ພິທີເຊັນສັນຍາການຮ່ວມມືໃນຂອບດຳເນີນທຸລະກິດໂທລະຄົມ ແລະ ກົງເຕີ ແບບເອເລັກໂຕຣນິກໃນທົ່ວປະເທດ, ໄດ້ມີຂຶ້ນໃນວັນທີ 21 ພຶດສະພາຜ່ານມານີ້, ທີ່ໂຮງແຮມລາວ ພລາຊາ
ນະ ຄອນຫລວງວຽງຈັນ, ລະຫວ່າງທ່ານ ສີສະຫວາດ ທິຣະວົງ
ອຳນວຍການໃຫຍ່ລັດວິສາຫະກິດໄຟຟ້າລາວ, ທ່ານ ຄຳຄິດ ໄຊສົງຄາມ ອຳນວຍການໃຫຍ່ບໍລິສັດລັດສະກາຍໂທລະຄົມ ແລະ ທ່ານນາງ ກິ່ງໂພເງິນ ພູມມະສັກ ອຳນວຍການບໍລິສັດ ບີເອັສເຄ ລົງທຶນ ແລະ ການບໍລິການ, ໂດຍມີທ່ານ ພົນໂທ
ແສງນວນ ໄຊຍະລາດ ລັດຖະມົນຕີກະຊວງປ້ອງກັນຄວາມສະຫງົບ ແລະ ທ່ານ ດຣ.
ຄຳມະນີ ອິນທິລາດ ລັດຖະ ມົນຕີກະຊວງພະລັງງານ ແລະ ບໍ່ແຮ່ ເຂົ້າຮ່ວມເປັນສັກຂີພິຍານ.
ນັບແຕ່ທ້າຍປີ
2016 ເປັນຕົ້ນໄປ,
ບັນຫາການຈົດນັບເລກກົງເຕີ ໄຟຟ້າ ບໍ່ກົງກັບໂຕເລກຈິງ, ຊຶ່ງສົ່ງຜົນໃຫ້ການເສຍຄ່າໄຟຟ້າ ບາງເດືອນສູງເກີນຄວາມເປັນຈິງ, ສ້າງຄວາມຫຍຸ້ງຍາກສັບສົນໃນການນຳໃຊ້ໄຟຟ້ານັ້ນ ອາດຈະໝົດໄປ ເມື່ອລັດວິສາຫະກິດໄຟຟ້າລາວ ຈັບມືກັບ ບໍລິສັດລັດສະກາຍໂທລະຄົມ ແລະ ບໍລິສັດ
ບີເອັສເຄ ລົງທຶນ ແລະ ບໍລິການ, ກຽມຕິດຕັ້ງກົງເຕີໄຟຟ້າແບບເອເລັກໂຕຣນິກ, ໂດຍນຳໃຊ້ເຕັກໂນໂລຊີທີ່ທັນສະໄໝ ມາຕິດຕັ້ງໃນສຳນັກງານ-ອົງການ ຕະຫລອດຮອດບ້ານເຮືອນປະຊາຊົນ ໂດຍຈະເລີ່ມທົດລອງຕິດຕັ້ງຢູ່ນະຄອນຫລວງວຽງຈັນ ໃນທ້າຍປີໜ້າ, ຫລັງຈາກນັ້ນ ຈຶ່ງຈະຂະຫຍາຍໄປບັນດາແຂວງຕ່າງໆໃນທົ່ວປະເທດ.
ທ່ານອຳນວຍການໃຫຍ່ບໍລິສັດ ລັດສະກາຍໂທລະຄົມ ກ່າວວ່າ: ການຮ່ວມມືຄັ້ງນີ້ ໄດ້ກາຍເປັນກຳລັງແຮງໃຫ້ແກ່ລັດວິສາຫະກິດໄຟຟ້າລາວ ການຕິດຕັ້ງກົງເຕີ ແບບເອເລັກໂຕຣນິກທີ່ທັນສະໄໝນີ້, ກໍເພື່ອເຮັດໃຫ້ການເກັບລາຍຮັບໃຫ້ດີຂຶ້ນ, ຫລີກເວັ້ນການຮົ່ວໄຫລ. ດັ່ງນັ້ນ ຈຶ່ງຈຳເປັນຕ້ອງມີລະບົບການສື່ສານທີ່ດີ
ໂດຍສະເພາະແມ່ນລະບົບສາຍໃຍແກ້ວ, ຊຶ່ງບໍລິສັດລັດສະກາຍ ມີຄວາມພ້ອມໃນການຂະຫຍາຍລະບົບດັ່ງກ່າວ ໃຫ້ສາມາດຄວບຄຸມທົ່ວປະເທດ, ຊຶ່ງກົງເຕີໄຟຟ້າແບບເອເລັກໂຕຣນິກທີ່ວ່ານີ້ ແມ່ນການຕິດຕັ້ງລະບົບການສື່ສານໂດຍນຳໃຊ້ເຕັກໂນໂລຊີ ທັນສະໄໝເຂົ້າໃສ່, ຊຶ່ງອາດຈະໃຊ້ລະບົບບັດເຕີມເງິນ, ໂດຍບໍ່ຈຳເປັນຕ້ອງໃຊ້ຄົນໄປຈົດນັບກົງເຕີໄຟຟ້າຄືກັບປັດຈຸບັນ, ຊຶ່ງຄາດວ່າຈະເລີ່ມທົດລອງໃນທ້າຍປີ 2016 ເປັນຕົ້ນໄປ,
ຊຶ່ງຫາກລະບົບດັ່ງກ່າວສາມາດຕອບສະໜອງໄດ້ດີ, ກົງເຕີໄຟຟ້າທີ່ໃຊ້ໃນປັດຈຸບັນຈະຖືກປ່ຽນຖ່າຍອອກ ເພື່ອນຳກົງເຕີແບບເອເລັກໂຕຣນິກໃໝ່ເຂົ້າແທນ.
No comments:
Post a Comment