັນບໍ່ໃຫ້ຜູ້ກະທຳຜິດເລັດລອດໄປສະເຫວີຍສຸກຢູ່ນອກປະເທດ. ໃນບັນຫາຂໍ້ຕົກລົງດ້ານການຄ້າການລົງທຶນ ບໍ່ວ່າຈະເປັນລະດັບສອງຝ່າຍ ຫລື ຫລາຍຝ່າຍກໍລ້ວນແຕ່ໄດ້ກຳນົດມາດຕະການປ້ອງກັນບໍ່ໃຫ້ມີການເສຍພາສີຊ້ຳຊ້ອນ ແລະ ການຫລົບຫລີກພາສີ. ມາດຕະການຕ້ານການຫລົບຫລີກພາສີທີ່ມາແຮງແຊງໜ້າຂອງຫລາຍໆປະເທດໃນມໍ່ໆນີ້ແມ່ນຂໍ້ກຳນົດໃໝ່ຂອງອັງກິດ ວ່າດ້ວຍການປັບໄໝຜູ້ທີ່ໜີ ຫລື
ຫລົບຫລີກພັນທະເສຍພາສີ ເຊິ່ງອາດຈະສູງເຖິງ 200% ຂອງເງິນພາສີທີ່ບໍ່ໄດ້ແຈ້ງ ຫລື
ເງິນທີ່ຄ້າງຈ່າຍພາສີ.
ເປົ້າໝາຍຫລັກໆໃນການປັບໄໝແມ່ນຜູ້ໜີພາສີລະດັບເຈົ້າພໍ່ທີ່ກອບໂກຍເງິນເປື້ອນໄປຝາກກິນຂີ້ດອກຢູ່ຕ່າງປະເທດ. ມາດຕະການປັບໄໝໃນມູນຄ່າສູງຈຸເມກຂອງລັດຖະບານອັງກິດພາຍໃຕ້ການນຳຂອງນາຍົກຍິງ ເມເຕເຣຊາ ນີ້ຊີ້ໃຫ້ເຫັນວ່າ: ໃນມືອ່ອນໆຂອງຜູ້ນຳເພດຍິງນັ້ນມີຄ້ອນແກ່ນໆສຳລັບໄວ້ໂມ່ງໃສ່ຄົນກະທຳຜິດ. ຂໍ້ກຳນົດການປັບໄໝໃໝ່ນີ້ຄາດວ່າຈະນຳໃຊ້ຫລັງເດືອນກັນຍາປີ
2018. ແຕ່ນີ້ຮອດເວລານັ້ນ, ຜູ້ທີ່ຢູ່ໃນບັນຊີໜີພາສີຕ້ອງພິສູດຄວາມໂປ່ງໃສຂອງຕົນ ໂດຍການເປີດເຜີຍຂໍ້ມູນກ່ຽວກັບພັນທະເສຍພາສີຂອງຕົນຕໍ່ອົງການພາສີ ແລະ ດ່ານພາສີອາກອນ. ໃນການປະຕິບັດຂໍ້ກຳນົດໃໝ່, ທາງການອັງກິດຈະໃຫ້ສິດຫລາຍຂຶ້ນແກ່ບັນດາອົງການກວດສອບພາສີຂອງລັດຖະບານ. ຜູ້ “ຕິດໜີ້” ພາສີຢູ່ອັງກິດນອກຈາກຈະຖືກປັບໄໝໜັກແລ້ວ ຍັງຈະຖືກເປີດໂປ່ງຊື່ໃຫ້ທົ່ວສັງຄົມຊາບ ເອີ້ນວ່າ Name and
Shame (ເຜີຍແບຊື່ເພື່ອຂາຍຂີ້ໜ້າ). ຢູ່ມຽນມາ, ໜັງສືພິມ ເດິເນເຊິນ (The Nation) ສະບັບວັນທີ
