ພິທີປະກາດແຕ່ງຕັ້ງທ່ານ ສົມສັກ ໄຕບຸນລັດ ຮອງປະທານສານປະຊາຊົນພາກກາງ ເປັນຮັກສາການປະທານສານປະຊາຊົນພາກກາງ ແທນທ່ານ ກົງຈີ ຢາງຈື່ ປະທານສານປະຊາຊົນພາກກາງ ໄປຮັບໜ້າທີ່ໃໝ່ເປັນຮອງປະທານກຳມາທິການຍຸຕິທຳຂອງສະພາແຫ່ງຊາດຊຸດທີ VIII ໂດຍການເຂົ້າຮ່ວມຂອງທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດ, ມີບັນດາພະນັກງານຫລັກແຫລ່ງອ້ອມຂ້າງສານປະຊາຊົນສູງສຸດເຂົ້າຮ່ວມຢ່າງພ້ອມພຽງ.
ທ່ານ ກົງຈີ ຢາງຈື່ ໄດ້ລາຍງານການເຄື່ອນໄຫວວຽກງານຂອງສານປະຊາຊົນພາກກາງໃນ
ຕະຫລອດໄລຍະ 6 ປີຜ່ານມາວ່າ: ຕົນ ແລະ ໝູ່ຄະນະໄດ້ພ້ອມກັນຊີ້ນຳ-ນຳພາການຈັດຕັ້ງປະ ຕິບັດວຽກງານທີ່ໄດ້ຮັບມອບໝາຍຢ່າງມີຄວາມຮັບຜິດຊອບສູງ ໂດຍສະເພາະໄດ້ເອົາໃຈໃສ່ສຶກສາອົບຮົມການເມືອງແນວຄິດຂອງສະມາຊິກພັກ-ພະນັກງານລັດຖະກອນຂອງສານປະຊາຊົນຢ່າງເປັນປົກກະຕິ ເປັນຕົ້ນການປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ຄຳສັ່ງຕ່າງໆຂອງພັກ-ລັດຢ່າງເຂັ້ມງວດ. ສຳລັບພິພາກສາຄະດີ ແລະ ແກ້ໄຂຄະດີ ສາມາດຈັດຕັ້ງປະ ຕິບັດໄດ້ ຄືປີ
2010 ແກ້ໄຂໄດ້ 510 ເລື່ອງ, ປີ
2011 ແກ້ໄຂໄດ້ 441 ເລື່ອງ, ປີ
2012 ແກ້ໄຂໄດ້ 447 ເລື່ອງ, ປີ
2013 ແກ້ໄຂໄດ້ 533 ເລື່ອງ, ປີ
2014 ແກ້ໄຂໄດ້ 458 ເລື່ອງ ແລະ ປີ
2015 ແກ້ໄຂໄດ້ 439 ເລື່ອງ. ນອກຈາກນີ້ ຍັງໄດ້ຊ່ວຍສານປະຊາຊົນພາກເໜືອ ແລະ ໃຕ້ພິພາກສາຄະດີເປັນຈຳນວນຫລາຍຄັ້ງ ແລະ ປະກອບສ່ວນປັບປຸງ
ແລະ ສ້າງກົດໝາຍໄດ້ຫລາຍສະບັບ.
ໃນໂອກາດນີ້, ທ່ານປະທານສານປະຊາຊົນສູງສຸດ ໄດ້ໂອ້ລົມຊີ້ນຳໃຫ້ຜູ້ທີ່ໄດ້ຮັບການແຕ່ງຕັ້ງ ຮັກສາການປະທານສານປະຊາຊົນພາກກາງ ແລະ ໝູ່ຄະນະ ຈົ່ງພ້ອມກັນສືບຕໍ່ຊີ້ນຳ-ນຳພາວຽກງານໃຫ້ປະຕິບັດຕາມພາລະບົດບາດສິດໜ້າທີ່ຂອງຕົນທີ່ພັກ ແລະ ລັດຖະບານມອບໝາຍໃຫ້ມີຜົນສຳເລັດ, ພ້ອມກັນສູ້ຊົນສຸມທຸກເຫື່ອແຮງ, ສະຕິປັນຍາ, ຄວາມຮູ້-ຄວາມສາມາດຂອງພະນັກງານ ເພື່ອແກ້ໄຂຂໍ້ຄົງຄ້າງຕ່າງໆໃຫ້ຫລຸດລົງ ເພື່ອເຮັດໃຫ້ວຽກງານສານປະຊາຊົນພາກກາງມີຄວາມເຂັ້ມແຂງຂຶ້ນເລື້ອຍໆ.
No comments:
Post a Comment