47 ປີ ສຳນັກຂ່າວສານປະເທດລາວເຕີບໃຫຍ່ທັງປະລິມານ ແລະ ຄຸນນະພາບ

     ທ່ານ ສູນທອນ ຄັນທະວົງ ອຳນວຍການສຳນັກຂ່າວສານປະເທດລາວ ໃຫ້ສຳ ພາດຕໍ່ນັກຂ່າວພວກເຮົາເນື່ອງໃນໂອກາດວັນສ້າງຕັ້ງສຳນັກຂ່າວສານ ປະ ເທດລາວຄົບຮອບ 47 ປີ (6 ມັງກອນ 1968 - 6 ມັງກອນ 2015) ວ່າ: ເມື່ອຫວນຄືນອະດີດເຖິງປັດຈຸບັນ ແລະ ເຫັນວ່າການເຕີບໃຫຍ່ຂະຫຍາຍໂຕຂອງ ສຳນັກຂ່າວສານ ປະເທດລາວ ໄດ້ຕິດພັນຢ່າງສະໜິດແໜ້ນກັບພາລະກິດປະຕິວັດ, ຜ່ານຜ່າຄວາມທຸກ ຍາກນາໆປະການ ແລະ ເຮັດສຳເລັດໜ້າທີ່ການເມືອງທີ່ພັກ ແລະ ລັດມອບໝາຍໃຫ້ໃນແຕ່ລະໄລຍະ.

      ກ່ອນໜ້ານີ້ 47 ປີ ຄືວັນທີ 6 ມັງກອນ 1968 ຢູ່ເມືອງວຽງໄຊ ແຂວງຫົວພັນ ທີ່ໝັ້ນຂອງການປະຕິ ວັດລາວ, ທ່ານ ສຸພານຸວົງ ປະທານສູນກາງແນວລາວຮັກຊາດ ໄດ້ຕົກລົງສ້າງຕັ້ງສຳນັກຂ່າວສານປະ ເທດລາວ ໂດຍມີຊື່ ຫຍໍ້ວ່າ: “ຂປລ” ຫລື ພາສາຕ່າງປະເທດ “KPL” ເພື່ອເຮັດໜ້າທີ່ລາຍງານຂ່າວຢູ່ ພາຍໃນ ແລະ ຕ່າງ ປະເທດ ໂດຍທ່ານ ສີຊະນະ ສີສານ ກຳມະການຄະນະໂຄສະນາອົບຮົມວັດທະນະ ທຳຂອງສູນກາງແນວລາວຮັກຊາດ ເປັນ ອຳນວຍການຄົນທຳອິດ. ເບື້ອງຕົ້ນມີນັກຂ່າວ ແລະ ວິຊາການ 10 ກວ່າຄົນ ທີ່ເຮັດວຽກຕິດພັນຢູ່ກັບສະຖາ ນີວິທະຍຸກະ ຈາຍສຽງຂອງຝ່າຍປະເທດລາວ ໂດຍມີໜ້າທີ່ ເຄື່ອນໄຫວເກັບກຳຂໍ້ມູນ ແລະ ຂຽນຂ່າວໃຫ້ວິທະຍຸ ກະຈາຍສຽງຂອງ ຝ່າຍປະເທດລາວ ແລະ ໜັງສືພິມລາວຮັກຊາດ. ພ້ອມນັ້ນກໍກະຈາຍຂ່າວອອກສູ່ໂລກ ໃນລະ ບົບຄື້ນສັ້ນທີ່ເປັນພາສາອັງກິດ ໂດຍການ ຮ່ວມມືຊ່ວຍເຫລືອຂອງສຳນັກຂ່າວສານຫວຽດນາມ.

      ໄລຍະນັ້ນ, ຂ່າວສານປະເທດລາວມີສາຂາຂ່າວຂອງຕົນປະຈຳຢູ່ບາງແຂວງເຊັ່ນ: ຊຽງຂວາງ, ສະຫວັນນະ ເຂດ, ຄຳມ່ວນ, ອຸດົມໄຊ ແລະ ແຂວງຕາເວັນອອກ (ແຂວງເຊກອງໃນປັດຈຸບັນ) ເພື່ອເຄື່ອນໄຫວເກັບກຳຂ່າວ ຢູ່ສະໜາມຮົບ ອັນດຸເດືອດເຊັ່ນ: ບັ້ນຮົບຜາທີ່ (ແຂວງຫົວພັນ), ບັ້ນຮົບນ້ຳບາກ (ແຂວງຫລວງພະບາງ), ບັ້ນຮົບ ກູ້ກຽດ (ແຂວງ ຊຽງຂວາງ), ບັ້ນຮົບລາມເຊີນ 719 (ແຂວງສະຫວັນນະເຂດ), ບັ້ນຮົບສາມສອນ, ສອນໄຊ (ແຂວງຄຳມ່ວນ), ບັ້ນຮົບຕ່າງໆຢູ່ທາງແຂວງ ສາລະວັນ, ປາກຊ່ອງບໍລະເວນ, ເລົ່າງາມ ແລະ ອື່ນໆ.

