laophatthananewspaper: ລາວ-ຫວຽດນາມເພີ່ມທະວີການຮ່ວມມືດ້ານຄົມມະນາຄົມຂົນສົ່ງ

ພິທີລົງນາມບົດບັນທຶກຄວາມເຂົ້າໃຈກ່ຽວກັບຍຸດທະສາດການຮ່ວມມືດ້ານຄົມມະນາຄົມ-ຂົນສົ່ງແຕ່ປີ 2016-2025 ແລະ ວິໄສທັດຮອດປີ 2030 ລະຫວ່າງລັດຖະບານລາວຕ່າງໜ້າໂດຍທ່ານ ດຣ ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ແລະ ຝ່າຍຫວຽດນາມ ໂດຍທ່ານ ດິງລາ ທັງລັດຖະມົນຕີວ່າການກະຊວງຄົມມະນາຄົມຂົນສົ່ງຫວຽດນາມ, ໄດ້ມີຂື້ນໃນວັນທີ 14 ກັນຍາ 2015 ນີ້, ທີ່ນະຄອນຫລວງວຽງຈັນ, ໂດຍການເຂົ້າຮ່ວມເປັນສັກຂີພິຍານຂອງທ່ານ ທອງສິງ ທຳມະວົງນາຍົກລັດຖະມົນຕີແຫ່ງ ສປປ ລາວ ແລະ ສະຫາຍ ຫງຽນເຕິນຢຸງ ນາຍົກລັດຖະມົນຕີແຫ່ງ ສສ ຫວຽດນາມ ເພື່ອໃຫ້ຂະແໜງກ່ຽວຂ້ອງຂອງສອງປະເທດນຳໃຊ້ເປັນບ່ອນອີງໃນການກຳນົດຍຸດທະສາດການຮ່ວມມືໄລຍະແຕ່ປີ 2016-2025 ແລະ ວິໄສທັດຮອດປີ 2030 ເພື່ອເສີມຂະຫຍາຍທ່າແຮງດ້ານທີ່ຕັ້ງ ແລະ ເງື່ອນໄຂທາງທຳມະຊາດຂອງສອງປະເທດໃຫ້ຫລາຍທີ່ສຸດ, ພິເສດແມ່ນທ່າແຮງທາງດ້ານທີ່ຕັ້ງເປັນໃຈກາງໃນການເຊື່ອມຈອດດ້ານຄົມມະນາຄົມ-ຂົນສົ່ງທາງບົກຂອງ

ລາວກັບບັນດາປະເທດພາກພື້ນ ແລະ ທ່າແຮງດ້ານທາງທະເລຂອງສສຫວຽດນາມໃນການເຊື່ອມຕໍ່ກັບສາກົນ, ກຳນົດເອົາປະເພດກາຄົມມະນາ ຄົມ-ຂົນສົ່ງທາງບົກລວມທັງທາງລົດໄຟຕາມບັນດາແລວທາງທີ່ເໝາະສົມກັບສະພາບເງື່ອນໄຂທາງທຳມະຊາດ, ສັງຄົມ, ຄວາມອາດສາມາດທາງດ້ານເສດຖະກິດຂອງແຕ່ລະແລວທາງເພື່ອສ້າງໃຫ້ເປັນບຸລິມະສິດຫລັກໃນການພັດ ທະນາຂະແໜງຄົມມະນາຄົມ-ຂົນສົ່ງເພື່ອເຊື່ອມຈອດລະຫວ່າງສອງປະເທດ, ກຳນົດເສັ້ນທາງເຊື່ອມຕໍ່ລະຫວ່າງສອງນະຄອນຫລວງວຽງຈັນກັບນະຄອນຫລວງຮ່າໂນ້ຍ ແລະ ບັນດາທ້ອງຖິ່ນຂອງສອງປະເທດລາວ-ຫວຽດນາມ.

ໄປພ້ອມໆກັບການວາງແຜນການພັດທະນາລະບົບຕາໜ່າງເສັ້ນທາງດ່ວນເຊື່ອມຈອດກັນໃນອະນາຄົດ, ກຳນົດທິດທາງການພັດທະນາໃຫ້ສອດຄ່ອງກັບຄວາມຕ້ອງການຂອງການຂະຫຍາຍຕົວດ້ານເສດຖະກິດ-ສັງຄົມແຕ່ລະໄລຍະ, ພ້ອມກັບການສ້າງໃໝ່ບາງເສັ້ນທາງທີ່ມີປະສິດທິຜົນດ້ານການລົງທຶນດ້ວຍການສົ່ງເສີມຮູບການລົງທຶນທີ່ເໝາະສົມແບບມີສ່ວນຮ່ວມລະຫວ່າງພາກລັດ ແລະ ພາກທຸລະກິດ(PPP), ອຳນວຍຄວາມສະດວກດ້ານການຂົນສົ່ງສິນຄ້າໂດຍສານຂ້າມແດນແລະຜ່ານແດນ, ກໍານົດຍຸດທະສາດພັດທະນາລະບົບການຂົນສົ່ງສິນຄ້າທາງບົກລວມທັງທາງລົດໄຟຈາກລາວຫລືຜ່ານລາວໄປສູ່ທ່າເຮືອຢູ່ຫວຽດນາມແລະ ການຂົນສົ່ງຈາກທ່າເຮືອຫວຽດນາມມາລາວແລະຜ່ານໄປປະເທດອື່ນໆໃຫ້ສຳເລັດເປັນລະບົບ ແລະ ເປັນຮູບປະທຳ, ສາມາດເຊື່ອມເຂົ້າເປັນລະບົບການຈໍລະຈອນແຈກຢາຍສິນຄ້າຂອງພາກພື້ນໃນປີ 2025. ໃນນັ້ນໃຫ້ເໜັ້ນໃສ່ການນຳໃຊ້ທ່າເຮືອຮອນລາ, ທ່າເຮືອຫວຸ່ງອ່າງ ແລະ ທ່າເຮືອຊວນຫາຍເປັນບຸລິມະສິດການສົ່ງເສີມການຂົນສົ່ງສິນຄ້າຈາກ ສປປ ລາວ ໄປຍັງປະເທດປາຍທາງອື່ນໆ, ພັດທະນາລະບົບການຂົນສົ່ງທາງອາກາດ, ເພີ່ມທະວີການເຊື່ອມຕໍ່ໃຫ້ຫລາຍຂຶ້ນ, ປະສານສົມທົບກັນເພີ່ມຕື່ມລະຫວ່າງອົງການຄຸ້ມຄອງລັດຂັ້ນສູນກາງ ແລະ ທ້ອງຖິ່ນແລະວາງແຜນຮ່ວມມືກັນດ້ານການຈັດຕັ້ງປະຕິບັດການກໍ່ສ້າງ ແລະ ຍົກລະດັບພະ ນັກງານຕາມແຜນຍຸດທະສາດພັດທະນາບຸກຄະລະກອນຂອງແຕ່ລະປະເທດ.