ຕາມການລາຍງານຂອງໜ່ວຍເຝົ້າລະວັງພະຍາດລະບາດ,ກະຊວງສາທາລະນະສຸກຕໍ່ນັກຂອງພວກເຮົາໃນວັນທີ 26 ພຶດສາພານີ້ຮູ້ວ່າ: ປັດຈຸບັນຢູ່ບາງແຂວງພາກໃຕ້ໄດ້ມີການລະບາດຂອງພະຍາດໄຂ້ເລືອດອອກ ຫຼື ໄຂ້ຍຸງລາຍແລ້ວ,ໂດຍສະເພາະຢູ່ແຂວງຈຳປາສັກມີຜູ້ຕິດເຊື້ອຫຼາຍກວ່າ 300 ກໍລະນີ້ ແລະ ໃນນັ້ນມີຜູ້ເສຍຊີວິດແລ້ວ 5 ຄົນ, ແຂວງອັດຕະປືມີຜູ້ຕິດເຊື້ອຫຼາຍກວ່າ 50 ກໍລະນີ,
ຂະນະທີ່ແຂວງອື່ນໆກໍເລີ່ມມີກໍລະນີຜູ້ຕິດເຊື້ອໄຂເລືອດອອກຈຳນວນໜຶ່ງ,ຊຶ່ງຕໍ່ສະພາບການດັ່ງກ່າວກະຊວງສາທາລະນະສຸກກໍໄດ້ຮີບຮ້ອນນຳສົ່ງພະນັກງານວິຊາການລົງສົມທົບກັບທ້ອງຖິ່ນ,ເພື່ອສະກັດກັ້ນການລະບາດຂອງພະຍາດໄຂ້ເລືອດອອກຢູ່
ບັນດາແຂວງດັ່ງກ່າວ, ເພື່ອແນະນຳໃຫ້ຄວາມຮູ້ໃນການປ້ອງກັນຕົວເອງ ແລະ ການທຳລາຍແຫຼ່ງເພາະພັນຂອງຍຸງລາຍຢູ່ຕາມບ້ານ ແລະ ເມືອງທີ່ມີການລະບາດ ແລະ ເຂດທີ່ມີຄວາມສ່ຽງຕ່າງໆ,ພ້ອມທັງແນະນຳໃຫ້ໂຮງໝໍໃຫ້ເອົາໃຈໃສ່ບໍລິການປິ່ນປົວຄົນຕິດໄຂ້ເລືອດອອກໃຫ້ດີເພື່ອບໍ່ແຜ່ຂະຫຍາຍໄປສູ່ບ່ອນອື່ນ ແລະ ບໍ່ສະເພາະແຕ່ບັນດາແຂວງພາກໃຕ້ເທົ່ານັ້ນທຸກໆແຂວງໃນທົ່ວປະເທດກໍຕ້ອງມີການຕິດຕາມເຝົ້າລະວັງພະຍາດດັ່ງກ່າວຢ່າງໃກ້ຊິດ,ເຕືອນປະຊາຊົນເປັນເຈົ້າການທຳລາຍແຫຼ່ງເພາະພັນຂອງຍຸງລາຍຕາມຄຳຂັວນ 5 ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດຄື: 1 ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່, 2 ປ່ຽນນ້ຳໃນພາຊະນະເຊັ່ນ: ເຕົ້າດອກໄມ້ , ນ້ຳຮອງຕີນຕູ້ , ຖ້ານຮອງຈອກນ້ຳ, 3 ປ່ອຍປາຫາງນົກຍົກເພື່ອກິນໜອນນ້ຳ, 4 ປັບປຸງການອະນາໄມສິ່ງແວດລ້ອມອອ້ມເຮືອນບໍ່ໃຫ້ມີກະໂປະ,ກະປ່ອງ, ຢ່າງຕີນລົດເກົ່າທີ່ມີນ້ຳຂັງ, 5 ປະຕິບັດໃຫ້ເປັນນິໃສ່ປະຈຳທຸກໆອາທິດ ແລະ ຖ້າຫາກເປັນໄຂ້ໃຫ້ໄປພົບແພດໝໍດ່ວນ.
ໃນປີຜ່ານມາປະເທດເຮົາບໍ່ເກີດການລະບາດຂອງພະຍາດໄຂ້ເລືອກອອກຍ້ອນທຸກພາກ ສ່ວນໃນສັງຄົມໄດ້ເປັນເຈົ້າການຕ້ານ ແລະ ປ້ອງກັນໂຕເອງດັ່ງກ່າວ, ປະຕິບັດຫຼັກການ ອະນາໄມ້ຢ່າງເຂັ້ມງວດ,ພິເສດແມ່ນການເອົາໃຈໃສ່ທຳລາຍແຫຼ່ງເພາະພັນຂອງຍຸງລາຍ ອັນເປັນຕົວນຳເຊື້ອພະຍາດດັ່ງກ່າວໄດ້ຢ່າງມີປະສິດທິຜົນ,ດ້ວຍການປະຕິບັດຄຳຂັວນ 5 ປ
ຂອງກະຊວງສາທາລະນະສຸກວາງອອກໄດ້ຢ່າງເຂັ້ມງວດ.
No comments:
Post a Comment