ຫົວເຫວີຍ ເລີ່ມດຳເນີນກິດຈະກຳ Seeds for the future ຢູ່ລາວ

  ຫົວເຫວີຍ ຮ່ວມກັບກະຊວງສຶກສາທິການ ແລະ ກິລາ ເພື່ອເລີ່ມຕົ້ນດຳເນີນກິດຈະກຳ Seeds for the future ຢູ່ປະເທດລາວ. Seeds for the future ເປັນໂຄງການພັດທະນາບຸກຄະລາກອນທາງດ້ານ IT ແລະ ໂທລະຄົມມະນາຄົມໃນທົ່ວໂລກ. ປັດຈຸບັນ ບໍລິສັດຮົວເວ້ ເຕັກໂນໂລຊີ ໄດ້ປະຕິບັດໂຄງການດັ່ງກ່າວໃນຫລາຍປະເທດເຊັ່ນ: ເຢຍລະມັນ, ຮົງກາລີ, ຝຣັ່ງ, ອາກຊັງຕິນ ແລະ ອື່ນໆ. ປີນີ້ ບໍລິສັດຫົວເຫວີຍປະຈຳລາວ ຈະໄດ້ຈັດຕັ້ງໂຄງການກິດຈະກຳດັ່ງກ່າວຂຶ້ນ ເພື່ອເປັນການສ້າງ ແລະ ພັດທະນາບຸກຄະລາກອນເຍົາວະຊົນຂອງລາວໃຫ້ມີຄຸນນະພາບ ເພື່ອສາມາດປະກອບສ່ວນເຂົ້າໃນການພັດທະນາປະເທດຊາດມີປະສິດທິຜົນສູງຂຶ້ນ.

     ຫົວເຫວີຍ ໄດ້ເລີ່ມຕົ້ນດຳເນີນກິດຈະກຳນີ້ໃນປີ 2008 ເພື່ອພັດທະນານັກສຶກສາຜູ້ມີພອນສະຫວັນ ICT, ຍົກສູງການຖ່າຍຖອງຄວາມຮູ້, ສົ່ງເສີມຄວາມເຂົ້າໃຈ ແລະ ຜົນປະໂຫຍດໃນຂະແໜງການສື່ສານ, ປັບປຸງ ແລະ ຊຸກຍູ້ການກໍ່ສ້າງ ແລະ ການເຂົ້າຮ່ວມປະຊາຄົມດ້ານດີຈີຕອນຢູ່ໃນພາກພື້ນ. ທຸກໆປີ, ຫົວເຫວີຍ ໄດ້ເຊື້ອເຊີນເອົານັກສຶກສາ 1.000 ຄົນຈາກ 10 ປະເທດ ເພື່ອທັດສະນະສຶກສາຢູ່ທີ່ສຳນັກງານໃຫຍ່ຂອງບໍລິສັດ. ສະນັ້ນ ກະຊວງສຶກສາທິການ ແລະ ກິລາລາວເຮົາກໍຈະໄດ້ຄັດເລືອກເອົານັກສຶກສາ 10 ຄົນຈາກມະຫາວິທະຍາໄລ 4 ແຫ່ງ ຄືມະຫາວິທະຍາໄລແຫ່ງຊາດ, ມະຫາວິ ທະຍາໄລສະຫວັນນະເຂດ, ຈຳປາສັກ ແລະ ມະຫາວິທະຍາໄລສຸພານຸວົງ ເພື່ອເຂົ້າຮ່ວມກິດຈະກຳຫົວເຫວີຍ.

     ໃນໄລຍະເວລາການເດີນທາງທັດສະນະສຶກສາ, ນັກສຶກສາຈະມີປະສົບການດ້ານວັດທະນະທຳພື້ນເມືອງຈີນ ແລະ ໄດ້ຮຽນຮູ້ຈາກບັນດາຫລັກສູດການເຝິກອົບຮົມ ເປັນຕົ້ນສິລະປະໃນການແຕ້ມຕົວໜັງສືງາມ ແລະ ການລະບາຍສີຢູ່ທີ່ມະຫາວິທະຍາໄລພາສາສາດ ແລະ ວັດທະນະທຳປັກກິ່ງເປັນເວລາໜຶ່ງອາທິດ. ພ້ອມກັນນັ້ນ ກໍຈະໄດ້ມີໂອກາດສຶກສາຮຽນຮູ້ເຕັກໂນໂລຊີໃໝ່ໆເຊັ່ນ: 5G, LTE ແລະ cloud (cloud computing) ແລະ ມີການປະຕິບັດກັບທີ່ຢູ່ຫ້ອງທົດລອງທີ່ກ້າວໜ້າທີ່ສຸດຂອງສຳນັກງານໃຫຍ່ຫົວເຫວີຍໃນເມືອງເຊິນເຈິນ.

     ທ່ານ Zhang Dongya ປະທານບໍລິສັດ ຫົວເຫວີຍ (ລາວ) ຈຳກັດຜູ້ດຽວ ໄດ້ອະທິບາຍເຖິງວິທີທີ່ພວກເຂົາໄດ້ໃຫ້ຄຳໝັ້ນສັນຍາ ເພື່ອປະກອບສ່ວນອັນຍາວນານຢູ່ປະເທດລາວ ເປັນຕົ້ນສະໜັບສະໜູນນັກສຶກສາທີ່ມີພອນສະຫວັນພິເສດທາງດ້ານ IT. ສະນັ້ນ ການຈັດກິດຈະກຳ Seeds for the future ຈະຊ່ວຍນັກສຶກສາລາວໄດ້ຮຽນຮູ້ປະສົບການຕ່າງໆຢ່າງຫລວງຫລາຍ. ຫົວເຫວີຍ ຍັງມີການສະໜັບສະໜູນລັດຖະບານລາວໃນການພັດທະນາ ICT, ຍົກສູງຄວາມສາມາດ ເພື່ອປັບຕົວເຂົ້າກັບຂະແໜງອຸດສາຫະກຳ ICT ກໍຄືຄວາມຕ້ອງການດ້ານນະວັດຕະກຳໃໝ່ຂອງຕະຫລາດລາວອີກດ້ວຍ.