ກົມອຸຕຸນິຍົມ ແລະ
ອຸທົກກະສາດ
ແຈ້ງໃຫ້ຮູ້ວ່າ: ບໍລິເວນຄວາມກົດດັນສູງຂອງອາກາດເຢັນຈາກຕອນໃຕ້ຂອງຈີນ ຈະມີທ່າອ່ຽງເພີ່ມກຳລັງແຮງຂຶ້ນແຜ່ລົງມາປົກຄຸມຢູ່ທົ່ວທຸກພາກຂອງລາວ, ສົມທົບກັບສອງກະແສລົມຕາເວັນອອກສ່ຽງເໜືອພັດປົກຄຸມພາກເໜືອ, ສ່ວນພາກກາງ ແລະ ພາກໃຕ້ກະແສລົມຕາເວັນຕົກສ່ຽງໃຕ້ພັດປົກຄຸມເປັນສ່ວນໃຫຍ່, ເຊິ່ງລັກສະນະເຊັ່ນນີ້ ຈະເຮັດໃຫ້ອຸນຫະພູມອາກາດເຢັນລົງພ້ອມມີໝອກບາງປົກຫຸ້ມໃນຕອນເຊົ້າ ແລະ ຈະມີຝົນຕົກຟ້າຄະນອງກະຈາຍເປັນບໍລິເວນກ້ວາງ ແລະ ຕົກປານກາງເປັນບາງໂອກາດຢູ່ບາງທ້ອງຖິ່ນໃນແຕ່ລະພາກ. ຈາກນັ້ນ ກາງຫາທ້າຍອາທິດຮ່ອງມໍລະສຸມຕາເວັນຕົກສ່ຽງໃຕ້ຈະມີກຳລັງແຮງເພີ່ມຂຶ້ນພັດຜ່ານຢູ່ແຂວງພາກກາງຫາພາກໃຕ້ຂອງລາວ, ຊຶ່ງຈະເຮັດໃຫ້ມີຝົນຕົກຟ້າຄະນອງຫລາຍຂຶ້ນໃນແຕ່ລະພາກ ແລະ ຕົກໃນລະດັບປານກາງຫາຕົກໜັກພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນ ນັບທັງນະຄອນຫລວງວຽງຈັນ.
ສະພາບອາກາດໃນໜຶ່ງອາທິດຕໍ່ໜ້າ, ໂດຍທົ່ວໄປອາກາດຈະເຢັນລົງຢູ່ແຕ່ລະພາກພ້ອມມີໝອກບາງປົກຫຸ້ມໃນຕອນເຊົ້າ ແລະ ອາກາດຈະໜາວຢູ່ແຂວງພາກເໜືອດ້ານຕາເວັນອອກ, ແຂວງໄຊສົມບູນ ແລະ ພູພຽງບໍລະເວນປາກຊ່ອງ ພ້ອມມີໝອກໜາປົກຫຸ້ມຢູ່ບາງທ້ອງຖິ່ນ. ໃນລະຫວ່າງວັນທີ
10-13 ຕຸລານີ້ ຈະມີຝົນຕົກຟ້າຄະນອງຫລາຍຂຶ້ນ ພ້ອມຈະມີລົມພັດແຮງເປັນບາງໂອກາດ ຍ້ອນລົມມໍລະສຸມຕາເວັນຕົກສ່ຽງໃຕ້ຈະມີທ່າອ່ຽງເພີ່ມກຳລັງແຮງຂຶ້ນພັດປົກຄຸມ.
No comments:
Post a Comment