ໂດຍ : ວິເສດ ສະແຫວງສຶກສາ
ມື້ນີ້ ຈານແຫຍ່ຕັ້ງໃຈໃສ່ຊື່ບົດທີ່ຟັງແລ້ວສີແປກໆຫູ. ຢ່າ ! ຂໍຢ່າແປກເລີຍ
ມັນແມ່ນປະໂຫຍກ ຄຳເວົ້າທີ່ຫ້າວຫັນເອົາຈິງເອົາຈັງ ທີ່ພວກເຮົາເຈົ້າຂ້ອຍເຄີຍເປັ່ງອອກມາເປັນປະຈຳໃນກອງປະຊຸມຕ່າງໆທີ່ກຳນົດເອົາຂໍ້ແຂ່ງຂັນສ້າງຜົນງານ.
ທ່ານຜູ້ອ່ານຈຳໄດ້ບໍ່ວ່າ ໃນກອງປະຊຸມລັກສະນະນີ້ ຈະມີຜູ້ເປັນຫົວໜ້າອອກໄປຢືນຢູ່ຕໍ່ໜ້າໝູ່
ຫລື ຢືນຢູ່ກາງແຖວແລ້ວຮ້ອງຂຶ້ນວ່າ “ຂໍ້ແຂ່ງຂັນນີ້ພວກເຮົາຊິເຮັດໄດ້ບໍ່
?” ນອກຈາກເປັ່ງສຽງຮ້ອງຈົນເອັນຄໍພຶງແລ້ວ ຜູ້ພາໝູ່ເວົ້າຍັງກຳກໍ່າປັ້ນກວັດແກ່ວງຊັດລົມໄປໆມາໆ.
ຕາມທຳມະດາແລ້ວ ຜູ້ພາເວົ້າຈະຖາມ 3 ຄັ້ງວ່າ “ເຮັດໄດ້ບໍ່ ?
ເຮັດໄດ້ ບໍ່ ? ເຮັດໄດ້ແທ້ບໍ່ ?” ຖາມສຸດ
ແຕ່ລະເທື່ອກໍຈະມີສຽງຕອບຮັບຂອງຄົນໃນກອງປະຊຸມ ຫລື ໃນກຸ່ມແຂ່ງຂັນວ່າ “ໄດ້ ! ໄດ້ ! ໄດ້ ແທ້ !” ພ້ອມທັງວີກໍ່າປັ້ນວຶດວັດ,
ຖ້າບັງເອີນວ່າໄປຖືກຫົວໃຜຜູ້ໜຶ່ງແນ່ນອນນັບຮອດຮ້ອຍກໍຍັງລຸກບໍ່ໄດ້ດອກຈານແຫຍ່ວ່າ
!!!.
ຈານແຫຍ່ເອົາສາກຮ້ອງຄຳຂວັນຢູ່ກອງປະຊຸມມາຂຶ້ນຕົ້ນບົດປະຈຳວັນນີ້ກໍເພາະດີໃຈແຮງທີ່ລັດຖະບານໄດ້ໃຫ້ຄຳໝັ້ນສັນຍາໃນກອງປະຊຸມສະພາເທື່ອແລ້ວນີ້ວ່າຈະຜະເດັດເສິກປາບການສໍ້ລາດບັງຫລວງໃຫ້ເບົາບາງ
ແລະ ໝົດໄປໃນທີ່ສຸດ ດ້ວຍມາດຕະການທີ່ມີປະສິດທິພາບ ແລະ ສົມເຫດສົມຜົນ ແລະ ວ່າຜ່ານມານັ້ນ
ມາດຕະການຕ້ານການສໍ້ລາດບັງຫລວງຍັງເວົ້າລວມໆໂພດ ບໍ່ເຈາະເລິກປັດໄຈທີ່ເປັນບັນຫາແທ້,
ຖ້າເວົ້າຕາມພາສາຕະຫລາດກໍແມ່ນຍັງ “ເກົາບໍ່ຖືກບ່ອນຄັນ”
ເທື່ອວ່າຊັ້ນສາ. ທາງເບື້ອງຜູ້ແທນທີ່ປະຊາຊົນເລືອກມາກັບມືໃໝ່ໆໝາດໆຕ່າງກໍຊົມເຊີຍຄຳເຫັນຂອງລັດຖະ
ບານໝົດໄສ້ໝົດພຸງດ້ວຍຄວາມ ເຂົ້າໃຈເຮັດໃຫ້ຖືກເຮັດໃຫ້ເປັນຈິງເຫັນຜົນ. ຈານແຫຍ່ເຫັນພ້ອມ
ເກີນຮ້ອຍທີ່ວ່າຕຳລາຂ້າພະຍາດສໍ້ລາດບັງຫລວງ, ຜ່ານມາ
ນັ້ນມັນຊະໂພດ, ມັນບໍ່ຕ້ອມ, ຖ້າເປັນການຖ່າຍຮູບກໍແມ່ນຖ່າຍ
