ກອງປະຊຸມໂຕະມົນລະດັບສູງ ຄັ້ງທີ 12 ພາຍໃຕ້ຫົວຂໍ້: “ເພີ່ມທະວີການເປັນຄູ່ຮ່ວມທີ່ມີປະສິດທິຜົນ ໃນການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ ຄັ້ງທີ
VIII, ເພື່ອນຳພາປະເທດຊາດຫລຸດພົ້ນອອກຈາກສະຖານະພາບດ້ອຍພັດທະນາ ພາຍໃນປີ
2020, ໄດ້ໄຂຂຶ້ນຢ່າງເປັນທາງການໃນວັນທີ
27 ພະຈິກນີ້, ທີ່ສູນຝຶກອົບຮົມ ແລະ ການຮ່ວມມືລາວ-ຍີ່ປຸ່ນ(ICTC) ນະຄອນ ຫລວງວຽງຈັນ, ໂດຍການເປັນປະທານຂອງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງຕ່າງປະເທດ ແລະ ທ່ານ
ຮາວລຽງ ຊູ ຜູ້ຊ່ວຍເລຂາທິການໃຫຍ່ ອົງການສະຫະປະຊາຊາດ ແລະ ໃຫ້ກຽດເຂົ້າຮ່ວມຂອງທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ
ສປປ ລາວ
ທ່ານນາງ ເຮເລັນ ຄລາກ
ຮອງເລຂາທິການໃຫຍ່ອົງການສະຫະປະຊາຊາດ, ຜູ້ອຳນວຍການໃຫຍ່ອົງການສະຫະປະຊາຊາດ ເພື່ອການພັດທະນາ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ເປັນເວທີປຶກສາຫາລື ແລະ ແຈ້ງສະພາບການພັດທະນາຂອງ ສປປ
ລາວ ໃຫ້ບັນດາຄູ່ຮ່ວມພັດທະນາໄດ້ຮັບຊາບຄື: ລາຍງານຜົນສຳເລັດ ແລະ ບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VII ແລະ ກຳນົດເປົ້າໝາຍບູລິມະສິດຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ
VIII, ລາຍງານກ່ຽວກັບຄວາມຄືບໜ້າໃນການຈັດຕັ້ງປະຕິບັດເປົ້າໝາຍສະຫະສະວັດດ້ານການພັດທະນາ ແລະ ສະເໜີກ່ຽວກັບການຈັດຕັ້ງຜັນຂະຫຍາຍເປົ້າໝາຍການພັດທະນາແບບຍືນຍົງເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII
2016-2020, ນຳສະເໜີບັນດາມາດຕະການ ແລະ ລະດົມຂົນຂວາຍທຶນ ຮອນຂອງແຕ່ລະຂະແໜງການເຂົ້າໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ
VIII ໃຫ້ມີປະສິດທິຜົນເພື່ອນຳພາປະເທດຊາດໃຫ້ຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ
2020 ແລະ ທົບທວນຄືນໝາກຜົນ ແລະ ບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດວຽກງານຂະບວນການໂຕະມົນຢູ່ລາວ ໃນຊ່ວງໄລຍະ 15 ປີຜ່ານມາ ແລະ ທິດທາງແຜນການໃນຕໍ່ໜ້າ.
