ວັນທີ
9 ພະຈິກນີ້, ກະຊວງແຮງງານ ແລະ ສະຫວັດດີການສັງຄົມ ໄດ້ເປັນເຈົ້າພາບຈັດກອງປະຊຸມເວທີອາຊຽນແຮງງານເຄື່ອນຍ້າຍຄັ້ງທີ
9 ຂຶ້ນທີ່ນະຄອນຫລວງວຽງຈັນ, ພາຍໃຕ້ການເປັນປະທານຂອງທ່ານ ໂຈມແຍງ ແພງທອງສະຫວັດ ຮອງຫົວໜ້າກົມແຜນການ ແລະ ການຮ່ວມມື,
ປະທານຄະນະກຳມະການອາຊຽນວ່າດ້ວຍການຈັດຕັ້ງປະຕິບັດຖະແຫລງການແຮງງານເຄື່ອນຍ້າຍອາຊຽນ, ໂດຍການເຂົ້າຮ່ວມຂອງທ່ານນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງ ຄົມ, ມີຜູ້ຕາງໜ້າຈາກອົງການຈັດຕັ້ງສາມຝ່າຍຂອງບັນດາປະເທດສະມາຊິກອາຊຽນ ຄືອົງການຈັດຕັ້ງທີ່ບໍ່ສັງກັດລັດຖະບານ ທີ່ເຮັດວຽກກ່ຽວກັບແຮງງານເຄື່ອນຍ້າຍ ແລະ ອົງການສາກົນສຳລັບແຮງງານເຄື່ອນຍ້າຍ, ອົງການສະຫະປະຊາຊາດເພື່ອແມ່ຍິງ, ໜ່ວຍປະຕິບັດງານສຳລັບແຮງງານເຄື່ອນຍ້າຍອາຊຽນ, ກອງເລຂາອາຊຽນ ແລະ ປະເທດສັງເກດການຈຳນວນໜຶ່ງເຂົ້າຮ່ວມ.
ເພື່ອເປັນການຈັດຕັ້ງປະຕິບັດແຜນງານກອງປະຊຸມລັດຖະມົນຕີແຮງງານອາຊຽນ 2016-2020, ທີ່ໄດ້ຮັບຮອງເອົາໃນກອງປະຊຸມລັດຖະມົນຕີແຮງງານອາຊຽນຄັ້ງທີ 24 ທີ່ນະຄອນຫລວງວຽງຈັນ ແລະ ແຜນງານຂອງຄະນະກຳມະການອາຊຽນ ເພື່ອຈັດຕັ້ງປະຕິບັດຖະແຫລງການອາຊຽນ ກ່ຽວກັບການປົກປ້ອງ ແລະ ສົ່ງເສີມສິດທິແຮງງານເຄື່ອນຍ້າຍ, ກອງປະຊຸມຄັ້ງນີ້ ຍັງໄດ້ປຶກສາຫາລືກັນ ໃນຫົວຂໍ້: ການປັບປຸງຊີວິດການເປັນຢູ່ຂອງແຮງງານເຄື່ອນຍ້າຍອາຊຽນໃຫ້ດີຂຶ້ນ, ໂດຍຜ່ານການສ້າງຄວາມເຂັ້ມແຂງການປົກປ້ອງສັງຄົມ, ການຈັດຕັ້ງປະຕິບັດວຽກງານປະກັນສັງຄົມໃນປັດຈຸບັນຕໍ່ແຮງງານເຄື່ອນຍ້າຍ ແລະ ຊອກຫາວິທີທາງແລກປ່ຽນຂໍ້ມູນກ່ຽວກັບປະກັນສັງຄົມໃຫ້ສາມາດເຊື່ອມຕໍ່ກັນຢູ່ໃນອາຊຽນ.
ທ່ານນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວໃນກອງປະຊຸມວ່າ: ລັດຖະບານລາວຍາມໃດກໍເປັນຫ່ວງເປັນໃຍຕໍ່ການປົກປ້ອງສິດ ແລະ ຜົນປະໂຫຍດຂອງແຮງງານ, ໄລຍະຜ່ານມາ ພວກເຮົາໄດ້ປັບປຸງກົດໝາຍແຮງງານທີ່ປະກາດໃຊ້ໃນປີ
2014 ແລະ ກົດໝາຍປະກັນສັງຄົມ 2014, ໂດຍການຮ່ວມມືຂອງອົງການຈັດຕັ້ງສາມຝ່າຍຄື:
ກະ ຊວງແຮງງານ ແລະ ສະຫວັດດີການສັງຄົມ, ສະພາການຄ້າ ແລະ ອຸດສາຫະກຳແຫ່ງຊາດ ແລະ ສູນກາງສະຫະພັນກຳມະ ບານ ເພື່ອເຮັດໃຫ້ແຮງງານລາວ ແລະ ແຮງງານຕ່າງປະເທດທຸກຄົນໄດ້ຮັບການປົກປ້ອງສິດ ແລະ ຜົນປະໂຫຍດ,
ໄດ້ມີໂອກາດເຂົ້າເຖິງຂໍ້ມູນຂ່າວສານດ້ານແຮງງານ ແລະ ການເຂົ້າເປັນສະມາຊິກປະກັນສັງຄົມຂອງລາວ, ພ້ອມນີ້ ຍັງໄດ້ຈັດຕັ້ງປະຕິບັດໂຄງການທົດລອງ ວຽກງານປົກປ້ອງສັງຄົມຢູ່ສາມແຂວງ ເພື່ອເປັນການຕອບສະໜອງຕໍ່ແຜນການລຶບລ້າງຄວາມທຸກຍາກແຫ່ງຊາດປີ 2020 ແລະ ການຈັດຕັ້ງປະຕິບັດເປົ້າໝາຍການພັດທະນາແບບ ຍືນຍົງຂອງສາກົນ 2030, ພ້ອມນີ້ ກໍໄດ້ເອົາໃຈໃສ່ປັບປຸງລະບົບຂໍ້ມູນຂ່າວສານຕະຫລາດແຮງງານ ເພື່ອເປີດໂອກາດໃຫ້ແຮງງານສາມາດເຂົ້າເຖິງການມີວຽກເຮັດງານທຳ, ໂດຍອີງຕາມຜົນຂອງພົນລະເມືອງໃນປີ
2015, ພົນລະເມືອງລາວ 6,5 ລ້ານຄົນ, ມີກຳລັງແຮງງານ 3,6 ແສນຄົນ, ຜູ້ມີວຽກເຮັດງານທຳ 3,5 ແສນຄົນ, ແລະ ມີອັດຕາການຫວ່າງງານ 1,4% ຂອງພົນລະເມືອງທັງໝົດ. ທ່ານຍ້ຳຕື່ມວ່າ: ອາຊຽນຕ້ອງເອົາໃຈໃສ່ຈັດຕັ້ງປະຕິບັດວຽກງານການປົກປ້ອງ ແລະ ສົ່ງເສີມສິດທິຂອງແຮງງານເຄື່ອນຍ້າຍ ໃຫ້ສອດຄ່ອງກັບຖະແຫລງການອາຊຽນ ທີ່ພົວພັນກັບວຽກງານແຮງງານ ແລະ ອີງໃສ່ເງື່ອນໄຂຂອງແຕ່ລະປະເທດສະມາຊິກອາຊຽນ.
No comments:
Post a Comment