laophatthananewspaper: ບໍ່ຕອບຄຳຖາມສື່ແມ່ນຜິດກົດໝາຍສື່ມວນຊົນ

ນັບແຕ່ມີການກຳເນີດເກີດຂຶ້ນຂອງສື່ມວນຊົນລາວມາເປັນເວລາຫລາຍກວ່າ 65 ປີ ແລະ ສື່ກໍສາມາດເຮັດຫລ້ອນໜ້າທີ່ຂອງຕົນທີ່ພັກ ແລະ ລັດຖະບານມອບໝາຍໃຫ້ເປັນຢ່າງດີ. ດັ່ງໃນສະໄໝສົງຄາມຕໍ່ສູ້ຕ້ານຈັກກະພັດ, ສື່ມວນຊົນໄດ້ເຮັດໜ້າທີ່ນຳພາແນວຄິດປະຊາຊົນບັນດາເຜົ່າຕໍ່ສູ້ກັບການຮຸກຮານຂອງສັດຕູຈົນໄດ້ຮັບໄຊຊະນະ . ຕົກມາຮອດໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ວຽກງານສື່ມວນຊົນກໍຍັງແມ່ນກະບອກສຽງຂອງພັກ ແລະ ລັດໃນການໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມແຫ່ງຊາດ, ປຸກລະດົມນ້ຳໃຈຮັກຊາດ, ເປັນເວທີເສີມຂະຫຍາຍປະຊາທິປະໄຕປະຊາຊົນ, ເປັນແຫລ່ງຂໍ້ມູນສາລະຄວາມຮູ້, ສາລະບັນເທີງໃຫ້ສັງຄົມ ແລະ ປະກອບສ່ວນຕ້ານປາກົດການຫຍໍ້ທໍ້ຕ່າງໆໃນສັງຄົມ ລວມເຖິງການຕອບຕ້ານຖ້ອຍ

ທຳນອງບິດເບືອນຄວາມຈິງ. ຈາກພາລະບົດບາດທີ່ສຳຄັນດັ່ງກ່າວ ໃນໄລຍະຜ່ານມາກໍເຫັນວ່າມີຫລາຍອົງການຈັດຕັ້ງຂອງພັກ-ລັດ, ຫລາຍທ້ອງຖິ່ນ ແລະ ຫົວໜ່ວຍທຸລະກິດຕ່າງໆໄດ້ໃຫ້ຄວາມສຳຄັນຕໍ່ວຽກງານສື່ມວນຊົນເປັນຢ່າງດີ ເຊິ່ງສະແດງອອກໃນການຮ່ວມມືໃນດ້ານຕ່າງໆເຊັ່ນ: ການຖະແຫລງຂ່າວ, ການຊີ້ແຈງບັນຫາຂໍ້ຂ້ອງໃຈຂອງສັງຄົມ, ການໂຄສະນາ, ອຸປະຖຳ ແລະ ອື່ນໆ. ຂະນະດຽວກັນ ກໍເຫັນວ່າຍັງມີອົງການຈັດຕັ້ງຈຳນວນໜຶ່ງບໍ່ຢາກໃຫ້ການຮ່ວມມືກັບສື່ມວນຊົນດີເທົ່າທີ່ຄວນ ເປັນຕົ້ນບໍ່ຢາກໃຫ້ສຳພາດຕໍ່ສື່, ໃນໄລຍະຜ່ານມາຍັງມີບາງຄົນ, ບາງກົມກອງປິດບັງຂໍ້ມູນຕົນເອງບໍ່ຢາກໃຫ້ສື່ຮູ້ ເພາະຢ້ານເຂົາເຫັນແຕ່ຈຸດອ່ອນຫລາຍກວ່າຈຸດດີ. ແຕ່ແນວໃດກໍຕາມ, ໃນຕໍ່ໜ້ານີ້ ການບໍ່ຕອບຄຳຖາມ ຫລື ບໍ່ໃຫ້ການຮ່ວມມືກັບສື່ໃນການຊີ້ແຈງບັນຫາຕ່າງໆທີ່ສັງຄົມສົນໃຈແມ່ນຖືວ່າຜິດກົດໝາຍສື່ມວນຊົນສະບັບປັບປຸງໃໝ່ 2016 ທີ່ສະພາແຫ່ງຊາດໄດ້ຮັບຮອງເອົາແລ້ວ ໂດຍສະເພາະໃນມາດຕາ 48 ເຊິ່ງເປັນມາດຕາປັບປຸງໃໝ່ທີ່ກຳນົດກ່ຽວກັບ ການໃຫ້ຄຳຕອບ ໂດຍລະບຸວ່າ: ສື່ມວນຊົນມີສິດສະເໜີໃຫ້ການຈັດຕັ້ງ ຫລື ບຸກຄົນທີ່ກ່ຽວຂ້ອງຕອບບັນຫາທີ່ພົນລະເມືອງລາວ ຫລື ອົງການຈັດຕັ້ງຕ່າງໆຂໍຄວາມກະຈ່າງແຈ້ງພາຍໃນ 15 ວັນ ພາຍ ຫລັງໄດ້ຮັບຄຳສະເໜີ ແລະ ມີຄວາມຮັບຜິດຊອບຕໍ່ຄຳຖາມຂອງຕົນ, ຖ້າຫາກບໍ່ໄດ້ຮັບຄຳຕອບຈາກການຈັດຕັ້ງ ຫລື ບຸກຄົນອົງການສື່ມວນຊົນມີສິດສົ່ງຄຳເຫັນ, ຄວາມຂັດຂ້ອງຂອງການຈັດຕັ້ງ ແລະ ບຸກຄົນເຖິງການຈັດຕັ້ງຂັ້ນເທິງທີ່ມີສິດອຳນາດແກ້ໄຂ ຫລື ນຳບັນຫານັ້ນລົງເຜີຍແຜ່ໃນສື່ມວນຊົນ. ນອກຈາກນີ້ ການຈັດຕັ້ງ ຫລື ບຸກຄົນຕ່າງໆມີສິດສະເໜີໃຫ້ສື່ມວນຊົນຊີ້ແຈງກ່ຽວກັບຂ່າວທີ່ເຜີຍແຜ່ອອກໄປທີ່ບໍ່ຈະແຈ້ງນັ້ນ ແລະ ຕ້ອງໃຫ້ຄຳຕອບຢ່າງວ່ອງໄວ, ພ້ອມທັງລະບຸໃຫ້ອົງການຈັດຕັ້ງພັກ-ລັດ, ແນວລາວສ້າງຊາດ, ມະຫາຊົນ ແລະ ອົງການຈັດຕັ້ງສັງຄົມສາມາດແຕ່ງຕັ້ງພະນັກງານປະຊາ ສຳພັນ ເພື່ອປະຕິບັດໜ້າທີ່ແຈ້ງຂ່າວ ແລະ ສະໜອງຂໍ້ມູນຂ່າວສານທີ່ກ່ຽວຂ້ອງ ໂດຍຜ່ານສື່ມວນຊົນຕາມສະພາບການຮຽກຮ້ອງຂອງສັງຄົມ. ສະນັ້ນ ເມື່ອກຳນົດໄວ້ຊັດເຈນແບບນີ້ກໍຫວັງວ່າວຽກງານສື່ຈະໄດ້ຮັບການຮ່ວມມືຢ່າງແຂງແຮງຈາກອົງການຈັດຕັ້ງພັກ-ລັດ ກໍຄືສັງຄົມໄດ້ດີຍິ່ງຂຶ້ນ.