ນັກສຶກສາລາວ 37 ຄົນໄດ້ຮັບທຶນໄປສຶກສາຕໍ່ຢູ່ລັດເຊຍ

ນັກສຶກສາລາວ ຈຳນວນ 37 ຄົນ ໄດ້ຮັບທຶນໄປສຶກສາຕໍ່ຢູ່ປະ ເທດລັດເຊຍ, ໃນນັ້ນມີລະດັບປະລິນຍາຕີ 26 ຄົນ ແລະ ປະລິນຍາໂທ 11 ຄົນ, ໃນຂະແໜງບໍລິຫານ, ໄອທີ, ການປົກຄອງລັດ, ການພົວພັນສາກົນ, ການເງິນ, ສິນເຊື້ອ ແລະ ເສດຖະກິດ.

ທ່ານ ມີຄາຍອິນ ບາຣານົບ ເອກອັກຄະລັດຖະທູດລັດເຊຍ ປະຈຳລາວມີຄຳເຫັນໃນງານລ້ຽງສົ່ງນັກສຶກສາດັ່ງກ່າວທີ່ຈັດຂຶ້ນໃນວັນທີ 8 ກັນຍານີ້, ທີ່ສະຖານທູດຂອງຕົນໃນນະຄອນຫລວງວຽງຈັນຮູ້ວ່າ: ການສຶກສາແມ່ນຜົນສຳເລັດໃນການພັດທະນາປະເທດຊາດ, ເຊິ່ງລັດຖະບານລັດເຊຍໄດ້ເຫັນຄວາມສຳຄັນຂອງການສຶກສາໃນລາວຈຶ່ງໄດ້ໃຫ້ທຶນຊ່ວຍເຫລືອຈຳນວນໜຶ່ງແກ່ນັກສຶກສາຜູ້ທີ່ມີເງື່ອນໄຂ ແລະ ມາດຕະຖານຄົບຖ້ວນເພື່ອໄປສຶກສາຕໍ່ທີ່ປະເທດລັດເຊຍໄດ້ຢ່າງມີຄຸນນະພາບ ແລະ ຫລັງຈາກຮຽນຈົບແລ້ວຈະມີຄວາມຮູ້, ຄວາມສາມາດກັບມາພັດ ທະນາເສດຖະກິດ-ສັງຄົມຂອງຊາດ ແລະ ພັດທະນາຊັບພະຍາກອນມະນຸດຂອງລາວໃຫ້ມີຄວາມກ້າວໜ້າທຽບເທົ່າສາກົນ ແລະ ພາກພື້ນ. ພ້ອມກັນນີ້ ກໍຈະເປັນການປະກອບສ່ວນເຂົ້າໃນການຮັດແໜ້ນສາຍພົວພັນລະຫວ່າງລາວ-ລັດເຊຍໃຫ້ໜັກແໜ້ນຍິ່ງໆຂຶ້ນ.