ໃນລະຫວ່າງວັນທີ 24-28 ສິງຫາ 2015 ນີ້, ສະຫະພັນນັກຮົບເກົ່ານະຄອນຫລວງວຽງຈັນຮ່ວມກັບສະຫະພັນນັກຮົບເກົ່ານະຄອນໂຮ່ຈີມິງ
ແລະ ທະນາຄານ Vietinbank ໄດ້ປະສານສົມທົບກັບໂຮງໝໍປົວຕານະຄອນໂຮ່ຈີມິງດຳເນີນການກວດ,
ປິ່ນປົວ ແລະ ຜ່າຕັດຕາໂດຍບໍ່ເສຍຄ່າໃຫ້ແກ່ຜູ້ທຸກຍາກທ່ີເປັນແກ່ນຕາຂຸ້ນ,
ຕໍ້ຕາ ແລະ ອື່ນໆຂຶ້ນຢູ່ນະຄອນຫລວງວຽງຈັນ.
ເຊິ່ງມີຄະນະແພດໝໍຈາກໂຮງໝໍປິ່ນປົວຕາ
ນະຄອນໂຮ່ຈີມິງ ຈຳນວນ 24 ຄົນ, ນຳໂດຍທ່ານຮອງສາສະດາຈານ ດຣ. ເຈິ່ນແອ໊ງຕວ໋ນ,
ອຳນວຍການໂຮງໝໍດັ່ງກ່າວ ແລະ ໄດ້ປະສານສົມທົບກັບໂຮງໝໍປິ່ນປົວຕາຂອງລາວດຳເນີນໄດ້ຊ່ວຍຜ່າຕັດຕາໂດຍບໍ່ເສຍຄ່າໃຫ້ແກ່ຄົນເຈັບກວ່າ
70 ກໍລະນີທ່ີເປັນແກ່ນຕາຂຸ້ນມາຫລາຍປີແລ້ວ , ເຊິ່ງການຜ່າຕັດຄັ້ງນີ້ໄດ້ນຳເອົາແສງສະຫວ່າງ, ຄວາມດີໃຈລົ້ນເຫລືອ
ແລະ ຄວາມສຸກທ່ີຫາອັນປຽບບໍ່ໄດ້ມາໃຫ້່ຄົນເຈັບ, ແລະຄອບຄົວຂອງເຂົາເຈົ້າ.
ທ່ານ ນູສວມ ແສງສຸລິດ
ປີນີ້ອາຍຸ
75 ປີເປັນໜຶ່ງໃນຄົນເຈັບທ່ີໄດ້ຮັບການຜ່າຕັດແກ່ນຕາຂຸ້ນໂດຍບໍ່ເສຍຄ່າຈາກຄະນະແພດຫວຽດນາມ
ໃນຄັ້ງນີ້ໃຫ້ຮູ້ວ່າ: ຕົນເປັນແກ່ນຕາຂຸ້ນມາໄດ້ 7 ປີແລ້ວ, ເຮັດໃຫ້ການເຄື່ອນໄຫວໄປມາພົບກັບຄວາມຫຍຸ້ງຍາກຫລາຍ,
ລຳບາກຫລາຍ ແລະ ທັງສ້າງພາລະອັນໜັກໜ່ວງໃຫ້ຄອບຄົວ, ມາມື້ນີ້ຄະນະແພດຈາກຫວຽດນາມໄດ້ນຳເອົາແສງສະຫວ່າງມາສູ່ຕົນເອງອີກຄັ້ງໜຶ່ງໂດຍບໍ່ຄິດມາກ່ອນແລະດີໃຈຫລາຍ
ແລະ ຂໍຂອບໃຈນຳບັນດາຄະນະແພດຫວຽດນາມທ່ີໄດ້ຊ່ວຍນຳເອົາແສງສະຫວ່າງມາໃຫ້ຄົນຕາມືດຕາຟາງດັ່ງພວກເຮົາໄດ້ມອງເຫັນອີກເທື່ອໜຶ່ງ.
ນີ້ເປັນຄັ້ງທີ 4 ໃນຮອບ 8 ປີທ່ີໂຮງໝໍປິ່ນປົວຕານະຄອນໂຮ່ຈີມິງໄດ້ຈັດຄະນະແພດຜູ້ຊ່ຽວຊານມາກວດ,
ປິ່ນປົວ ແລະ ທຳການຜ່າຕັດແກ່ນຕາຂຸ້ນໂດຍບໍ່ເສຍຄ່າໃຫ້ແກ່ຜູ້ທຸກຍາກຢູ່ທ້ອງຖິ່ນຕ່າງໆຂອງລາວ.
ທ່ານ ເຈິ່ນແອ໊ງຕ໋ວນ ໃຫ້ຮູ້ວ່າ: ການມາກວດ,
ປິ່ນປົວ ແລະ ຜ່າຕັດຕາໃນຄັ້ງນີ້ບັນດາແພດຈາກໂຮງໝໍປິ່ນປົວຕານະຄອນໂຮ່ຈີມິງໄດ້ນຳໃຊ້ເຕັກນິກການຜ່າຕັດທ່ີທັນສະໄໝ,
ບາດແຜກວ້າງພຽງ 3 ມິລີແມັດ, ການຜ່າຕັດແຕ່ລະຄັ້ງຈະໃຊ້ເວລາປະມານ 10-15 ນາທີ.
ພາຍຫລັງການຜ່າຕັດ, ຕາມທຳມະດາຄົນເຈັບຈະສາມາດເຫັນແສງສະຫວ່າງໄດ້ພາຍໃນ
1 ມື້, ຕໍ່ຈາກນັ້ນກໍໃຫ້ບົວລະບັດຮັກສາ,
ໃສ່ຢາຕາພາຍໃນ 2 ອາທິດແລ້ວກໍສາມາດເຄື່ອນໄຫວໄປມາ
ແລະ ແນມເຫັນໄດ້ໃນສະພາບປົກກະຕິ.
ອຳນວຍການໂຮງໝໍຕາລາວໃຫ້ຮູ້ວ່າ: ນີ້ແມ່ນການຊ່ວຍເຫລືອທ່ີມີຄວາມໝາຍສຳຄັນຍິ່ງເຊິ່ງບໍ່ພຽງແຕ່ນຳເອົາແສງສະຫວ່າງມາສູ່ຜູ້ທຸກຍາກເທົ່ານັ້ນ,
ແຕ່ຍັງເຮັດໃຫ້ພວກເຂົາໄດ້ກັບມາມີຊີວິດແບບປົກກະຕິອີກຄັ້ງໜຶ່ງ,
ແລະ ສາມາດພັດທະນາຊີວິດການເປັນຢູ່ຂອງຕົນຫລຸດຜ່ອນພາລະແບກຫາບຂອງຄອບຄົວແລະສັງຄົມອີກດ້ວຍ.
ນອກຈາກໃຫ້ການກວດ, ປິ່ນປົວແລະຜ່າຕັດຕາໃຫ້ຜູ້ທຸກຍາກແລ້ວ, ຄະນະແພດດັ່ງກ່າວຍັງໄດ້ພົບປະແລກປ່ຽນປະສົບການໃນການກວດ,
ປິ່ນປົວ ແລະ ຜ່າຕັດຕາກັບແພດໝໍຂອງລາວອີກດ້ວຍເພື່ອຍົກລະດັບສູງວິຊາການໃຫ້ສູງຂຶ້ນ.
No comments:
Post a Comment