ທ່ານນາງ ປານີ
ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມຄັ້ງທີ
IV ຂອງປະທານລັດຖະສະພາໂລກ
(Fourth Conference of the Speakers of Parliament) ເຊິ່ງໄດ້ຈັດຂຶ້ນໃນລະຫວ່າງວັນທີ
31 ສິງຫາ-2 ກັນຍາ 2015 ຢູ່ສຳນັກງານໃຫຍ່ອົງການສະຫະປະຊາຊາດ (UN) ທີ່ນະຄອນນິວຢອກ, ສະຫະລັດອາເມລິກາ,
ໂດຍການເປັນເຈົ້າພາບຮ່ວມລະຫວ່າງສະຫະພັນລັດຖະສະພາສາກົນ
(IPU) ແລະ ສປຊ.
ກອງປະຊຸມປະທານລັດຖະສະພາໂລກ
ຄັ້ງນີ້ ໄດ້ໄຂຂຶ້ນໂດຍການເຂົ້າຮ່ວມເປັນກຽດຂອງທ່ານ ບັນ
ກີ ມູນ
ເລຂາທິການໃຫຍ່
UN ແລະ ມີຄະນະຜູ້ແທນຈາກ 100 ກວ່າປະເທດສະມາຊິກເຂົ້າຮ່ວມພາຍໃຕ້ ຫົວຂໍ້ຕົ້ນຕໍຂອງກອງປະຊຸມແມ່ນສົ່ງເສີມປະຊາທິປະໄຕ ເພື່ອສັນຕິພາບ ແລະ ການພັດທະນາແບບຍືນຍົງ: ສ້າງໂລກທີ່ປະຊາຊົນຕ້ອງການ ເຊິ່ງໃນນັ້ນ ໄດ້ລົງເລິກປະກອບຄຳເຫັນໃສ່ເນື້ອໃນ ກໍຄືທິດທາງໃນການຈັດຕັ້ງຜັນຂະຫຍາຍເປົ້າໝາຍການພັດທະນາແບບຍືນຍົງ (SDGs) ເຊິ່ງ ສປຊ ຈະໄດ້ຮັບຮອງເອົາໃນມໍ່ໆນີ້ ແລະ ໄດ້ປຶກສາຫາລືກັນກ່ຽວກັບການເພີ່ມທະວີການປະຕິບັດໜ້າທີ່ຕິດຕາມການກວດກາຂອງລັດຖະສະພາໃຫ້ໝັກແໜ້ນ ແລະ ມີປະສິດທິພາບກວ່າເກົ່າ.
ກອງປະຊຸມໄດ້ຮັບຮອງເອົາຖະແຫລງການຂອງກອງປະຊຸມຄັ້ງນີ້ ເພື່ອນຳໄປຈັດຕັ້ງຜັນຂະຫຍາຍຢູ່ໃນລັດຖະສະພາສະມາຊິກ
ໄອພີຢູ,
ກໍຄືເພື່ອນຳສະເໜີຕໍ່ກອງປະຊຸມສະມັດຊາໃຫຍ່ສະຫະປະຊາຊາດ ທີ່ຈະໄຂຂຶ້ນໃນທ້າຍເດືອນກັນຍານີ້ ທັງນີ້ ກໍເພື່ອຮັບປະກັນການມີສ່ວນຮ່ວມຢ່າງຕັ້ງໜ້າຂອງລັດຖະສະພາໃນພາລະກິດລວມຂອງ ສປຊ ໂດຍສະເພາະແມ່ນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ.
ໃນວັນທີ 29-30 ສິງຫາ ໄດ້ມີກອງປະຊຸມຂອງປະທານລັດຖະສະພາເພດຍິງ, ເຊິ່ງໄດ້ພິຈາລະນາສະພາບການຕົວຈິງ, ຜົນສຳເລັດທີ່ບັນລຸໄດ້ໃນການຈັດຕັ້ງປະຕິບັດການສົ່ງເສີມບົດບາດແມ່ຍິງໃນຂອບເຂດທົ່ວໂລກ, ໃນວຽກງານການເມືອງ, ເສດຖະກິດ, ວັດທະນະທຳ-ສັງຄົມ, ໃນໄລຍະການຈັດຕັ້ງປະຕິບັດເປົ້າໝາຍສະຫະສະຫວັດເພື່ອການພັດທະນາ (MDGs) ຜ່ານມາ ພ້ອມທັງວາງທິດທາງເພື່ອກ້າວສູ່ການບັນລຸເປົ້າໝາຍໃນອະນາຄົດ ເຊິ່ງສະຫະພັນລັດຖະສະພາສາກົນ
ໄດ້ວາງເປົ້າໝາຍໃຫ້ລັດຖະສະພາສະມາຊິກ ສູ້ຊົນບັນລຸຈຳນວນສະມາຊິກລັດຖະສະພາທີ່ເປັນເພດຍິງໃຫ້ໄດ້ 30% ຂຶ້ນໄປ.
ໃນນາມຄະນະຜູ້ແທນລາວ, ທ່ານປະທານສະພາແຫ່ງຊາດ ໄດ້ຂຶ້ນກ່າວປາໄສຕໍ່ກອງປະຊຸມຄົບຄະນະ ໂດຍໄດ້ເນັ້ນໜັກຄວາມໝາຍຄວາມສຳຄັນຂອງສັນຕິພາບ ແລະ ປະຊາທິປະໄຕຕໍ່ການພັດທະນາ ແລະ ຍົກສູງລະດັບຊີວິດການເປັນຢູ່ຂອງປະຊາຊົນ, ພ້ອມນັ້ນ ກໍໄດ້ແຈ້ງໃຫ້ຊາບກ່ຽວກັບຜົນການຈັດຕັ້ງປະຕິບັດເປົ້າໝາຍສະຫັດສະວັດ ເພື່ອການພັດທະນາຢູ່ ສປປ
ລາວ ແລະ ສະແດງຄວາມພ້ອມທີ່ຈະຈັດຕັ້ງຜັນຂະຫຍາຍເປົ້າໝາຍການພັດທະນາແບບຍືນຍົງ ເຂົ້າໃນການພັດທະນາເສດຖະກິດ-ສັງຄົມແຫ່ງຊາດຂອງ ສປປ
ລາວ ແລະ ໄດ້ແຈ້ງໃຫ້ທີ່ປະຊຸມຊາບກ່ຽວກັບການກະກຽມສ້າງຕັ້ງສະພາປະຊາຊົນທ້ອງຖິ່ນ ເຊິ່ງຖືເປັນວຽກງານທີ່ສຳຄັນໜຶ່ງໃນການເສີມຂະຫຍາຍລະບອບປະຊາທິປະໄຕ ປະຊາຊົນ
ຢູ່ສປປ ລາວ.
No comments:
Post a Comment