ສະພາສະເໜີໃຫ້ລັດຖະບານຄຸ້ມຄອງບໍ່ແຮ່ຢ່າງເຂັ້ມງວດ

            ຄະນະປະຈຳສະພາແຫ່ງຊາດ ສະເໜີໃຫ້ລັດຖະບານເພີ່ມທະວີຄວາມເອົາໃຈໃສ່ຄຸ້ມຄອງບໍ່ແຮ່ຢ່າງເຂັ້ມງວດ, ພາຍຫລັງເຫັນວ່າມີຫລາຍໂຄງການບໍ່ແຮ່ເຄື່ອນໄຫວບໍ່ຖືກຕ້ອງລະບຽບກົດໝາຍ.

          ຄະນະປະຈຳດັ່ງກ່າວໃຫ້ຮູ້ວ່າ: ສປປ ລາວ ເປັນປະເທດທີ່ອຸດົມສົມບູນໄປດ້ວຍຊັບພະຍາກອນແຮ່ທາດທີ່ມີຄ່າ, ຂະນະດຽວກັນ ການລົງທຶນສຳຫລວດ ແລະ ຂຸດຄົ້ນແຮ່ທາດຢູ່ລາວແມ່ນພວມໄດ້ຮັບຄວາມສົນໃຈຈາກນັກລົງທຶນທັງພາຍໃນ ແລະ ຕ່າງປະເທດຢ່າງກວ້າງຂວາງ, ເປັນຕົ້ນ: ໂຄງການຂຸດຄົ້ນແຮ່ຄຳ-ທອງເຊໂປນ, ໂຄງການພູເບ້ຍ
ມາຍນິງ, ໂຮງໄຟຟ້າຖ່ານຫີນຫົງສາລິກໄນ ແລະ ໂຄງ ການອື່ນໆທີ່ມີການເຄື່ອນໄຫວຖືກຕ້ອງຕາມລະບຽບກົດໝາຍ ແລະ ມີປະສິດທິຜົນ, ອັນໄດ້ປະກອບ ສ່ວນເຮັດໃຫ້