22 ເດືອນສິງຫາຜ່ານມາ ກໍໄດ້ສະເໜີຂ່າວກ່ຽວກັບຂໍ້ສະເໜີຂອງສະມາຊິກລັດຖະສະພາທ່ານໜຶ່ງຊື່ ເຢ ຮະຕັດ (Ye Htut) ໃຫ້ລັດຖະສະພາຮີບຮ້ອນກວດສອບເຫລົ່າເສດຖີ ແລະ ຜູ້ນຳດ້ານທຸລະກິດທີ່ຫລົບຫລີກພັນທະເສຍພາສີ ຫລື ເສຍຫລຸດອັດຕາທີ່ຕ້ອງເສຍ. ຜູ້ແທນປາກກ້າເວົ້າແຂງທ່ານນີ້ບອກວ່າ: ການເສຍພາສີນັ້ນຈະຕ້ອງບໍ່ເປັນພັນທະທີ່ເຫລືອບ່າກວ່າແຮງຂອງຜູ້ທຸກຍາກ. ພວກຄົນທຸກຕ້ອງໄດ້ຈ່າຍຄ່ານ້ຳ, ຄ່າໄຟ,
ຄ່າບໍລິການເກັບມ້ຽນຂີ້ເຫຍື້ອ, ເວລາໄປກິນດື່ມຢູ່ຮ້ານອາຫານພວກເຂົາກໍຕ້ອງໄດ້ເສຍພາສີທີ່ລວມໃນຄ່າອາຫານ. ທ່ານວ່າຖ້າສາມາດບັງຄັບໃຫ້ພວກເສດຖີ, ບັນດາຜູ້ນຳດ້ານທຸລະກິດໃຫ້ເສຍພາສີໄດ້, ມຽນມາກໍຈະຮັ່ງມີປານປະເທດກູເວດ ແລະ ດູໄບ.
ທ່ານ ເຢ ຮະຕັດ ວ່າ:
ລັດຖະບານມຽນມາຈະເກັບເງິນພາສີໄດ້ຫລາຍຂຶ້ນ ຖ້າສາມາດລະງັບການສົ່ງອອກຢົກແບບຜິດກົດໝາຍ ໂດຍບໍລິສັດ ຮະປາກັນ (Hpakant). ຢູ່ຟີລິບປິນ, ນອກຈາກແຜນຜະເດັດເສິກກັບຜູ້ຄ້າຂາຍຢາເສບຕິດແບບບໍ່ໄວ້ໜ້າແລ້ວ, ທ່ານປະທານາທິບໍດີ ດູເຕັກເຕ ຍັງໄດ້ປະກາດສະໜາມຮົບທີສອງຂຶ້ນ ເພື່ອຕ້ານພວກເສດຖີ ກໍຄືນັກທຸລະກິດທີ່ສ້າງຮັ່ງຄູນມີດ້ວຍການຫລົບຫລີກພັນທະເສຍພາສີ. ທ່ນເວົ້າແດກໜ້າພວກເສດຖີຫົວໃສໃຈຄົດດ້ວຍປະໂຫຍກເດັດໆວ່າ: “ພວກເຈົ້າພາກັນໂກງກິນລັດຖະບານ, ພວກເຈົ້າທຳລາຍປະຊາຊົນຟີລິບປິນ, ຂໍບອກວ່າການກະບົດແບບນີ້ຈະບໍ່ລອດສາຍຕາເຮົາໄປໄດ້ອີກ, ພວກເຈົ້າຕ້ອງເສຍພາສີ, ຖ້າບໍ່ເຮົາຈະເຊີນພວກທ່ານມາສອບປາກຄຳ, ຖ້າເຮົາຊິສັ່ງເຈົ້າໜ້າທີ່ຕຳຫລວດໄປຖາມຄຸງເຮືອນວ່າເປັນຫຍັງຈຶ່ງບໍ່ເສຍ ?”. ທ່ານ ດູເຕັກເຕ ເຄີຍອອກປາກວ່າ: ທ່ານຕ້ອງການມ້ຽນພວກເສດຖີໜີພາສີ ແລະ ອຳນາດບາດໃຫຍ່ຂອງພວກເຂົາເຈົ້າໃນປະເທດ ແລະ ໃນການຢຶດຄອງຄວາມຮັ່ງມີຊາດທັງໝົດ (ບົດຄວາມກ່ຽວກັບຟີລິບປິນນີ້ສາມາດອ່ານເພີ່ມໃນບົດໜັງສືພິມ The Nation ສະບັບວັນທີ
10 ສິງຫາ 2016 ທີ່ມີຫົວຂໍ້ວ່າ: Duterte declares another war on tax cheats).
No comments:
Post a Comment