ຄຳເຫັນຂອງທ່ານຮອງປະທານຄະນະກຳມາທິການພັດທະນາ ແລະປະຕິຮູບເສດຖະກິດແຫ່ງຊາດຢູ່ໃນພິທີຖະແຫລງຂ່າວຕໍ່ສື່ມວນຊົນພາຍຫລັງພິທີວາງສີລາລືກໂຄງການກໍ່ສ້າງເສັ້ນທາງລົດໄຟລາວ-ຈີນ ໃນເຊົ້າວັນທີ 2 ທັນວານີ້ຢູ່ນະຄອນຫລວງວຽງຈັນ ໄດ້ຢືນຢັນວ່າ: ໂຄງການປະຫວັດສາດນີ້ບໍ່ພຽງແຕ່ແມ່ນສັນຍາລັກຂອງການພົວພັນຮ່ວມມືລະຫວ່າງລາວ-ຈີນ
ເທົ່ານັ້ນ, ມັນຍັງເປັນໂຄງ ການຄ້ຳຊູໃຫ້ການພັດທະນາເສດຖະກິດສອງປະເທດຂະຫຍາຍຕົວແຂງແຮງ ແລະວ່ອງໄວຂຶ້ນ ໂດຍສະເພາະຈະຊ່ວຍຍົກສູງປະສິດທິພາບການຂົນສົ່ງສິນຄ້າ ແລະຜູ້ໂດຍສານລະຫວ່າງທ້ອງຖິ່ນ ແລະອອກຕ່າງປະເທດດີຂຶ້ນຫລາຍເທົ່າ ແລະຈະປະກອບສ່ວນສຳຄັນເຂົ້າໃນການຮັດແໜ້ນສາຍພົວພັນມິດຕະພາບ ແລະຄູ່ຮ່ວມມືຍຸດ
ທະສາດຮອບດ້ານຂອງສອງປະເທດໃຫ້ແໜ້ນແຟ້ນຍິ່ງຂຶ້ນ ແລະຈະເປັນກຳລັງແຮງອັນໃໝ່ເພື່ອການພັດທະນາເສດຖະກິດໃນເຂດພາກພື້ນອາຊີຕາເວັນສຽງໃຕ້ ໂດຍສະເພາະການພົວພັນການຄ້າ, ການທ່ອງທ່ຽວ ແລະການລົງທຶນ, ປະກອບສ່ວນສ້າງວຽກເຮັດງານທຳຢ່າງຫລວງຫລາຍໃຫ້ປະຊາຊົນສອງປະເທດ ແລະນຳມາພັດທະນາຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນ.
ທ່ານຮອງປະທານຄະນະກຳມາທິການດັ່ງກ່າວໃຫ້ຮູ້ວ່າ: ໂຄງການປະຫວັດສາດຂອງສອງປະເທດທີ່ຈະເລີ່ມຈັດຕັ້ງປະຕິບັດນີ້ມັນເປັນໂຄງການທີ່ມີຄວາມໝາຍ ແລະຍຸດທະສາດຍາວນານ ເພື່ອເຮັດບົດບາດໃນການກໍ່ສ້າງເຄືອຂ່າຍເສັ້ນທາງລົດໄຟເຊື່ອມຕໍ່ປະເທດຕ່າງໆໃນທະວີບອາຊີດ້ວຍກັນ ແລະກະຕຸກຊຸກຍູ້ການພັດທະນາພື້ນຖານໂຄງລ່າງຂອງບັນດາປະເທດໃນພາກພື້ນໃຫ້ເຊື່ອມຈອດກັນໄວຂຶ້ນ.
ໂຄງການລົດໄຟລາວ-ຈີນ ແມ່ນເລີ່ມຈາກຈຸດຊາຍແດນບໍ່ເຕັນ-ບໍ່ຫານຂອງສອງປະເທດລວມມີຄວາມຍາວປະມານ 418 ກິໂລແມັດ, ເຂົ້າມາຜ່ານຫລາຍແຂວງຂອງລາວເຊັ່ນ: ຫລວງນ້ຳທາ, ອຸ ດົມໄຊ, ຫລວງພະບາງ, ແຂວງວຽງຈັນ ເຂົ້າມາສູ່ນະຄອນຫລວງວຽງຈັນ ເຊິ່ງການກໍ່ສ້າງຈະມີຂົວ ແລະອຸມົງກວມເອົາ 60% ຂອງຄວາມຍາວເສັ້ນທາງ, ຄາດວ່າຈະມີມູນຄ່າການກໍ່ສ້າງສູງເກືອບ 40 ຕື້ຢວນ (ສະກຸນເງິນຈີນ) ເຊິ່ງເປັນການລົງທຶນຮ່ວມຂອງສອງປະເທດໃນອັດຕາສ່ວນລາວ 30% ແລະຈີນ 70%, ຈະສ້າງເປັນທາງປະເພດດ່ຽວ ໂດຍໃຊ້ລະບົບຂັບເຄື່ອນດ້ວຍພະລັງງານໄຟຟ້າດ້ວຍຄວາມໄວ
160 ກິໂລແມັດຕໍ່ຊົ່ວໂມງ, ຄາດວ່າການກໍ່ສ້າງຈະໃຫ້ສຳເລັດລົງຢ່າງສົມບູນໃນປີ
2020.
No comments:
Post a Comment