ກະຊວງສຶກສາທິການຈະເຂັ້ມງວດຕໍ່ຜູ້ຝ່າຝືນລະບຽບການສຶກສາ

        ເມື່ອບໍ່ດົນມານີ້,ກະຊວງສຶກ ສາທິການ ແລະ ກິລາ ອອກມາ ຢືນຢັນວ່າ:ຖ້າພົບເຫັນກໍລະນີຄູ- ອາຈານ ມີພຶດຕິກຳ ຮຽກຮ້ອງຄ່າຕອບແທນຕ່າງໆສາມາດສະເໜີ ຫາກະຊວງທັນທີເພື່ອຈະດຳເນີນ ລະບຽບວິໄນຜູ້ຝ່າຝືນທັນທີ.

     ບັນຫາດັ່ງກ່າວໄດ້ຮັບການ ຊີ້ແຈງຈາກກະຊວງສຶກສາທິການ ແລະ ກິລາ,ພາຍຫລັງມີຜູ້ສະເໜີຕໍ່ສະພາແຫ່ງຊາດເພື່ອໃຫ້ ປະສານໄປຫາກະຊວງກ່ຽວຂ້ອງກວດກາເຖິງພຶດຕິກຳການຮຽກຮ້ອງຄ່າຕອບແທນຈາກນັກສຶກສາຈຳນວນໜຶ່ງຢູ່ມະຫາວິທະ ຍາໄລແຫ່ງຊາດ (ດົງໂດກ)ແລະກະຊວງສຶກສາກໍໄດ້ສອບຖາມໄປມະຫາວິທະຍາໄລດັ່ງກ່າວຖ້າຫາກມີຄວາມຈິງຂໍໃຫ້ລາຍ ງານລະອຽດໂດຍລະບຸຊື່ອາຈານ ແລະ ພາກວິ ຊາເພື່ອສາມາດດຳເນີນຄະດີຜູ້ ກະທຳຜິດຕາມລະບຽບກົດໝາຍ.

      ເຖິງວ່າໃນໄລຍະຜ່ານ ມາ,ບັນຫາການຮຽກຮ້ອງຄ່າ ຕອບແທນຈາກນັກຮຽນຂອງຄູ- ອາຈານ ຍັງບໍ່ມີກໍລະນີຮ້າຍແຮງ ເປັນເລື່ອງໃຫຍ່ເປີດແປນກໍຕາມ , ແຕ່ກໍເປັນທີ່ຮູ້ກັນດີຂອງສັງຄົມ, ມີຫລາຍສະຖາບັນການສຶກສາ ນັບທັງພາກລັດ ແລະ ເອກະຊົນ, ຄູ-ອາຈານຈຳນວນ ໜຶ່ງພະຍາຍາມຫາວິທີຕ່າງໆ ເຊັ່ນ: ການເປີດສອນເພີ່ມພິເສດຖ້ານັກຮຽນຄົນໃດບໍ່ມາຮຽນ ກໍຈະບໍ່ໄດ້ຄະແນນດີ ຫລື ໄດ້ຄະແນນ ຍາກ,ອາຈານບາງຄົນເມື່ອມີການ ສອບເສັງຕ່າງໆ ກໍມັກຕັ້ງຄຳຖາມໃຫ້ນັກຮຽນໃນສິ່ງ ທີ່ຕົນບໍ່ໄດ້ສິດສອນ ເພື່ອໃຫ້ນັກຮຽນໄປ ຊອກຄຳຕອບຍາກ ແລະ ສຸດທ້າຍກໍຕ້ອງມາເສຍຄ່າຕອບແທນ ໃຫ້ອາຈານໃນ

ການຜ່ານເອົາຄະແນນ ແລະ ອື່ນໆ.ຈາກບັນຫາດັ່ງກ່າວ ມັນກາຍເປັນຄ່ານິຍົມ ແບບບໍ່ຖຶກຕ້ອງໃນວົງການສຶກສາຂອງລາວ ທັງເກີດມີປາກົດການຫຍໍ້ທໍ້ທາງສັງຄົມອື່ນໆຕາມມາ ເຊັ່ນ: ມີການໃຊ້ເງິນເພື່ອຂຶ້ນຊັ້ນ ຫລື ຈົບຊັ້ນ, ມີການປອມແປງໃບ

ປະກາດເພື່ອເຂົ້າເຮັດວຽກ ເຊິ່ງໃນສົກປີຜ່ານມາ, ກະຊວງສຶກສາ ກໍກວດພົບໃບປະກາດປອມເປັນຈຳນວນຫລາຍ. ນອກ ຈາກນີ້, ນັກຮຽນ-ນັກສຶກສາທີ່ຮຽນຈົບໄປຈຳນວນໜຶ່ງເຮັດວຽກງານບໍ່ມີປະສິດທິຜົນ ແລະ ນຳໃຊ້ບໍ່ໄດ້ດີເທົ່າ ທີ່ຄວນ.