ໃນໄລຍະວັນທີ 11-12 ມິຖຸນານີ້, ທ່ານ
ທອງສິງ ທຳມະວົງ ນາຍົກລັດຖະມົນ ຕີ
ໄດ້ນຳພາຄະນະຜູ້ແທນ ສປປ
ລາວ ເຂົ້າຮ່ວມງານວາງສະແດງ ຈີນ-ອາຊີໃຕ້
ຄັ້ງທີ 3 ແລະ ງານຕະຫລາດນັດສິນຄ້າຂາເຂົ້າ-ຂາອອກຄຸນໝິງ ຄັ້ງທີ
23 (The 3rd China-South Asia Exposition and 23rd China
Kunming Import and Export Com modities Fair) ທີ່ນະຄອນຄຸນໝິງ ແຂວງຢຸນນານ ສປ
ຈີນ ແລະ ຜູ້ນຳຂອງບັນດາປະເທດພາກພື້ນອາຊີເຂົ້າຮ່ວມນຳດ້ວຍ.
ໃນໂອກາດນີ້, ທ່ານນາຍົກລັດຖະມົນຕີ ທອງສິງ
ທຳມະວົງ ໄດ້ຂຶ້ນກ່າວຄຳປາໄສ ໂດຍໄດ້ສະແດງຄວາມຊົມເຊີຍ ແລະ
ສະໜັບສະໜູນຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ”
(The Belt and the Road) ກໍຄືແລວທາງເສດຖະກິດເສັ້ນທາງສາຍໄໝ ແລະ ເສັ້ນທາງສາຍໄໝທາງທະເລ ໃນສະຕະວັດທີ 21 ຂອງພະນະທ່ານ
ສີຈິ້ນຜິງ
ປະທານປະເທດ ແຫ່ງ ສປ
ຈີນ ແລະ ການສ້າງຕັ້ງທະນາຄານການລົງທຶນພື້ນຖານໂຄງລ່າງອາຊີ (AIIB) ເຊິ່ງຈະກາຍເປັນອີກທາງເລືອກໜຶ່ງໃນການພັດທະນາພື້ນຖານໂຄງລ່າງ ແລະ
ສະໜັບສະໜູນການເຊື່ອມຈອດລະຫວ່າງພາກພື້ນ ແລະ ສາກົນ. ພະນະທ່ານ
ນາຍົກລັດຖະມົນຕີ ໄດ້ຕີລາຄາສູງຕໍ່ການຈັດງານວາງສະແດງ ແລະ ງານຕະຫລາດນັດວ່າ: ເປັນງານທີ່ມີຄວາມໝາຍສຳຄັນຍິ່ງ ເພື່ອສົ່ງເສີມ ແລະ
ຊຸກຍູ້ການພົວພັນຮ່ວມມືລະຫວ່າງ ສປ
ຈີນ ກັບບັນດາປະເທດໃນພາກພື້ນອາຊີ ແລະ ປະເທດອາຊຽນ
ລວມທັງ ສປປ ລາວ ໃຫ້ຂະຫຍາຍໂຕຂຶ້ນຢ່າງບໍ່ຢຸດຢັ້ງ.
ໂອກາດເຂົ້າຮ່ວມພິທີເປີດງານວາງສະແດງດັ່ງກ່າວ, ພະນະທ່ານ ທອງສິງ
ທຳມະວົງ
ຍັງໄດ້ພົບປະສອງຝ່າຍກັບທ່ານ ລີ່
ຢວນຊາວ ຮອງປະທານປະເທດ ແຫ່ງ ສປ
ຈີນ ແລະ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍຈີນ ແລະ ໄດ້ມີຄຳເຫັນວ່າ: ປັດຈຸບັນນີ້ ປະຊາຊົນລາວພວມກະກຽມສ້າງຜົນງານຕ້ອນຮັບວັນຊາດ
ຄົບຮອບ 40 ປີ ແລະ ກະກຽມດຳເນີນກອງປະຊຸມໃຫຍ່ ຄັ້ງທີ X
ຂອງພັກໃນຕົ້ນປີ 2016, ຝ່າຍລາວມີຄວາມຍິນດີຮ່ວມມືກັບຝ່າຍຈີນແບບຄູ່ຮ່ວມມືຍຸດທະສາດຮອບດ້ານສືບຕໍ່ຂະຫຍາຍໂຕເຂົ້າສູ່ລວງເລິກ.
ທ່ານຮອງປະທານປະເທດ ແຫ່ງ ສປ
ຈີນ ໄດ້ສະແດງຄວາມຂອບໃຈຕໍ່ທ່ານນາຍົກລັດຖະມົນຕີ ແລະ ຄະນະຜູ້ແທນລາວ
ທີ່ໄດ້ເຂົ້າຮ່ວມງານຄັ້ງນີ້ ແລະ ເຊື່ອໝັ້ນວ່າ: ຈະເປັນໂອກາດໃຫ້ແກ່ສອງຝ່າຍຮັດແໜ້ນ ແລະ ຊຸກຍູ້ການຮ່ວມມືຊ່ວຍເຫລືອເຊິ່ງກັນ
ແລະ ກັນຫລາຍຂຶ້ນບົນພື້ນຖານເປັນເພື່ອນບ້ານໃກ້ຄຽງທີ່ດີ ແລະ ເປັນຄູ່ຮ່ວມມືທີ່ດີ.
ງານວາງສະແດງ ແລະ ງານຕະຫລາດນັດດັ່ງກ່າວ
ໄດ້ຈັດຂຶ້ນເປັນປະຈຳທຸກໆປີ ທີ່ນະຄອນຄຸນໝິງ ແຂວງຢຸນນານ
ສປ ຈີນ ເຊິ່ງຫົວໜ່ວຍທຸລະກິດຂອງລາວທີ່ເຂົ້າຮ່ວມງານໃນຄັ້ງນີ້ລວມມີ 33 ບໍລິສັດ, ປະກອບດ້ວຍຫ້ອງວາງສະແດງສິນຄ້າຫລາຍກວ່າ 70 ຫ້ອງ.
No comments:
Post a Comment