ໃນໂອກາດນີ້, ທ່ານນາຍົກລັດຖະມົນຕີ ທອງສິງ ທຳມະວົງ ໄດ້ມີຄຳເຫັນວ່າ: ສປປ ລາວ ໄດ້ມີຄວາມພະຍາຍາມ, ເອົາໃຈໃສ່ຢ່າງຈິງຈັງໃນການແກ້ໄຂຄວາມທຸກຍາກຂອງປະຊາຊົນ ແລະ ການສ້າງພື້ນຖານປະຖົມປັດໃຈ ເພື່ອນຳເອົາປະເທດຊາດຫລຸດພົ້ນອອກຈາກສະຖານະພາບດ້ອຍພັດທະນາ ແລະ ກ້າວໄປຕາມທິດພັດທະນາແບບຍືນຍົງ, ໃນນັ້ນ ອັນພົ້ນເດັ່ນແມ່ນ ລັດຖະບານໄດ້ຈັດຕັ້ງປະຕິບັດນະໂຍບາຍສາມສ້າງຄື: ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ເພື່ອແນໃສ່ເພີ່ມທະວີຍົກສູງຄວາມຮັບຜິດຊອບ ແລະ ສິດອຳນາດໃຫ້ແກ່ທ້ອງຖິ່ນຫລາຍຂຶ້ນ. ນອກນີ້, ຍັງໄດ້ສືບຕໍ່ປະຕິບັດບັນດານະໂຍບາຍຕ່າງໆເຊັ່ນ: ການຮັກສາສະຖຽນລະພາບການເຕີບໂຕທາງດ້ານເສດຖະກິດ, ການພັດທະນາຊັບພະຍາກອນມະນຸດ, ການຫັນເປັນອຸດສາຫະກຳທັນສະໄໝ,
ການປົກປັກຮັກສາສິ່ງແວດລ້ອມແບບຍືນຍົງ ແລະ ທ່ານນາຍົກລັດຖະມົນຕີ ທອງສິງ ທຳມະວົງ ໄດ້ຖືໂອກາດນີ້ກ່າວສະແດງຄວາມຂອບໃຈ ບັນດາປະເທດເພື່ອນມິດ, ອົງການຈັດຕັ້ງສາກົນ, ກໍຄືຄູ່ຮ່ວມພັດທະນາ ທີ່ໄດ້ໃຫ້ການສະໜັບສະໜູນດ້ານທຶນ ຮອນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນໄລຍະຜ່ານມາ
ແລະ ຫວັງວ່າບັນດາຄູ່ຮ່ວມພັດທະນາຍັງຈະສືບຕໍ່ໃຫ້ການສະໜັບສະໜູນ ສປປ ລາວ
ເພື່ອບັນລຸເປົ້າໝາຍການພັດທະນາ.
ພ້ອມນີ້, ກອງປະຊຸມ ຍັງໄດ້ມີພິທີລົງນາມຖະແຫລງການວຽງຈັນ ວ່າດ້ວຍການເປັນຄູ່ຮ່ວມ ເພື່ອການພັດທະນາ ທີ່ມີປະສິດທິຜົນ, ໂດຍຕາງໜ້າໃຫ້ລັດຖະບານລາວແມ່ນທ່ານ ສະເຫລີມໄຊ ກົມມະສິດ ລັດຖະມົນຕີຊ່ວຍວ່າການກະຊວງການຕ່າງປະເທດ ແລະ ຕາງໜ້າໃຫ້ຄູ່ຮ່ວມພັດທະນາແມ່ນທ່ານນາງ ຄາອາຣີນາ ອິມໂມເນັນ ຜູ້ປະສານງານອົງການສະຫະປະຊາຊາດ ທັງເປັນຜູ້ຕາງໜ້າອົງການ ສປຊ
ເພື່ອການພັດທະນາປະຈຳລາວ, ເຊິ່ງການລົງນາມຄັ້ງນີ້ ກໍເພື່ອຜັນຂະຫຍາຍປະສິດທິຜົນຂອງການຊ່ວຍເຫລືອ ມາເປັນການພັດທະນາ ທີ່ມີການຄົ້ນຄວ້າຮ່ວມກັນລະຫວ່າງ ລັດຖະບານກັບຄູ່ຮ່ວມພັດທະນາ, ສຳລັບເນື້ອໃນຂອງຖະແຫລງການແມ່ນຍັງຮັກສາ 5 ຫລັກການເດີມ ແລະ ບວກ
3 ຫລັກການໃໝ່ເຂົ້າຕື່ມຄື:
ການລະດົມທຶນພາຍໃນ,
ການຮ່ວມມືແບບໃຕ້-ໃຕ້, ການຮ່ວມມືສາມຫລ່ຽມ ແລະ ການແລກປ່ຽນຄວາມຮູ້ ແລະ ບົດບາດຂອງພາກທຸລະກິດເອກກະຊົນ ເພື່ອເປັນຄູ່ຮ່ວມໃນການພັດທະນາ.
No comments:
Post a Comment