2017 ລາວຕ້ອງການງົບປະມານ 131 ຕື້ກີບສະໜອງໃຫ້ຜູ້ມີຄຸນງາມຄວາມດີຕໍ່ປະເທດຊາດ

            ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຄໍາແພງ ໄຊສົມແພງ ໄດ້ລາຍງານຢູ່ກອງປະຊຸມສະພາແຫ່ງຊາດໃນວັນທີ 27 ຕຸລານີ້ວ່າ: ໃນປີ 2017 ຂະແໜງການຕົນຕ້ອງການເງິນ 131 ຕື້ກວ່າກີບ ເພື່ອປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດປະຕິວັດໃນຈໍານວນ 6.616 ຄົນ. ໃນນັ້ນນະໂຍບາຍເງິນປ່ຽນແທນໂກຕາລົດ ລວມເປັນເງິນປະມານ 20 ຕື້ກວ່າກີບ, ອຸດໜູນເທື່ອດຽວໃຫ້ຜູ້ເສຍສະຫລະຊີວິດປາງສົງຄາມ 46 ຕື້ກວ່າກີບ ແລະ ອຸດໜູນບໍາເນັດເທື່ອດຽວ 62 ຕື້ກວ່າກີບ. ນອກຈາກນີ້ຍັງຈະໄດ້ປະຕິບັດຕໍ່ເປົ້າໝາຍທົ່ວໄປຕາມດໍາລັດຂອງນາຍົກ
ລັດຖະມົນຕີກ່ຽວກັບການສະໜອງວັດຖຸຜະລິດອົງຄະທຽມ, ບໍລິການພະນັກງານເສຍອົງຄະມາຕໍ່ຂາທຽມ ແລະ ຕັດເຄື່ອງນຸ່ງໃຫ້ພະນັກງານເສຍອົງຄະທີ່ຈະຕ້ອງນໍາໃຊ້ງົບປະມານເກືອບ 2 ຕື້ກີບ.

           ລັດຖະມົນຕີກະຊວງແຮງງານ ແລະ ສະຫວັດດີການ ກ່າວວ່າ: ນັບແຕ່ປີ 1993-2015 ລາວໄດ້ປະຕິບັດນະໂຍບາຍດ້ານຕ່າງໆໃຫ້ບັນດາເປົ້າໝາຍ ເຊັ່ນ: ນະໂຍບາຍທີ່ຢູ່ອາໃສ, ໂກຕາລົດ ແລະ ເງິນປ່ຽນແທນໂກຕາລົດ, ອຸດໜູນນາມມະຍົດວິລະຊົນແຫ່ງຊາດ, ນັກຮົບແຂ່ງຂັນ, ປຸກສ້າງເຮືອນໃຫ້ພະນັກງານເສຍອົງຄະພິເສດ, ອຸດໜູນເທື່ອດຽວໃຫ້ຄອບຄົວຜູ້ເສຍສະລະຊີວິດຍ້ອນການສູ້ຮົບ ແລະ ຮັບໃຊ້ການສູ້ຮົບໃນພາລະກິດປົດປ່ອຍຊາດ, ອຸດໜູນບຳເນັດໃຫ້ພະນັກງານ, ທະຫານ, ຕຳຫລວດ, ຕາແສງ, ຄະນະແນວລາວຮັກຊາດ ແລະ ກອງຫລອນທີ່ບໍ່ມີເງື່ອນໄຂຮັບບຳນານໄດ້ທັງໝົດ 29.390 ຄົນເປັນເງິນຫລາຍກວ່າ 400 ຕື້ກີບ ແລະ ໄດ້ແກ້ໄຂນະໂຍບາຍອຸດໜູນບຳນານຄືນໃຫ້ພະນັກງານ, ທະຫານ, ຕຳຫລວດຜູ້ທີ່ມີເງື່ອນໄຂໄດ້ທັງໝົດ 2.098 ຄົນ, ຄົ້ນຄວ້າແກ້ໄຂຮັບນະໂຍບາຍອຸດໜູນເສຍອົງຄະຍ້ອນການສູ້ຮົບ ແລະ ຮັບໃຊ້ການສູ້ຮົບລວມທັງໝົດ 2.450 ຄົນ. ນອກຈາກເປົ້າໝາຍບູລິມະສິດດັ່ງກ່າວແລ້ວ, ຂະແໜງແຮງງານ ແລະ ສະຫວັດດີການສັງຄົມ ຍັງໄດ້ສົມທົບກັບອຳນາດການປົກຄອງທ້ອງຖິ່ນຄົ້ນຄວ້າແກ້ໄຂນະໂຍບາຍເງິນສົມທົບປຸກສ້າງໄດ້ທັງໝົດ 1.795 ຄົນເປັນເງິນກວ່າ 40 ຕື້ກີບ ແລະ ແຕ່ລະປີກໍໄດ້ຕັດເຄື່ອງນຸ່ງໃຫ້ພະນັກງານເສຍອົງຄະໃນ 12 ສູນທົ່ວປະເທດຈຳນວນ 647 ຄົນ ແລະ ຊື້ວັດຖຸດິບຜະລິດຂາທຽມໃຫ້ພະນັກງານເສຍອົງ ຄະ ແລະ ໄດ້ຄົ້ນຄວ້າ,  ຢັ້ງຢືນຜົນງານໃຫ້ພະນັກງານບຳນານ, ພະນັກງານ-ລັດຖະກອນ, ທະຫານ, ຕຳຫລວດທີ່ເຂົ້າການປະຕິວັດນັບແຕ່ວັນທີ 31 ທັນວາ 1974 ຄືນຫລັງເພື່ອຫັນສິດນຳໃຊ້ທີ່ດິນເຮືອນ ແລະ ພາຫະນະລັດຄຸ້ມຄອງເປັນສິດນຳໃຊ້ສ່ວນບຸກຄົນໄດ້ທັງໝົດ 1.487 ຄົນ, ພ້ອມທັງໄດ້ເອົາໃຈ ໃສ່ປັບປຸງພື້ນຖານໂຄງລ່າງຢູ່ບັນດາສູນເສຍອົງຄະ, ສ້າງເງື່ອນໄຂອຳນວຍຄວາມສະດວກໃຫ້ແກ່ການເຄື່ອນໄຫວວຽກງານ ແລະ ການດຳລົງຊີວິດຂອງພະນັກງານຢູ່ບັນດາສູນເສຍອົງຄະດັ່ງກ່າວໄດ້ເປັນປົກະຕິ, ພ້ອມໄດ້ຈັດຕັ້ງນຳພາພະນັກງານປະຕິວັດອາວຸໂສໄປທັດສະນະສຶກສາ ແລະ ທ່ອງທ່ຽວພາຍໃນ ແລະ ຕ່າງປະເທດຈຳນວນໜຶ່ງ.