laophatthananewspaper: ກະຊວງສາທາລະນະສຸກອອກຄຳສັ່ງໃຫ້ເອົາໃຈໃສ່ປ້ອງກັນ ແລະ ສະກັດກັ້ນການລະບາດຂອງພະຍາດໄຂ້ເລືອດອອກ

ລັດຖະມົນຕີວ່າການກະຊວງສາທາລະນະສຸກ ໄດ້ອອກຄຳສັ່ງແນະນຳ ເຖິງຫົວໜ້າພະແນກສາທາລະນະສຸກແຂວງ ແລະ ນະຄອນຫລວງວຽງຈັນ ໃນຂອບເຂດທົ່ວປະເທດເລື່ອງໃຫ້ຮີບຮ້ອນເອົາໃຈໃສ່ປ້ອງກັນ ແລະ ສະກັດກັ້ນການລະບາດ ພະຍາດໄຂ້ເລືອດອອກ ໃນປີ 2013 ຊຶ່ງມີລາຍລະອຽດດັ່ງນີ້:

ໃຫ້ພະແນກສາທາລະນະສຸກ ໃນຂອບເຂດທົ່ວປະເທດ ເພີ່ມຄວາມຮັບຜິດຊອບ ແລະ ເອົາໃຈໃສ່ຈັດຕັ້ງ ປະຕິບັດການກັນ ແລະ ຄວບຄຸມພະຍາດໄຂ້ເລືອດອອກ ໂດຍລະດົມການມີສ່ວນຮ່ວມຂອງທຸກພາກສ່ວນ, ທຸກອົງການຈັດຕັ້ງ ລວມ ທັງພາກລັດ ແລະ ເອກະຊົນ ແລະ ປະຊາ ຊົນທຸກໆຊຸມຊົນໃນແຕ່ລະແຂວງ, ເມືອງ ແລະ ບ້ານ ດ້ວຍການກຳ ຈັດແຫລ່ງເພາະພັນຂອງຍຸງລາຍຢ່າງເປັນປະຈຳ ແລະ ຕໍ່ເນື່ອງ ເພື່ອຫລີກເວັ້ນຈາກການເປັນພະ ຍາດດັ່ງກ່າວ; ໃຫ້ເອົາໃຈໃສ່ເປັນພິເສດ ຕໍ່ການໂຄສະນາປະ ຊາສຳພັນ ແລະ ລະດົມທຸກພະແນການພາຍໃນແຂວງ ທັງພາກລັດ ແລະ ເອກະຊົນ ແລະ ພໍ່ແມ່ປະຊາ ຊົນບັນດາເຜົ່າຢູ່ແຕ່ລະບ້ານ ປະ ກອບສ່ວນປະຕິບັດວຽກງານກຳຈັດແຫລ່ງເພາະພັນຍຸງລາຍ ແລະ ຜັນຂະຫຍາຍເອົາວຽກດັ່ງ ກ່າວໃຫ້ກາຍເປັນວຽກຂອງໝົດທຸກຄົນໃນສັງຄົມ ໂດຍສະເພາະແມ່ນຢູ່ບັນດາໂຮງຮຽນອະນຸ ບານ, ໂຮງຮຽນປະຖົມ, ມັດ ທະຍົມພາຍໃນແຂວງ ໃຫ້ມີການເປີດຂະບວນອະນາໄມກຳຈັດຍຸງລາຍທຸກສັບປະດາ ເພື່ອຫລີກເວັ້ນບໍ່ໃຫ້ມີການລະບາດໃນໂຮງຮຽນ; ໃຫ້ຈັດຕັ້ງກັນລົງກວດກາ ແລະ ຊີ້ນຳຫ້ອງການສາທາລະນະສຸກເມືອງ, ໜ່ວຍງານອະນາໄມຢູ່ຂັ້ນເມືອງ, ສຸກສາລາ, ຈັດຕັ້ງເປີດຂະບວນອະນາໄມທຳລາຍແຫລ່ງເພາະພັນຍຸງລາຍ, ເອົາໃຈໃສ່ແນະນຳປະຊາຊົນ ແລະ ເປີດຂະບວນອະນາໄມ ໂດຍສົມທົບກັບອຳນາດການປົກຄອງເມືອງ, ຂະແໜງການອື່ນໆພາຍໃນເມືອງ, ອຳນາດການປົກຄອງບ້ານ ແລະ ອາສາສະໝັກ

ສາທາລະນະສຸກບ້ານ ໃຫ້ແໜ້ນຢ່າງເປັນປົກກະຕິ; ໃຫ້ຮີບຮ້ອນຈັດຕັ້ງ ຫລື ປັບປຸງຄືນໃໝ່ໜ່ວຍງານຕອບໂຕ້ໄວຂອງແຂວງ ແລະ ເມືອງ ໃຫ້ມີປະສິດທິພາບໃນການຕອບໂຕ້ການລະບາດຂອງພະຍາດ; ໃຫ້ກະກຽມການຍົກລະດັບການບົ່ງມະຕິ ແລະ ການປິ່ນປົວຂອງແພດໝໍຢູ່ໂຮງໝໍແຂວງ, ເມືອງ ແລະ ສຸກສາລາໃຫ້ມີຄຸນນະພາບ ແລະ ຊຳນິຊຳນານ ເພື່ອຮັບປະ ກັນບໍ່ໃຫ້ມີການເສຍຊີວິດ ໂດຍບໍ່ສົມເຫດສົມຜົນ; ໃຫ້ກວດກາເບິ່ງຄືນຢາປິ່ນປົວ ແລະ ອຸປະກອນຮັບໃຊ້ໃນການຄວບຄຸມພາຫະນະນຳເຊື້ອ ທີ່ຈຳເປັນໄວ້ໃຫ້ພ້ອມ ເພື່ອຮັບປະກັນໃຫ້ສາມາດປິ່ນປົວ ແລະ ສະກັດກັ້ນການແຜ່ຂະຫຍາຍຂອງພະຍາດໄຂ້ເລືອດອອກໄດ້ຢ່າງທັນການ ແລະ ຖືກຕ້ອງຕາມຫລັກວິຊາການຖ້າຫາກມີການເກີດລະບາດຂອງພະຍາດດັ່ງກ່າວ ຢູ່ພາຍໃນແຂວງຂອງຕົນ.

ເມື່ອໄດ້ຮັບຄຳສັ່ງສະບັບນີ້ ແລ້ວ, ໃຫ້ຮີບຮ້ອນຜັນຂະຫຍາຍ ແລະ ເປີດກອງປະຊຸມປຶກສາຫາ ລື, ໄຈ້ແຍກຂໍ້ຄົງຄ້າງ ເພື່ອເຮັດໃຫ້ການບັນຊາ ການປ້ອງກັນການລະບາດໄຂ້ເລືອດອອກຢູ່ຂັ້ນແຂວງ, ເມືອງ ແລະ ສຸກສາລາຢ່າງທັນການ. ໃນກໍລະນີຈຳເປັນ ໃຫ້ພົວພັນ ແລະ ລາຍງານການ ຈັດຕັ້ງປະຕິບັດແຕ່ລະໄລຍະ ມາໃຫ້ກົມຄວບຄຸມພະຍາດຕິດຕໍ່ ແລະ ການນຳກະຊວງສາທາລະ ນະສຸກຊາບ.