laophatthananewspaper: ເລັ່ງປາບຂະບວນຄ້າມະນຸດຂ້າມແດນ

25 May 2015

ເລັ່ງປາບຂະບວນຄ້າມະນຸດຂ້າມແດນ

ອີງຕາມຂໍ້ມູນຈາກສື່ຕ່າງປະເທດ ໃຫ້ຮູ້ວ່າ: ນັບແຕ່ຕົ້ນປີມານີ້ ໄດ້ມີເດັກນ້ອຍລາວກວ່າຮ້ອຍຄົນຖືກຫລອກລວງຂ້າມໄປຂາຍເຂົ້າສ່ອງ, ສະຖານທີ່ບັນເທີງ ແລະ ຮ້ານອາຫານຕ່າງໆຢູ່ປະເທດໄທ ເພື່ອບັງຄັບໃຫ້ຂາຍບໍລິການທາງເພດ, ໂດຍຜູ້ຍິງເຫລົ່ານີ້ສ່ວນໃຫຍ່ມີອາຍຸບໍ່ເຖິງກະສຽນ, ສຳລັບເດັກນ້ອຍຜູ້ຊາຍແມ່ນຖືກນຳໄປຂາຍເຂົ້າໂຮງຈັກ, ໂຮງງານ ຫລື ຮ້ານອາຫານຕ່າງໆ, ເພື່ອບັງຄັບໃຫ້ອອກແຮງງານ, ເຊິ່ງປັດຈຸບັນທາງການຂອງປະເທດໄທພວມມີແຜນທີ່ຈະເຂົ້າມາປຶກສາຫາລືຊອກວິທີແກ້ໄຂຮ່ວມກັບເຈົ້າໜ້າທີ່ທີ່ກ່ຽວຂ້ອງຂອງລາວໃນເວລາອັນຮີບດ່ວນ.

ຕໍ່ບັນຫາທີ່ກ່າວມາຂ້າງເທິງນີ້, ຊື່ງຜ່ານມາພັກ-ລັດຖະບານລາວ ໄດ້ຖືເປັນບັນຫາສຳຄັນຮີບດ່ວນເພື່ອຕ້ານການຄ້າມະນຸດທຸກຮູບແບບ, ໂດຍຜູ້ນຳຂະແໜງການທີ່ກ່ຽວຂ້ອງຂອງລາວໄດ້ສຸມໃສ່ຊອກ
ສ່ອງທາງແກ້ໄຂພົບປະເຈລະຈາເຊັນສັນຍາ 2 ຝ່າຍກັບພາກສ່ວນກ່ຽວຂ້ອງປະເທດອ້ອມຂ້າງ ແລະ ໃນຂະນະດຽວກັນທາງເຈົ້າໜ້າທີ່ຂອງລາວກໍໄດ້ເອົາໃຈໃສ່ຢ່າງບໍ່ຫລົດລະໃນການຊອກຄົ້ນຈັບໂຕພວກທີ່ເຄື່ອນໄຫວຕົວະຕົ້ມຫລອກລວງເອົາແມ່ຍິງລາວຂ້າມໄປຂາຍໂຕຢູ່ຕ່າງປະເທດ ແລະ ໃນຂະນະດຽວກັນທາງເຈົ້າໜ້າທີ່ກໍໄດ້ຈັບກຸມພວກບໍ່ດີດັ່ງກ່າວນຳໄປປະຕິບັດລະບຽບກົດ ໝາຍມາແລ້ວນັບຈຳນວນບໍ່ໜ້ອຍ, ແຕ່ກໍຍັງບໍ່ເຄັດຫລາບ.

ເມື່ອເປັນແນວນີ້ ເຫັນວ່າເຈົ້າໜ້າທີ່ກ່ຽວຂ້ອງຕ້ອງໄດ້ເພີ່ມທະວີ ແລະ ໃຫ້ມີປະສິດທິຜົນກວ່າເກົ່າໃນນີ້ ສິ່ງສຳຄັນທາງເຈົ້າໜ້າທີ່ກ່ຽວຂ້ອງຂອງລາວໄດ້ຮຽກຮ້ອງມາຍັງທຸກພາກສ່ວນໂດຍສະເພາະອຳນາດການປົກຄອງຂັ້ນຮາກຖານລວມໄປເຖິງພໍ່ແມ່ຜູ້ປົກຄອງໃຫ້ຊ່ວຍເປັນຫູເປັນຕາສອດສ່ອງດູແລ, ບອກສອນລູກຫລານຂອງຕົນເພື່ອບໍ່ໃຫ້ຕົກເປັນເຫຍື່ອກຸ່ມແກ໊ງຄ້າມະນຸດຄືດັ່ງທີ່ເຫັນໃນປັດຈຸບັນ, ໂດຍໃຫ້ແຕ່ລະຄົນມີສະຕິລະວັງຕົວຕ້ານກົດອຸບາຍ, ເລ້ຫລຽມຂອງກຸ່ມຄົນບໍ່ດີດັ່ງກ່າວ ແລະ ພ້ອມກັນທຳມາຫາກິນດ້ວຍຄວາມບໍລິສຸດພຸດຜ່ອງຄືດັ່ງຜູ້ນຳພັກ-ລັດເຮົາໄດ້ອອກແຮງສັ່ງສອນຕະຫລອດມາ.