ໃນວັນທີ 7 ມັງກອນນີ້, ທ່ານ ຄຳປ່ຽນ
ອິນທະລືຊາ ຮອງປະທານອົງການພັດທະນາບໍລິຫານຕົວເມືອງ (ອພບ) ໄດ້ອອກມາຕອບຂໍ້ຂ້ອງໃຈຂອງປະຊາຊົນຜ່ານໂທລະສັບສາຍດ່ວນໃນໄລຍະກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII ຜ່ານມາ
ກ່ຽວກັບຄວາມສະອາດຂອງຕົວເມືອງຫລວງວຽງຈັນວ່າ: ຕໍ່ກັບບັນຫານີ້ແມ່ນມີຫລາຍສາເຫດທີ່ພາໃຫ້ຕົວເມືອງບໍ່ມີຄວາມສະອາດ ສິ່ງຫລັກໆແມ່ນເກີດມາຈາກການພັດທະນາໂຄງລ່າງຂອງຕົວເມືອງ, ການຖົມດິນເພື່ອປຸກສ້າງທີ່ຢູ່ອາໄສ, ສຳນັກງານອົງການຂອງລັດ, ການກໍ່ສ້າງເສັ້ນທາງ,
ການຂົນສົ່ງດິນ-ຊາຍ ແລະ ການພັດທະນາອື່ນໆນັບທັງພາກລັດ ແລະ ເອກະຊົນ, ຂາດເຂີນກຳລັງໃນການປັດກວາດແຕ່ລະເສັ້ນທາງບວກກັບສະ ຖານທີ່ດູດນ້ຳມາຮັບໃຊ້ໃນການລ້າງເສັ້ນທາງແມ່ນມີຄວາມຫຍຸ້ງຍາກຫລາຍ
ບໍ່ມີຈຸດນ້ຳທີ່ຖາວອນ, ງົບປະມານມາຮັບໃຊ້ແມ່ນມີຈຳນວນຈຳກັດ. ພ້ອມນີ້ ປະຊາຊົນທີ່ອາໄສຢູ່ຕາມແຄມທາງຍັງຂາດຄວາມເປັນເຈົ້າການໃນການຮັກສາຄວາມສະອາດຢູ່ໜ້າເຮືອນຕົນເອງ ແລະ
ຍັງມີປາກົດການຖິ້ມຂີ້ເຫຍື້ອຊະຊາຍມີຫລາຍ.
ທ່ານຮອງປະທານ ອພບ
ຊີ້ແຈງວ່າ: ເພື່ອແກ້ໄຂບັນຫາດັ່ງກ່າວນັ້ນ ແມ່ນມີບາງຮູບການ ແລະ ວິທີການ
ຄືອົງການປົກຄອງນະຄອນຫລວງວຽງຈັນໄດ້ອອກມະຕິຕົກລົງກ່ຽວກັບແຜນວຽກ ແລະ
ມາດຕະການຈັດຕັ້ງໂຄງການວຽງຈັນສະອາດຮອດປີ 2020 ອັນເປັນປຶ້ມຄູ່ມືໜຶ່ງທີ່ໃຫ້ພວກເຮົາໃນການຈັດຕັ້ງປະຕິບັດການຮັກສາຄວາມສະອາດຂອງຕົວເມືອງ, ໄດ້ນຳໃຊ້ກົນຈັກເຂົ້າໃນການລ້າງ, ການດູດຝຸ່ນຢູ່ 21 ເສັ້ນທາງ
ມີຄວາມຍາວທັງໝົດ
90.200 ກວ່າແມັດ ເຊິ່ງບາງເສັ້ນທາງແມ່ນລ້າງ ແລະ ດູດຝຸ່ນອາທິດລະເທື່ອ, ບາງເສັ້ນທາງສອງອາທິດຕໍ່ເທື່ອເລີ່ມແຕ່
18:00 ໂມງເປັນຕົ້ນໄປ, ບາງກໍລະນີຕ້ອງໄດ້ລ້າງກາງເວັນ ແລະ ດູດຝຸ່ນແຕ່
24:00 ໂມງເປັນຕົ້ນໄປ ແລະ ໄດ້ນຳໃຊ້ແຮງງານຄົນເຂົ້າໃນການປັດກວາດ, ເກັບຂີ້ເຫຍື້ອ, ລ່ວງຄອງລະບາຍນ້ຳ ແລະ ເສຍຫຍ້າແຄມທາງຜູ້ໜຶ່ງຮັບຜິດຊອບປະມານ 800 ແມັດ. ແຕ່ຄຽງຄູ່ກັນນີ້
ກໍຂໍຮຽກຮ້ອງໃຫ້ທຸກສະຖານທີ່ການກໍ່ສ້າງບໍ່ວ່າພາກລັດ ແລະ ເອກະຊົນ
ຕ້ອງມີຈຸດອະນາໄມຕີນລົດກ່ອນອອກສະຖານທີ່ກໍ່ສ້າງເພື່ອຫລຸດຜ່ອນຄວາມເປື້ອນເປິະ. ຖ້າຫາກຜູ້ໃດບໍ່ປະຕິບັດຕ້ອງໃຊ້ມາດຕະການເດັດຂາດ, ເຊັ່ນດຽວກັນ ສຳນັກງານອົງການຂອງລັດ, ບໍລິສັດຫ້າງຮ້ານ ແລະ ເຮືອນປະຊາຊົນທີ່ຢູ່ຕິດແຄມທາງຕ້ອງເຂົ້າຮ່ວມໃນການເຮັດສັນຍາ ແລະ
ຈັດຕັ້ງປະຕິບັດສັນຍາຮັກສາຄວາມສະອາດຂອງເສັ້ນທາງເຂດຕົນຮັບຜິດຊອບໃຫ້ດີ, ເບື້ອງລັດຕ້ອງສະໜອງງົບປະມານເຂົ້າໃນການຮັກສາຄວາມສະອາດຂອງຕົວເມືອງໃຫ້ພຽງພໍ ແລະ ຕ້ອງສ້າງສະຖານທີ່ດູດນ້ຳໃຫ້ໄດ້ມາດຕະຖານ
ເພື່ອຫົດສວນ, ລ້າງທາງໃຫ້ພຽງພໍ.
No comments:
Post a Comment