ລາວຖືເອົາທ່າແຮງຈາກນ້ຳນຳມາພັດທະນາປະເທດ

ໃນວັນທີ 15 ກໍລະກົດນີ້, ຢູ່ໂຮງແຮມດອນຈັນພາເລດ ນະຄອນຫລວງວຽງຈັນ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດ ຖະກິດການຜະລິດ ແລະ ຈາລະຈອນ, ໄດ້ໃຫ້ກຽດເຂົ້າຮ່ວມເປັນປະທານກອງປະ ຊຸມເຜີຍແຜ່ກ່ຽວກັບການພັດທະ ນາໂຄງການໄຟຟ້ານ້ຳຕົກຂະໜາດໃຫຍ່ຢູ່ລາວ, ໂດຍສະເພາະແມ່ນໂຄງການໄຟຟ້ານ້ຳຕົກນ້ຳຂອງໄຊຍະບູລີ ແລະ ດອນສະໂຮງ, ເພື່ອປຶກສາຫາລືແລກປ່ຽນບົດຮຽນໃນຂັ້ນຕອນ, ວິທີການອອກແບບ ແລະ ການກໍ່ສ້າງ, ພ້ອມທັງການນຳໃຊ້ມາດຕະການທີ່ຈຳເປັນຕ່າງໆທີ່ລັດຖະບານ ແລະ ຜູ້ພັດທະນາໄດ້ປະຕິບັດແນ່ໃສ່ ຫລຸດຜ່ອນຜົນກະທົບດ້ານສິ່ງແວດ ລ້ອມ ແລະ ສັງຄົມ ແລະ ທັງເປັນການຊີ້ແຈງຕອບຂໍ້ຂ້ອງໃຈຂອງປະເທດສະມາຊິກ ຄະນະກຳມະການແມ່ນ້ຳຂອງ ແລະ ຄູ່ຮ່ວມພັດທະນາອື່ນໆ.

ຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ມີຄຳເຫັນກ່າວເປີດກອງປະຊຸມວ່າ: ໂຄງການໄຟຟ້ານ້ຳຕົກ ໄຊຍະບູລີເປັນເຂື່ອນຝາຍນ້ຳລົ້ນຂະໜາດໃຫຍ່ທີ່ມີຄວາມສຳຄັນຕໍ່ແຜນພັດທະນາພະລັງານໄຟຟ້າຂອງ ສປປ ລາວ ເພື່ອຂຸດຄົ້ນ ແລະເສີມຂະຫຍາຍທ່າແຮງຂອງລາວທີ່ມີແມ່ນ້ຳລຳເຊຫລາຍສາຍໃນການຜະລິດພະລັງງານ ໄຟຟ້າສະໜອງໃຫ້ ແກ່ການຊົມໃຊ້ຢູ່ພາຍໃນປະເທດ ແລະ ສົ່ງອອກເປັນສີນຄ້າ ແນໃສ່ສ້າງລາຍຮັບເພີ່ມໃຫ້ງົບປະມານແຫ່ງຊາດ, ປະກອບ ສ່ວນເຂົ້າໃນການພັດທະນາປະເທດຊາດໃຫ້ຫລຸດພົ້ນອອກຈາກຄວາມດ້ອຍພັດທະນາ ແລະ ມີພື້ນຖານ ວັດຖຸເຕັກນິກໃນການຫັນເປັນອຸດສະຫະກຳ ແລະ ທັນສະໄໝໃນຕໍ່ໜ້າ, ປັດຈຸບັນການກໍ່ສ້າງໂຄງການ ດັ່ງກ່າວແມ່ນມີຄວາມຄືບໜ້າຕາມແຜນທີ່ວາງໄວ້ທຸກປະການ, ທັງໄດ້ຮັບການສະໜັບສະໜູນ ຈາກປະຊາຊົນລາວບັນດາເຜົ່າ ແລະ ໄດ້ຮັບການຍ້ອງຍໍຈາກບັນດາເພື່ອນມິດຊາວ ຕ່າງປະເທດເປັນຢ່າງດີ, ແຕ່ແນວໃດກໍຕາມຍັງມີຄົນຈຳນວນໜຶ່ງບໍ່ທັນເຂົ້າໃຈແທດເໝາະກັບຄວາມ ເປັນຈິງໃນໂຄງການດັ່ງກ່າວແລະ ມີຄວາມຄິດເຫັນທີ່ແຕກຕ່າງ, ເຊິ່ງເກີດຈາກການບໍ່ທັນມາຮູ້, ມາເຫັນໂຄງການຕົວຈຶງ, ສະນັ້ນ ຈຶ່ງຂໍເຊີນຊວນບັນດາເພື່ອນເຫລົ່ານັ້ນຈົ່ງຊັບຊ້ອນເວລາມາຢ້ຽມ ຊົມເບິ່ງໂຄງການຕົວຈິງເພື່ອໃຫ້ມີຄວາມເຂົ້າໃຈທີ່ຖືກຕ້ອງ ແລະ ກອງປະຊຸມເທື່ອນີ້ຍັງໄດ້ຢັ້ງ ຢືນໃຫ້ເຫັນເຖິງຄວາມຈິງໃຈ, ຄວາມໂປ່ງໃສ ແລະ ຄວາມຮັບຜິດຊອບສູງຂອງລັດຖະບານ ແລະ ຜູ້ພັດທະນາ ເພື່ອຮັບປະກັນວ່າຈະບໍ່ມີຜົນກະທົບຂ້າມຜ່ານຊາຍແດນທີ່ສຳຄັນຮ້າຍແຮງໃດໆ, ພ້ອມທັງຊີ້ໃຫ້ເຫັນວ່າຂະບວນການປຶກສາຫາລືລ່ວງໜ້າຕາມສົນທິສັນຍາແມ່ນ້ຳຂອງປີ 1995 ນັ້ນຖ້າຫາກໄດ້ຮັບການປະຕິບັດຢ່າງຖືກຕ້ອງຕາມຈຸດປະສົງຂອງສັນຍາ ແລະ ດ້ວຍການຮ່ວມມືຢ່າງຈິງໃຈຈາກບັນ ດາປະເທດສະມາຊິກແລ້ວ ຈະຊ່ວຍໃຫ້ການພັດທະນານຳໃຊ້ນ້ຳໃນແມ່ນ້ຳຂອງເກີດຜົນປະໂຫຍດສູງສຸດຕໍ່ບັນດາ ປະເທດທີ່ເປັນພາຄີກໍຄືຕໍ່ອານຸພາກພື້ນນີ້, ຂະນະດຽວກັນກໍເປັນໂອກາດອັນດີໃຫ້ແກ່ຜູ້ຊ່ຽວຊານທີ່ມີຊື່ສຽງລະດັບໂລກ ທີ່ໄດ້ທຳການສຶກສາໂຄງການຢ່າງລະອຽດເລິກເຊິ່ງມາແລ້ວນັ້ນ, ໄດ້ສະເໜີຂໍ້ມູນຕ່າງໆຢ່າງໂປ່ງໃສ, ຈິງໃຈຕໍ່ສັງຄົມ, ໂດຍສະເພາະແມ່ນບັນຫາການໄຫລຂອງຕະກອນ ແລະ ການເຄື່ອນຍ້າຍຂອງປາ, ເຊິ່ງຍັງເປັນບັນຫາຕົ້ນຕໍ່ທີ່ສັງຄົມມີ ຄວາມເຫັນແຕກຕ່າງມາໂດຍຕະຫລອດ, ສະນັ້ນ ຫວັງວ່າຜ່ານກອງປະຊຸມເທື່ອນີ້ຈະຊ່ວຍໃຫ້ສາທາລະນະຊົນກໍຄືສັງ ຄົມມີຄວາມຮັບຮູ້ເຂົ້າໃຈຢ່າງມີພື້ນຖານວິທະຍາສາດວ່າການພັດທະນາທຸກໂຄງການໄຟຟ້ານ້ຳຕົກໃນແມ່ນ້ຳຂອງຕອນລຸ່ມແມ່ນຍຶດໝັ້ນບັນດາຫລັກການໃນສົນທິສັນຍາແມ່ນ້ຳຂອງປີ 1995 ແລະ ຮັບປະກັນຄວາມຍືນຍົງຕາມມາດຕະຖານສາກົນທີ່ຮັບຮູ້ກັນໃນປັດຈຸບັນ.

ກະຊວງພະລັງງານ ແລະ ບໍ່ແຮ່ ໃຫ້ຮູ້ວ່າ: ສຳລັບໂຄງການໄຟຟ້າໄຊຍະບູລີດັ່ງກ່າວມີມູນຄ່າການກໍ່ສ້າງປະມານ 3,8 ຕື້ໂດລາສະຫະລັດ, ມີກຳລັງການຕິດຕັ້ງຫລາຍກວ່າ  1200 ເມກາວັດ, ມາຮອດປັດຈຸບັນການກໍ່ສ້າງມີຄວາມຄືບໜ້າ ຫລາຍກວ່າ 50% ແລະ ຄາດວ່າຈະສຳເລັດໃນປີ 2019 ຢ່າງແນ່ນອນ.