ເສດຖະກິດຂອງຊາດຂະຫຍາຍຕົວຕໍ່ເນື່ອງ ທັງປະກອບສ່ວນສ້າງວຽກເຮັດງານທຳໃຫ້ປະຊາຊົນທ້ອງຖິ່ນ ເພື່ອໃຫ້ຊີວິດການເປັນຢູ່ຂອງເຂົາເຈົ້າດີຂຶ້ນເທື່ອລະກ້າວ. ແຕ່ຄຽງຄູ່ກັນນັ້ນ ກໍສັງເກດເຫັນວ່າຍັງມີຫລາຍໂຄງການບໍ່ປະຕິບັດໄດ້ຕາມຂັ້ນຕອນຂອງລະບຽບກົດໝາຍກຳນົດໄວ້, ຕາມການລາຍງານຈາກຂະແໜງກ່ຽວຂ້ອງໃນການອະນຸມັດໃຫ້ຊອກຄົ້ນສຳຫລວດແຮ່ທາດຢູ່ລາວເຮົາມີຫລາຍກວ່າ 200 ໂຄງການ ແຕ່ມີພຽງ 3 ໂຄງການເທົ່ານັ້ນທີ່ເຄື່ອນໄຫວປະຕິບັດຖືກຕ້ອງຕາມກົດໝາຍກຳນົດໄວ້. ນອກນັ້ນມີບາງໂຄງການອະນຸມັດບໍ່ຖືກຕ້ອງຕາມຫລັກການ, ມີການສວຍໃຊ້ໃບອະນຸຍາດຈາກຂະແໜງການໜຶ່ງໄປດຳເນີນທຸລະກິດໃນອີກຂະແໜງໜຶ່ງ. ດັ່ງກໍລະນີຢູ່ແຂວງວຽງຈັນ. ນອກຈາກນີ້ ເຖິງວ່າໄດ້ມີຄຳສັ່ງຂອງນາຍົກລັດຖະມົນຕີວ່າດ້ວຍການໂຈະພິຈາລະນາ ແລະ ອະນຸມັດໂຄງການລົງທຶນໃໝ່ສຳລັບການຊອກຄົ້ນ, ສຳຫລວດແຮ່ທາດ ລວມທັງການຂຸດຄົ້ນຄຳຕົກຂ້ອນຕາມແມ່ນ້ຳລຳເຊຕ່າງໆແລ້ວກໍຕາມ, ແຕ່ກໍປາກົດຍັງມີສະພາບການລະເມີດບຸກລຸກເຂົ້າໄປລັກຂຸດຄົ້ນແຮ່ຄຳຕົກຂ້ອນຂອງປະຊາຊົນໃນຫລາຍເຂດ, ໂດຍການນຳໃຊ້ສານເຄມີອັນຕະລາຍສະກັດເອົາແຮ່ຄຳ ໂດຍສະເພາະຢູ່ເຂດເມືອງແມດ, ຊະນະຄາມ ແຂວງວຽງຈັນ, ຊຽງຂວາງ ແລະ ແຂວງອື່ນໆ ອັນໄດ້ສົ່ງຜົນກະທົບບໍ່ດີຕໍ່ສິ່ງແວດລ້ອມ, ສັງຄົມ ແລະ ທຳມະຊາດຢ່າງຮ້າຍແຮງ ແລະ ສາເຫດທີ່ພາໃຫ້ສະພາບດັ່ງກ່າວແຜ່ຫລາຍນັ້ນກໍເປັນຍ້ອນການປະຕິບັດບັນດານິຕິກຳທີ່ກ່ຽວຂ້ອງຕ່າງໆຍັງບໍ່ທັນໄດ້ດີ ແລະ ເຂັ້ມງວດ, ການສະໜອງ ແລະ ເຜີຍແຜ່ຂໍ້ມູນຂ່າວສານການນຳໃຊ້ສານເຄມີອັນຕະລາຍຕ່າງໆຍັງບໍ່ທັນຫລາກຫລາຍ ແລະ ກວ້າງຂວາງ, ບາງລະບຽບ, ຫລັກການຍັງກຳນົດບໍ່ທັນຈະແຈ້ງ ເພື່ອເປັນບ່ອນອີງໃນການຈັດຕັ້ງປະຕິບັດ ແລະ ຕິດຕາມກວດກາ, ການແບ່ງຄວາມຮັບຜິດຊອບ ແລະ ກົນໄກການປະສານງານລະຫວ່າງສູນກາງ ແລະ ທ້ອງຖິ່ນຍັງບໍ່ຊັດເຈນ. ສະນັ້ນ ເພື່ອຮັບປະກັນໃຫ້ເສດຖະກິດແຫ່ງຊາດສືບຕໍ່ຂະຫຍາຍຕົວຕໍ່ເນື່ອງ, ໝັ້ນທ່ຽງ ເຮັດໃຫ້ຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຮັບການປົກປັກຮັກສາ ແລະ ນຳໃຊ້ຢ່າງມີປະສິດທິຜົນຕາມທິດສີຂຽວ ແລະ ຍືນຍົງ, ທັງນຳພາປະຊາຊົນໃຫ້ຫລຸດພົ້ນອອກຈາກຄວາມທຸກຍາກ, ສາມາດເຊື່ອມໂຍງກັບພາກພື້ນ ແລະ ສາກົນ ຈຶ່ງສະເໜີໃຫ້ລັດຖະບານເອົາໃຈໃສ່ຈັດຕັ້ງປະຕິບັດບາງມາດຕະການຕົ້ນຕໍ ຄືໃຫ້ກວດຄືນບັນດາກົດໝາຍ ແລະ ນິຕິກຳລຸ່ມກົດໝາຍທີ່ກ່ຽວຂ້ອງກັບການຄຸ້ມຄອງວຽກງານແຮ່ທາດທີ່ເຫັນວ່າອັນໃດບໍ່ສອດຄ່ອງກັບສະພາບຄວາມເປັນຈິງໃນປັດຈຸບັນແມ່ນໃຫ້ປັບປຸງໂດຍໄວ, ກວດຄືນບັນດາສັນຍາຂອງໂຄງການຕ່າງໆທີ່ໄດ້ລົງນາມກັນແລ້ວ ອັນໃດຄວນໃຫ້ສືບຕໍ່, ອັນໃດຄວນໂຈະ, ລຶບລ້າງ ຫລື ຍຸບເລີກ, ຮີບຮ້ອນແກ້ໄຂຜົນກະທົບດ້ານຕ່າງໆທີ່ມີຕໍ່ປະຊາຊົນ ແລະ ສິ່ງແວດລ້ອມຕ່າງໆ, ພ້ອມທັງເພີ່ມທະວີຄວາມເຂັ້ມງວດໃນການຈັດຕັ້ງປະຕິບັດລະບຽບກົດໝາຍກ່ຽວກັບຜົນກະທົບຕໍ່ສິ່ງແວດ ລ້ອມ ແລະ ສັງຄົມທີ່ໄດ້ປະກາດໃຊ້ແລ້ວໃຫ້ເຄັ່ງຄັດ, ເອົາໃຈໃສ່ໂຄສະນາເຜີຍແຜ່ນິຕິກຳຕ່າງໆໃນການປ້ອງກັນ ແລະ ຄວາມອັນຕະລາຍຂອງສານເຄມີປະເພດຕ່າງໆໃຫ້ປະຊາຊົນ ແລະ ສັງຄົມຮັບຮູ້ຢ່າງກວ້າງຂວາງ, ກວດຄືນພາລະບົດບາດ, ການແບ່ງຄວາມຮັບຜິດຊອບລະຫວ່າງສູນກາງ ແລະ ທ້ອງຖິ່ນໃຫ້ມີຄວາມຊັດເຈນ, ຂາດຕົວ ແລະ ກຳນົດແຈ້ງວ່າອັນໃດຕ້ອງໄດ້ຜ່ານສະພາແຫ່ງຊາດ, ສະພາປະຊາຊົນຂັ້ນແຂວງ, ອັນໃດຕ້ອງຜ່ານລັດຖະບານ ແລະ ທ້ອງຖິ່ນຕ້ອງອະນຸຍາດຕາມລະບຽບກົດໝາຍ.