      ນັກຂ່າວພວກເຮົາໃນເວລານັ້ນແມ່ນນັກຮົບທີ່ອົງອາດກ້າຫານທີ່ຖືອາວຸດ 2 ຊະນິດຢູ່ໃນມື້ຢ່າງ ເປັນປະຈຳ ຄືປືນ ແລະ ປາກກາ ພ້ອມກ້ອງຖ່າຍຮູບຄຽງບ່າຄຽງໄຫລ່ກັບອ້າຍນ້ອງນັກຮົບກອງທັບ ປົດປ່ອຍປະຊາຊົນລາວ ເພື່ອເກັບກຳຂ່າວ ແລະ ຮູບພາບແຫ່ງໄຊຊະນະຂອງກອງທັບປົດປ່ອຍປະຊາ ຊົນລາວທີ່ບຸກໂຈມຕີສັດຕູຢູ່ທຸກຫົນ ແຫ່ງທົ່ວປະເທດ ພ້ອມກັນເກັບ ກຳຂ່າວ ແລະ ຮູບພາບໂທດກຳຂອງ ພວກຫຸ່ນຂາຍຊາດ ແລະ ຈັກກະພັດທີ່ເຂັ່ນຂ້າ ປະຊາຊົນລາວ.

     ພາຍຫລັງສະຖາປະນາ ສປປ ລາວ ໃນວັນທີ 2 ທັນວາ 1975, ຂ່າວສານປະເທດລາວ ໄດ້ກາຍເປັນ ແຫລ່ງ ຂ່າວສານ ທາງການຂອງປະເທດ. ເນື້ອໃນ, ຮູບການ ກໍໄດ້ຮັບການປັບປຸງໃຫ້ນັບມື້ດີຂຶ້ນ. ນອກຈາກພິມໃບຂ່າວ ເປັນພາສາລາວ ແລະ ສົ່ງຂ່າວໃນລະບົບກະຈາຍຄື້ນສັ້ນແລ້ວ ຍັງໄດ້ພິມໃບຂ່າວເປັນ ພາສາຝຣັ່ງ, ອັງກິດອອກຕື່ມ ອີກ, ນັບແຕ່ປີ 1979-2000 ໄດ້ຈັດພິມວາລະສານປະເທດລາວລາຍໄຕ ມາດເປັນພາສາລາວ ແລະ ອັງກິດ ແລະ ປີ 2012 ໂດຍໄດ້ຮັບການຊ່ວຍເຫລືອ ຂອງສຳນັກຂ່າວສານ ຫວຽດນາມ ກໍໄດ້ຈັດພິມວາລະສານດັ່ງກ່າວຄືນໃໝ່ ເປັນພາສາລາວ. ປັດຈຸບັນ ມີພະນັກງານເກືອບ ຮ້ອຍຄົນ, ໃນນັ້ນ ຍິງ 39 ຄົນ. ໃນປີ 2014 ໄດ້ເຄື່ອນໄຫວເກັບ ກຳຂ່າວເຫດການສຳຄັນຕ່າງໆ ທັງຢູ່ ສູນກາງ ແລະ ທ້ອງຖິ່ນ 1.318 ຄັ້ງ, ໄດ້ຜະລິດໃບຂ່າວເພື່ອນຳສະເໜີຜ່ານ ໜັງສືພິມ, ເວບໄຊ ແລະ ສະໜອງໃຫ້ສື່ຕ່າງໆ ໄດ້ຫລາຍເຖິງ 3.960 ຂ່າວ ແລະ 2.376 ຮູບ, ໃນນັ້ນ ມີຂ່າວ ທ້ອງຖິ່ນ 1.320 ຂ່າວ ແລະ 1.874 ຮູບ, ຜະລິດໃບຂ່າວລາຍວັນ “ຂ່າວສານປະເທດລາວ” ອອກສູ່ສັງຄົມ ຜ່ານທາງເວບໄຊຂອງສຳນັກໄດ້ທັງໝົດ 292 ສະບັບ ມີຂ່າວພາຍໃນ 2.300 ຂ່າວ ແລະ ຂ່າວຕ່າງປະເທດ 1.700 ຂ່າວ.

     ດ້ານເຕັກນິກ ໄດ້ຕິດຕັ້ງ FTP Server ຮັບ-ສົ່ງຂໍ້ມູນໄດ້ຫລາຍຂຶ້ນ, ໄດ້ສຳເລັດການສ້າງເວບໄຊ ໃໝ່, ພ້ອມທັງຈັດ ຕັ້ງການເຝິກອົບຮົມການນຳໃຊ້ເວບໄຊໃຫ້ພະນັກງານ, ບັນນາທິການ ແລະ ນັກຂ່າວ ໂດຍໄດ້ຮັບການ ຊ່ວຍເຫລືອຈາກ ຂ່າວສານຫວຽດນາມ ເຊິ່ງມີເວບໄຊ www.kpl.net.la ແລະ www.kpl.gov.la ທີ່ສາມາດສະ ເໜີຂ່າວໃນຮູບແບບ ເຄື່ອນເໜັງ ຫລື ເອີ້ນວ່າ: ວີດີໂອທາງເວບໄຊ, ມີຜູ້ເຂົ້າເບິ່ງເວບໄຊປະມານ 3,4 ລ້ານເທື່ອຄົນ. ແນວໃດກໍດີ, ເພື່ອຮັບໃຊ້ ໜ້າທີ່ການເມືອງພັກ ແລະ ການພັດທະນາເສດຖະກິດ-ສັງຄົມຂອງລັດໃນໄລຍະໃໝ່ ທັງ ໃຫ້ສາມາດເຊື່ອມໂຍງພາກພື້ນ ແລະ ສາກົນ, ພວກເຮົາຈະເອົາໃຈໃສ່ສືບຕໍ່ພັດທະນາດ້ານບຸກຄະລາກອນ, ດ້ານ ວັດຖຸ-ເຕັກນິກ ເພື່ອໃຫ້ສາມາດຕອບສະ ໜອງຄວາມຕ້ອງການຂອງສັງຄົມດ້ານຂໍ້ມູນຂ່າວສານໃຫ້ມີຄວາມ ຫລາກ ຫລາຍ, ວ່ອງໄວ, ຊັດເຈນດີກວ່າເກົ່າ.