ໃນວັນທີ
3 ທັນວານີ້,ກະຊວງປ້ອງກັນປະເທດໄດ້ຈັດພິທີໂຮມຊຸມນຸມເພື່ອສະເຫລີມສະຫລອງວັນຊາດທີ
2 ທັນວາຄົບຮອບ 40 ປີ(2 ທັນວາ1975-2ທັນວາ 2015) ຂຶ້ນທີ່ກະຊວງຂອງຕົນ,ພາຍໃຕ້ການເປັນປະທານຂອງທ່ານພົນໂທ
ແສງນວນ ໄຊຍະລາດລັດຖະມົນຕີວ່າການກະຊວງປ້ອງກັນປະເທດ, ມີບັນດາຄະນະນຳກະຊວງ, ນັກຮົບປະຕິວັດອາວຸໂສບຳນານ, ນາຍ
ແລະ ພົນທະຫານອ້ອມຂ້າງກະຊວງເຂົ້າຮ່ວມເປັນຈໍານວນຫລາຍ.
ທ່ານລັດຖະມົນຕີວ່າການກະຊວງປ້ອງກັນປະເທດໄດ້ກ່າວຄໍາປາໃສຕໍ່ພິທີອັນມີຄວາມໝາຍສໍາຄັນນີ້ວ່າ: ຊາດລາວແມ່ນຊາດໜຶ່ງ, ທີ່ມີປະຫວັດສາດອັນຍາວນານຫລາຍພັນປີ, ມີມູນເຊື້ອທີ່ສະ ຫງ່າອົງອາດ
ແຫ່ງການຕໍ່ສູ້ຕ້ານການຮຸກຮານຂອງສັດຕູຈາກພາຍນອກ, ມີມູນເຊື້ອດຸໝັ່ນຂະຫຍັນພຽນໃນການສ້າງສາພັດທະນາ, ໂດຍສືບທອດມູນເຊື້ອອັນກ້າເກັ່ງຂອງບັນພະບູລຸດນັ້ນປະຊາຊົນລາວບັນດາເຜົ່າພາຍໃຕ້ການນຳພາຂອງພັກປະຊາຊົນປະຕິວັດລາວໄດ້ສາມັກຄີກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະຄອບຄອງຂອງຈັກກະພັດລ່າເມືອງຂຶ້ນທັງແບບເກົ່າ ແລະ ໃໝ່, ສາມາດປົດປ່ອຍປະເທດຊາດຢ່າງມີໄຊ
ແລະສ້າງຕັ້ງສາທາລະນະລັດປະຊາທິປະໄຕປະຊາຊົນລາວຢ່າງສະຫງ່າຜ່າເຜີຍໃນວັນທີ 2 ທັນວາ 1975, ລັດປະຊາທິປະໄຕແມ່ນລັດ ທີ່ເກີດຈາກການຕໍ່ສູ້ເສຍສະຫລະອັນໃຫຍ່ຫລວງຂອງປະຊາຊົນລາວບັນດາເຜົ່າ, ລັດທີ່ມາຈາກປະຊາຊົນ, ລັດແຫ່ງອຳນາດຂອງປະຊາຊົນ ແລະ ເພື່ອປະຊາຊົນ, ເຊິ່ງປະທານ ໄກສອນພົວວິຫານ
ໄດ້ຕີລາຄາວັນທີ
2 ທັນວາ 1975 ວ່າ: ບໍ່ທັນມີເວລາໃດທີ່ປະຊາຊົນເຮົາ,ເຊິ່ງເປັນຜູ້ສ້າງປະຫວັດສາດຂອງຊາດນັ້ນໄດ້ຍາດເອົາໄຊຊະນະສົມບູນ, ເຖິງຖ່ອງ ແລະບໍລິບູນໄດ້ຢ່າງສະຫງ່າລາສີຄືແນວນີ້ຈັກເທື່ອ. ໄຊຊະນະນັ້ນບໍ່ສະເພາະແຕ່ໄດ້ຟື້ນຟູຄວາມເປັນເອກະລາດຂອງປະເທດເຮົາຫາກຍັງເປັນຄັ້ງທຳອິດທີ່ປະຊາຊົນບັນດາເຜົ່າຜູ້ເຄີຍດຳລົງຊີວິດເປັນທາດໄດ້ກາຍມາເປັນເຈົ້າຂອງແທ້ຈິງຂອງຊາດໜຶ່ງທີ່ມີເອກະລາດ,ມີອິດສະຫລະພາບຢ່າງສົມບູນ ແລະພວມກ້າວຂຶ້ນສັງຄົມນິຍົມ,ເຮັດໃຫ້ຄວາມມຸ້ງຫວັງອັນແຮງກ້າຂອງປວງຊົນລາວກໍຄືຂອງມວນມະນຸດປະກົດເປັນຈິງຢູ່ບົນຜືນແຜນດິນອັນແສນຮັກຂອງພວກເຮົາ”. ພ້ອມນີ້ທ່ານລັດຖະ ມົນຕີປ້ອງກັນປະເທດ,ຍັງໄດ້ຍົກໃຫ້ເຫັນເຖິງຜົນສຳເລັດຕະຫລອດໄລຍະ 40 ປີແຫ່ງການປົກປັກຮັກສາ ແລະສ້າງສາພັດທະນາປະເທດຊາດ.ໂດຍສະເພາະແມ່ນກໍາລັງກອງທັບປະຊາຊົນປະຕິວັດລາວ,ເວລາໃດກໍເຊື່ອໝັ້ນຕໍ່ການນຳພາຂອງພັກ, ຕໍ່ກຳລັງອັນມະຫາສານທີ່ບໍ່ເຫືອດແຫ້ງຂອງມະຫາຊົນ,ຈະສືບຕໍ່ເພີ່ມທະວີຄວາມຈົງຮັກພັກດີ ແລະ ເຮັດທຸກສິ່ງທຸກຢ່າງ ເພື່ອຜົນປະໂຫຍດຂອງປະຊາຊົນ ແລະຂອງປະເທດຊາດ,ສືບຕໍ່ເພີ່ມທະວີຄວາມສາມັກຄີເປັນອັນໜຶ່ງອັນດຽວຢູ່ອ້ອມຂ້າງພັກ, ເສີມຂະຫຍາຍມູນເຊື້ອກອງທັບວິລະຊົນຂອງຊາດລາວວິລະຊົນ, ຄົນລາວພິລະອາດຫານ, ກ້າວຂຶ້ນສູ່ແບບແຜນ ແລະທັນສະໄໝ
ແລະປະກອບສ່ວນເຂົ້າໃນພາລະກິດປ່ຽນແປງໃໝ່ ແລະສ້າງສາພັດທະນາປະເທດຊາດໃຫ້ຈະເລີນກ້າວໜ້າ.
No comments:
Post a Comment