ໃນວັນທີ 9 ພະຈິກນີ້, ຢູ່ໂຮງແຮມແລນມາກ ນະຄອນຫລວງວຽງຈັນ, ທ່ານລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ທັນສະໄໝ ກົມມະສິດ ໄດ້ຖະແຫລງຕໍ່ສື່ມວນຊົນ ກ່ຽວກັບການຈັດງານວາງສະແດງລາວໄອຊີທີ
(LAO ICT EXPO) 2016 ຄັ້ງທຳອິດວ່າ: ງານດັ່ງກ່າວຈະຈັດຂຶ້ນແຕ່ວັນທີ
14-18 ທັນວາ 2016 ນີ້ຢູ່ຫໍປະຊຸມແຫ່ງຊາດ (ຫລັກ 6) ເຊິ່ງຈະມີພາກສ່ວນກ່ຽວຂ້ອງຈາກພາກລັດ, ເອກະຊົນ ແລະ ຜູ້ປະກອບການດ້ານໄອຊີທີ ທັງຢູ່ພາຍໃນ
ແລະ ຕ່າງປະເທດນຳເອົາຜົນງານ ແລະ ຜະລິດ ຕະພັນໄອຊີທີເຂົ້າຮ່ວມວາງສະແດງ ແລະ ຈຳໜ່າຍຫລາຍກວ່າ 120 ຫ້ອງ
ເປັນຕົ້ນການນຳສະເໜີວິໄສທັດສູ່ປະເທດອັດສະລິຍະ,
ຂໍ້ມູນທາງດ້ານແອບປຣີເຄຊັນ, ຄອມພິວເຕີ, ໂທລະສັບ, ເຕັກໂນໂລຊີອິນເຕີເນັດ, ອຸປະກອນໂທລະຄົມ, ນຳສະເໜີລະບົບຂາຍອອນລາຍ, ໄອຊີທີສຳລັບທຸລະກິດ, ການເງິນ, ທະນາຄານ, ເຕັກໂນໂລຊີດາວທຽມ ແລະ ອື່ນໆ.
ນອກຈາກນີ້ ຍັງມີການສຳມະນາໃນຫົວຂໍ້: ການເຕີບໃຫຍ່ຂອງທຸລະກິດທີ່ຖືກຊຸກຍູ້ໂດຍລະບົບຂໍ້ມູນຂ່າວສານ, ການແຂ່ງຂັນສ້າງແອບປຣີເຄຊັນ, ການແຂ່ງຂັນວາງແຜນສ້າງທຸລະກິດສຳລັບຜູ້ເລີ່ມຕົ້ນ, ປະກວດນາງແບບໄອຊີທີ
ແລະ ການສະແດງສິລະປະວັນນະຄະດີຕ່າງໆ.
ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ການຈັດງານດັ່ງກ່າວແມ່ນເພື່ອຊຸກຍູ້ສົ່ງເສີມໃຫ້ພາກລັດ, ເອກະຊົນ ລວມເຖິງຜູ້ປະກອບການດ້ານໄອຊີທີ
ແລະ ໂທລະຄົມມະນາຄົມໄດ້ມີໂອກາດນຳສະເໜີຜະລິດຕະພັນ, ການບໍລິການ ແລະ ນະວັດຕະກຳທາງດ້ານໄອຊີທີຂອງຕົນ ທັງເປັນເວທີແລກປ່ຽນຂໍ້ມູນຂ່າວສານ, ປະສົບການໃນການພັດທະນາວຽກງານໄອຊີທີໃຫ້ມີຄວາມກ້າວໜ້າ ແລະ ເຕີບໃຫຍ່ຂະຫຍາຍຕົວໄປເລື້ອຍໆ.
ງານດັ່ງກ່າວໄດ້ຮັບການຮ່ວມມື ແລະ ສະໜັບສະໜູນຈາກຫລາຍພາກສ່ວນ ເປັນຕົ້ນກະ ຊວງໄປສະນີ ໂທລະຄົມມະນາຄົມ ແລະ ການສື່ສານ, ກະຊວງວິທະຍາສາດ ແລະ ເຕັກໂນໂລຊີ,
ການເງິນ, ແຜນການ ແລະ ການລົງທຶນ, ທະນາຄານກາງ, ສູນສະຖິຕິແຫ່ງຊາດ, ສາທາລະນະສຸກ, ຊັບພະ ຍາກອນທຳມະຊາດ ແລະ ສິ່ງແວດລ້ອມ, ກະສິກຳ-ປ່າໄມ້, ສະມາຄົມໄອຊີທີລາວ, ບໍລິສັດຮົວເຫວີຍ, ລາວໂທລະຄົມ, ສະຕຣາໂທລະຄົມ, ອີທີແອລ
ແລະ ພາກສ່ວນອື່ນໆ. ດັ່ງນັ້ນ ຈຶ່ງຂໍເຊີນຊວນປະຊາຊົນບັນດາເຜົ່າ ກໍຄືຊາວນະຄອນຫລວງວຽງຈັນເຂົ້າຮ່ວມຊົມງານດັ່ງກ່າວໃຫ້ມີບັນຍາກາດຄຶກຄື້ນຍິ່ງຂຶ້ນ.
No comments:
Post a Comment