ໃນຄ່ຳຄືນຂອງວັນທີ
23 ສິງຫາຜ່ານມາ,
ຢູ່ຫໍວັດທະນະທຳແຫ່ງຊາດ ນະ ຄອນຫລວງວຽງຈັນ ໄດ້ຈັດງານປະກວດ “ລາວ ຊຸບເປີ ໂມເດວ
2015” ໂດຍການເຂົ້າຮ່ວມຂອງທ່ານ ສາຍທອງ
ແກ້ວດວງດີ ຮອງເຈົ້າຄອງນະ ຄອນຫຼວງວຽງຈັນ ແລະ ມວນຊົນຊາວນະຄອນຫຼວງວຽງຈັນເຂົ້າຮ່ວມເປັນຈຳນວນຫລາຍ.
ໂຄງການປະກວດສຸດຍອດຊາຍແບບ, ນາງແບບ ແລະ ເດັກນ້ອຍໜ້າຮັກຄັ້ງນີ້, ມີຜູ້ເຂົ້າຮ່ວມແຂ່ງຂັນຫລາຍກວ່າ 300 ຄົນ, ທີ່ມາຈາກ 9 ຕົວເມືອງໃນທົ່ວນະຄອນຫຼວງວຽງຈັນ ແລະ ໄດ້ຄັດເລືອກມາເຫລືອພຽງ 42 ນ້ອງ,
ເຂົ້າໄປສູ່ຮອບສຸດທ້າຍ, ເພື່ອຄົ້ນຫາຜູ້ທີ່ຈະເປັນສຸດຍອດຊາຍແບບ, ນາງແບບ ແລະ ເດັກນ້ອຍໜ້າຮັກປະຈໍາປີ 2015 ແລະ ຜ່ານການແຂ່ງຂັນຜົນປາກົດວ່າ: ອັນດັບໜຶ່ງ ໄດ້ແກ່ L11 ນາງ
ຖາວອນ ສຸນາເຄນ ໄດ້ຮັບລາງວັນນາງແບບ ຊຸບເປີໂມເດລ
ແລະ ລາງວັນຂວັນໃຈມະຫາຊົນ ປະຈໍາປີ 2015 ພ້ອມຂັນລາງວັນ,
ມົງກຸດເພັດ, ສາຍສະພາຍ ລວມມູນຄ່າ 50
ລ້ານກີບ ແລະ ລາງວັນຊາຍແບບ ໄດ້ແກ່ M10 ທ້າວ ສຸຂະນິດ ອິນທະວົງ ໄດ້ຮັບຂັນລາງວັນ,
ສາຍສະພາຍ ມູນຄ່າ 20 ລ້ານກີບ.
ສ່ວນລາງວັນເດັກນ້ອຍຍິງໜ້າຮັກ ໄດ້ແກ່ SL3 ນາງ ສີລາທິບ ຈັນສີສຸລິຍະວົງ ອາຍຸ 6 ປີ,
ໄດ້ຮັບຂັນລາງວັນ ແລະ ເງິນມູນຄ່າ 10 ລ້ານກີບ ແລະ ເດັກຊາຍໜ້າຮັກແມ່ນ SM6 ທ້າວ ລີໂອ ວົງສະຫວ່າງ ອາຍຸ 6 ປີ,
ໄດ້ຮັບຂັນລາງວັນ
ແລະ ເງິນມູນຄ່າ 10 ລ້ານກີບ. ນອກນັ້ນ, ຍັງມີລາງວັນຂວັນໃຈມະຫາຊົນ, ລາງວັນຂວັນໃຈຊ່າງພາບຊາຍແບບ, ນາງແບບ ແລະ ເດັກນ້ອຍໜ້າຮັກນໍາອີກ.
ທ່ານຮອງເຈົ້າຄອງ ໄດ້ມີຄຳເຫັນໃນພິທີວ່າ: ງານປະກວດ ລາວຊຸບເປີໂມເດວ ແມ່ນໜຶ່ງໃນການເຄື່ອນໄຫວທາງດ້ານວັດທະນະທຳທີ່ມີເນື້ອໃນ ແລະ ມີຄວາມໝາຍສຳຄັນ, ໂດຍສືບເນື່ອງມາຈາກປີທີ່ຜ່ານມາ,
ເຫັນວ່າໄດ້ຮັບໝາກຜົນທີ່ໜ້າເພິ່ງພໍໃຈ ແລະ
ເປັນການສ້າງບັນຍາກາດທີ່ເບີກບານມ່ວນຊື່ນ ແລະ ທັງເປັນການເປີດໂອກາດໃຫ້ແກ່ຊາວໜຸ່ມ ໄດ້ມີເວທີສະແດງທັກສະ,
ຄວາມສາມາດ, ພອນສະຫວັນ ແລະ ນໍາໃຊ້ເວລາຫວ່າງໃຫ້ເປັນປະໂຫຍດ ເພື່ອຫ່າງໄກຈາກສິ່ງຫຍໍ້ທໍ້ຕ່າງໆ ແລະ
ເປັນການພັດທະນາວົງການບັນເທິງຂອງລາວໃຫ້ມີບາດກ້າວເຕີບໃຫຍ່ຂະຫຍາຍຕົວໃຫ້ທັນຍຸກທັນສະໄໝ
ເພື່ອຮອງຮັບການເຂົ້າຮ່ວມແຂ່ງຂັນໃນເວທີສາກົນ ແລະ ສໍາລັບຜູ້ທີ່ຊະນະເລີດໃນໂຄງການດັ່ງກ່າວປີນີ້ ແມ່ນຈະໄດ້ຮັບໃຊ້ສັງຄົມ ແລະ
ງານສໍາຄັນຕ່າງໆທີ່ລາວເປັນເຈົ້າພາບອີກດ້ວຍ.
No comments:
Post a Comment