ລະນຶກເຖິງວິລະຊົນສີທອງ

              ໃນທ້າຍອາທິດທີ່ຜ່ານມາທີ່ບ້ານເພຍລາດ, ເມືອງສັງທອງ, ນະຄອນ ຫລວງວຽງຈັນ, ໄດ້ມີພິທີລະນຶກເຖິງຄຸນ ງາມຄວາມດີຂອງວິລະຊົນສີທອງ ວິລະຊົນແຫ່ງຊາດ, ທີ່ໄດ້ເສຍສະຫລະເພື່ອຊາດຄົບຮອບ 56 ປີ, ສະຫາຍ ສີທອງ ໄດ້ເສຍສະຫລະເມື່ອວັນທີ 15 ທັນວາປີ 1960 ໃນສະມໍລະພູມປ້ອງກັນຕົວເມືອງວຽງຈັນຢ່າງພິລະອາດຫານ. ຕະຫລອດຊີວິດຂອງສະຫາຍແມ່ນໄດ້ອຸທິດໃຫ້ແກ່ປະເທດຊາດ, ສົມແລ້ວທີ່ເປັນລູກຮັກຫລານແພງຜູ້ປະເສີດຂອງປະຊາຊົນລາວບັນດາເຜົ່າ, ເປັນພະ ນັກງານ-ເປັນນັກຮົບຜູ້ອົງອາດກ້າຫານຂອງກອງທັບລາວອິດສະຫລະກໍຄືກອງທັບປະຊາຊົນລາວໃນປັດຈຸບັນ, ໂດຍການເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ທ່ານພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ແລະ ຊາວນະຄອນຫລວງວຽງຈັນເຂົ້າຮ່ວມຢ່າງຫລວງຫລາຍ.

             ໃນພິທີດັ່ງກ່າວໄດ້ເລົ່າຄືນປະຫວັດມູນເຊື້ອວິລະຊົນສີທອງ, ວິລະຊົນສີທອງ ເກີດເມື່ອວັນທີ 9 ສິງ ຫາ 1925 ທີ່ບ້ານນາຫອຍປັງ, ຕາແສງບ້ານໄຮ່, ເມືອງນາຊາຍທອງ, ແຂວງວຽງຈັນ (ປັດຈຸ ບັນແມ່ນເມືອງສັງທອງນະຄອນຫລວງວຽງຈັນ) ເປັນລູກຂອງພໍ່ຊຽງມີ, ແມ່ໂສພາ, ມີນ້ອງຮ່ວມອຸທອນດຽວກັນ 2 ຄົນຄື: ນາງ ບຸນຮອງ ແລະ ທ້າວ ກອງສີ. ວັນທີ 8 ມັງກອນ 1947 ສີທອງ ພ້ອມດ້ວຍໝູ່ຈຳນວນໜຶ່ງໄດ້ຈາກບ້ານນາຫອຍປັງຢ່າງປິດລັບເຂົ້າເປັນທະຫານ "ລາວອິດສະລະ" ຢູ່ເຂດທີ່ໝັ້ນແຫ່ງໜຶ່ງ, ຕໍ່ມາວັນທີ 24 ເມສາ 1949 ສີທອງ ເປັນທະຫານສັງກັດຢູ່ກອງຟ້າງຸຸ່ມ ແລະ ຖືກບັນຈຸສັບຊ້ອນເຂົ້າໃນກຳລັງປະກອບອາວຸດຢູ່ "ກອງຮ້ອຍ10", ຕົ້ນປີ 1950 ໄດ້ຖືກສົ່ງໄປຮຽນການເມືອງ-ການທະຫານເພື່ອຮຽນຮູ້ສິລະປະຢຸດຍຸດທະວິທີການສູ້ຮົບ, ມາຮອດວັນທີ 3-17 ກັນຍາ 1950 ຄະນະກອງຮ້ອຍ 10 ໄດ້ມອບໝາຍໜ້າທີ່ໃຫ້ສະຫາຍ ສີທອງ ນຳພານັກຮົບປະສົມລາວ-ຫວຽດນາມ ໝວດທີໜຶ່ງໄປສະກັດຕີສັດຕູຢູ່ເຂດບ້ານນາປໍຫລັກ 52 ເມືອງໂພນໂຮງ ແລະ ສາມາດຍາດໄດ້ໄຊຊະນະ, ຕໍ່ຈາກນັ້ນ ວັນທີ 18 ກໍລະກົດ 1951 ຄະນະພັກແຂວງວຽງຈັນໄດ້ຕົກລົງໃຫ້ສະຫາຍ ສີທອງ ໄປຍົກລະດັບດ້ານການເມືອງ-ການທະຫານຢູ່ ສສ ຫວຽດນາມ ແລະ ສະຫາຍໄດ້ເຂົ້າເປັນສະມາຊິກຊາວໜຸ່ມຕະລຸມບອນ ແລະ ໄດ້ປະກອບສ່ວນຕີຕ້ານສັດຕູ ແລະ ຈັກກະພັດຜູ້ຮຸກຮານຢ່າງພິລະອາດຫານຕະຫລອດມາ.

             ສະຫາຍ ສີທອງ ກຳເນີດໃນຄອບຄົວຊາວໄຮ່ນາ, ເຊິ່ງເປັນຜູ້ທີ່ມີທັດສະນະໜັກແໜ້ນ, ມີຄວາມສະຫລຽວສະຫລາດໃນການນຳພາສູ້ຮົບ ແລະ ສູ້ຮົບມີໄຊ, ຮູ້ຈັກໝູນໃຊ້ກຳລັງປະສານສົມທົບກັບພູມີປະເທດ ເພື່ອດຳເນີນການຕໍ່ສູ້ກັບສັດຕູ, ມີມານະຈິດ ແລະ ຄວາມເຊື່ອໝັ້ນອັນໜັກແໜ້ນຕໍ່ອຸດົມການປະຕິວັດ, ເຖິງວ່າສະຖານະການຈະຫຍຸ້ງຍາກຄັບຂັນພຽງໃດກໍມີຄວາມເດັດດ່ຽວອາດຫານຜ່ານຜ່າເພື່ອໄຊຊະນະ, ເຊິ່ງໄດ້ກາຍເປັນການອຸທິດຊີວິດອັນອົງອາດກ້າຫານ ແລະ ພຶດຕິກຳອັນລ້ຳເລີດຂອງສະຫາຍໃນພາລະກິດປະຕິວັດ. ພ້ອມກັນນັ້ນ, ກໍກາຍເປັນແບບຢ່າງອັນດີງາມເປັນແວ່ນແຍງອັນໃສແຈ້ງໃຫ້ແກ່ພະນັກງານ, ສະມາຊິກພັກ ແລະ ປະຊາຊົນລາວບັນດາເຜົ່າ.