ຫລາຍທ້ອງຖິ່ນຍັງບໍ່ເອົາເງິນຂາຍໄມ້ມອບເຂົ້າງົບປະມານລັດ
ອົງການກວດສອບແຫ່ງລັດສະເໜີລັດຖະບານມີມາດຕະການເຂັ້ມງວດຕໍ່ທ້ອງຖິ່ນໃດທີ່ນຳໃຊ້ລາຍຮັບທີ່ໄດ້ຈາກການຂາຍໄມ້ ຫລື ຂາຍໄມ້ບໍ່ຖືກຕ້ອງຕາມລະບຽບຫລັກການຕ້ອງມອບລາຍຮັບດັ່ງກ່າວເຂົ້າງົບປະມານໃຫ້ສຳເລັດໂດຍໄວ.
ພາຍຫລັງເຫັນວ່າມີຫລາຍທ້ອງຖິ່ນຍັງບໍ່ມອບເງິນດັ່ງ ກ່າວ ເປັນຕົ້ນແຂວງຈຳປາສັກໄດ້ນຳໃຊ້ເງິນຈາກການຂາຍໄມ້ຈຳນວນ 63 ຕື້ກວ່າກີບ ແຕ່ໄດ້ມອບຄືນເຂົ້າງົບປະມານດ້ວຍວິທີການຈົດຮັບ-ຈົດຈ່າຍໃນສົກປີ 2014-2015, ສ່ວນການກວດກາການຂາຍໄມ້ບໍ່ຖືກຕ້ອງຕາມລະບຽບມີບໍລິມາດຫລາຍກວ່າ 105 ພັນແມັດກ້ອນ ຕົກເປັນມູນຄ່າຫລາຍກວ່າ 46 ລ້ານໂດລາສະຫະລັດ ຫລື
ປະມານ 375 ຕື້ກວ່າກີບ; ເຫັນວ່າມີ 4 ຮູບແບບ ຄືບໍ່ຜ່ານການປະມູນ ມີບໍລິມາດ 4.107 ກວ່າແມັດກ້ອນ ມີມູນຄ່າຫລາຍກວ່າ 21 ລ້ານໂດລາສະຫະລັດ, ຂາຍໃຫ້ບໍລິສັດບໍ່ມີທະບຽນປຸງແຕ່ງໄມ້ຫລາຍກວ່າ 37 ພັນແມັດກ້ອນ ມູນຄ່າຫລາຍກວ່າ 18 ລ້ານໂດລາສະຫະລັດ, ຂາຍຄືນໃຫ້ຜູ້ກະທຳຜິດ (ໂຮງງານປຸງແຕ່ງໄມ້) ລວມມີບໍລິມາດຫລາຍກວ່າ 6.839 ແມັດກ້ອນ ມູນຄ່າ 3 ລ້ານກວ່າໂດລາສະຫະລັດ. ກໍລະນີດັ່ງກ່າວຫລາຍທ້ອງຖິ່ນອ້າງເຫດຜົນວ່າເປັນໄມ້ເກດຕໍ່າ, ໄມ້ທ່ອນສັ້ນ ຫລື ບໍລິສັດອື່ນບໍ່ສາມາດຊື້ໄດ້ ແລະ ຮູບແບບຂາຍຫລຸດລາຄາໄມ້ທີ່ກະຊວງອຸດສາຫະກຳ ແລະ
ການຄ້າວາງອອກມີບໍລິມາດ 13 ພັນກວ່າແມັດກ້ອນ ລວມມີມູນຄ່າຫລາຍກວ່າ 3,4 ລ້ານໂດລາສະຫະລັດ. ຕໍ່ບັນຫາດັ່ງກ່າວຈຶ່ງສະເໜີໃຫ້ຫົວໜ່ວຍງົບປະມານທີ່ມີລາຍຮັບຈາກການຂາຍໄມ້ນອນໃນໂກຕ້າທີ່ສະພາແຫ່ງຊາດຮັບຮອງໃຫ້ມອບເຂົ້າລວມສູນງົບປະມານລັດ ແລະ ເປັນແຫລ່ງລາຍຮັບພູດສູນກາງ 100% ຕາມລະບຽບກົດໝາຍກຳນົດໄວ້, ຖ້າເປັນລາຍຮັບຈາກການຂາຍໄມ້ຢຶດແມ່ນໃຫ້ແບ່ງປັນເຂົ້າງົບປະມານສູນກາງ 50% ແລະ ງົບປະມານທ້ອງຖິ່ນ 50% ຕາມຄຳສັ່ງນາຍົກ ແລະ ຕໍ່ກໍລະນີຜູ້ຕົກລົງໃຫ້ນຳໃຊ້ເງິນຂາຍໄມ້ບໍ່ຖືກຕ້ອງກໍຕ້ອງໃຫ້ມີຄວາມຮັບຜິດຊອບຕໍ່ການຕົກລົງຂອງຕົນຕາມລະບຽບ ຫລື
ຕ້ອງມີການເກັບກູ້ຄືນໃຫ້ລັດ ແລະ ກໍລະນີເປັນພຶດຕິກຳເຂົ້າຄ່າຍການສໍ້ລາດບັງຫລວງກໍຕ້ອງໄດ້ດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
No comments:
Post a Comment