ເຈົ້າໜ້າທີ່ພວມເລັ່ງສືບສວນກໍລະນີຂົນຢາບ້າລາຍໃຫຍ່

ນັບວ່າເປັນກະແສຮ້ອນແຮງທີ່ມີການວິພາກວິຈານກັນຫລາຍສົມຄວນ ໃນສື່ມວນຊົນ ແລະ ສັງຄົມອອນລາຍກ່ຽວກັບກໍລະນີເຈົ້າໜ້າທີ່ສາມາດຈັບຜູ້ຄ້າ ຢາເສບຕິດລາຍໃຫຍ່ ໄດ້ໃນວັນທີ 7 ມິຖຸນາຜ່ານມາ, ຢູ່ເສັ້ນທາງເຂດບ້ານ ໂພນຕ້ອງຈອມມະນີ ເມືອງຈັນທະບູລີ ນະຄອນຫລວງວຽງຈັນ ນັບວ່າເປັນການ ມ້າງເຄືອຂ່າຍຄ້າຢາເສບຕິດລາຍໃຫຍ່ເຊິ່ງມີຂອງກາງຢາ ບ້າຫລາຍເກືອບ 3 ລ້ານເມັດທີ່ບັນຈຸໄວ້ 10 ເປົາໃນລົດປາຣາໂດສີດຳໝາຍເລກທະບຽນ ຄຫ 8777 ກຳແພງນະຄອນ ແລະ ຈັບຜູ້ຕ້ອງຫາໄດ້ໜຶ່ງຄົນຊື່ທ້າວ ເຈີປໍວາງ ອາຍຸ 40 ປີ ເປັນປະຊາຊົນຢູ່ບ້ານດອນໄຊ ເມືອງໄຊ ແຊວງອຸດົມໄຊ ແລະ ຜ່ານການສືບສວນ-ສອບສວນຂອງເຈົ້າໜ້າທີ່ຜູ້ກ່ຽວຮັບສາລະພາບວ່າ: ຢາທັງໝົດເປັນຂອງຜູ້ກ່ຽວ ແທ້ເຊິ່ງເອົາມາຈາກເຄືອຂ່າຍຄ້າຂາຍຢາເສບຕິດຢູ່ແຂວງພາກເໜືອຂອງລາວເພື່ອຈະເອົາໄປຈຳໜ່າຍໃຫ້ລູກຄ້າແຕ່ພໍມາຮອດເສັ້ນທາງດັ່ງກ່າວລົດຂອງຕົນໄດ້ເກີດອຸປະຕິເຫດຕຳກັບລົດໃຫຍ່ຄັນໜຶ່ງ ແລະ ຕຳກັບຄູກາງທາງຈົນຕີນລົດດ້ານໜ້າເບື້ອງຂວາຫລຸດອອກໄປຈຶ່ງພະຍາຍາມເອົາຕົວຫລົບ ໜີແຕ່ຖືກເຈົ້າໜ້າທີ່ຈັບຕົວ ໄດ້ພ້ອມຂອງກາງດັ່ງກ່າວ.

    ເຈົ້າໜ້າທີ່ໃຫ້ຮູ້ວ່າ: ປັດຈຸບັນພວມເລັ່ງສືບສວນ-ສອບສວນຢ່າງລະອຽດ ເພື່ອຂະຫຍາຍຜົນຫາຜູ້ຮ່ວມຂະບວນການ ຄ້ າຢາເສບຕິດລາຍໃຫຍ່ເທື່ອນີ້ມາດຳເນີນຄະດີຕາມລະບຽບກົດໝາຍ. ສຳລັບຄະດີຢາເສບຕິດລາຍນີ້ເຫັນວ່າສັງຄົມໄດ້ໃຫ້ຄວາມສົນໃຈຫລາຍສົມຄວນ, ໂດຍສະເພາະຢູ່ໃນສື່ສັງຄົມອອນລາຍ ມີການນຳສະເໜີພາບເຫດການເກີດຂຶ້ນຢ່າງແຜ່ຫລາຍ ແລະ ມີການສະແດງຄຳຄິດເຫັນຕ່າງໆໂດຍສ່ວນຫລາຍແມ່ນ ຊົມເຊີຍການປະຕິບັດງານຂອງເຈົ້າໜ້າທີ່ທີ່ສາມາດຈັບກຸມຂະບວນການຄ້າຢາເສບຕິດລາຍໃຫຍ່ນີ້ໄດ້, ເຊິ່ງຖ້າຫາກຢາບ້າ ຈຳນວນນີ້ຫລຸດລອດໄປກໍຈະມີລູກຫລານຫລາຍຄົນກາຍເປັນທາດຂອງມັນ ແລະ ເປັນໄພອັນຕະລາຍຕໍ່ສັງຄົມຢ່າງ ຮ້າຍແຮງ, ນອກຈາກນີ້ກໍຂໍໃຫ້ເຈົ້າໜ້າທີ່ຄວນອອກມາລາຍງານຄວາມຄືບໜ້າການສືບສວນ- ສອບສວນຄະດີນີ້ໃຫ້ສັງ ຄົມຮັບຮູ້ເປັນແຕ່ລະໄລ ຍະເພື່ອສະແດງໃຫ້ເຫັນການບັງຄັບໃຊ້ກົດໝາຍຕໍ່ຜູ້ຄ້າຢາເສບຕິດຢ່າງເຂັ້ມງວດ.