ແບບເອົາແນ໋ດບໍ່ໄດ້, ຮູບອອກມາກໍເລີຍເຫັນພໍມົວໆ. ຕົວຢ່າງເມື່ອເວົ້າເຖິງປ້ອງກັນເງິນຕາບໍ່ໃຫ້ຮົ່ວໄຫລອອກນອກປະເທດພວກເຮົາກໍເວົ້າລວມໆ
ແທນທີ່ຈະເນັ້ນກຸ່ມບຸກຄົນທີ່ມີເງິນລົ້ນຖົງ, ຖ້າຫ້າມຄົນໄປໃຊ້ຈ່າຍຢູ່ຕ່າງປະເທດ,
ພວກເຮົາກໍບໍ່ເຄີຍມີມາດຕະການຈຳກັດກຸ່ມຄົນທີ່ມີໂອມີພາຫະນະມີເງື່ອນໄຂສວຍໂອກາດ,
ຖ້າຫ້າມເລື່ອງຈັດງານດອງໃຫຍ່ໂຕມະໂຫຖານ ພວກເຮົາກໍບໍ່ເຄີຍກຳນົດຈຳນວນແຂກທີ່ຄວນເຊີນ,
ເລື່ອງຮັບຂອງຂອກຂອງຂວັນ ພວກເຮົາກໍບໍ່ເຄີຍກຳນົດມູນຄ່າວ່າສໍ່າໃດຮັບໄດ້ສໍ່າໃດຫ້າມຮັບ
ເພາະຮັບແລ້ວຜູ້ຮັບຈະຕ້ອງເປັນໜີ້ບຸນຄຸນກາຍເປັນຜູ້ມີຜົນປະ ໂຫຍດຮ່ວມກັນກັບຜູ້ໃຫ້ໃນທີ່ສຸດ.
ຫວ່າງເກືອບສອງເດືອນຜ່ານມານີ້, ສ.ເກົາຫລີ
ໄດ້ອອກກົດໝາຍຕ້ານການສໍ້ລາດບັງຫລວງ ໂດຍມີມາດຕາຫ້າມລວມ ແລະ ທັງກຳນົດໂທດໜັກ
ສຳລັບພະນັກງານໃນສອງຂະ ແໜງການເປັນ ຕົ້ນຕໍຄືຂະແໜງສຶກສາ ແລະ ຂະແໜງສາທາລະນະສຸກ ເພາະ
ສ.ເກົາຫລີ ຈັບໄດ້ແລ້ວວ່າໃນສອງຂະ ແໜງການນີ້ ພະນັກງານສໍ້ລາດບັງຫລວງເກັ່ງກວ່າໝູ່ເຊັ່ນໃນຂະແໜງສຶກສາກໍມີບັນຫາຊື້-ຂາຍຄະ
ແນນສອບເສັງ, ຮັບສິນບົນນຳຜູ້ທີ່ເປັນພໍ່ເປັນແມ່ທີ່ຕ້ອງການໃຫ້ລູກໆຂອງຕົນໄດ້ເຂົ້າຮຽນຢູ່ໂຮງຮຽນ
ດີມີຊື່ສຽງ, ສ່ວນຢູ່ຂະແໜງສາທາລະນະສຸກນັ້ນກໍມີບັນຫາການຈຳແນກບູລິມະສິດໃນການປິ່ນປົວ
ເຊັ່ນເອົາໃຈໃສ່ແຕ່ຜູ້ຫລັກຜູ້ໃຫຍ່, ຜູ້ມີອຳນາດເງິນ,
ຄົນລຶ້ງເຄີຍ ດັ່ງນີ້ເປັນຕົ້ນ. ສ່ວນມາດຕະການ ອື່ນໆກໍມີການຫ້າມຮັບຂອງຂວັນໃນມູນຄ່າ
50.000 ວອນ (1 ໂດລາສະຫະລັດແລກໄດ້ປະມານ 1.146 ວອນ) ແລະ ຫ້າມໄປຮ່ວມຮັບປະທານອາຫານທີ່ມີມູນຄ່າ
30.000 ວອນຂຶ້ນໄປໂດຍແມ່ນຄົນອື່ນຈ່າຍລ້ຽງ. ສຳລັບພະນັກງານລະດັບຫົວໜ້າກົມໃນຂະແໜງເກັບພາສີນັ້ນຫ້າມຮ່ວມຫລິ້ນກິລາຕີກ໋ອບກັບຫົວໜ້າ
ຫລື ຄະນະນຳຂອງບໍລິສັດໃຫຍ່ໆຈຳນວນ 100 ຫົວໜ່ວຍ ທີ່ທາງການມີບັນຊີແຮໄວ້ແລ້ວ.
ເວົ້າມາຮອດນີ້ໜ້າເຈ້ຍໝົດຂໍຕໍ່ສະບັບໜ້າໃນຫົວຂໍ້ “ຢ່າເຮັດຄືປາຊົມນ້ຳໃໝ່”.
No comments:
Post a Comment